သျှမ်းပြည်တောင်ပိုင်း၊ တောင်ကြီးမြို့၊ စဝ်စံထွန်းရပ်ကွက်တွင် စစ်ရှောင်များကို တပတ်လျှင်တစ်ကြိမ် ဧည့်စာရင်းတိုင်ခိုင်းပြီး ငွေကြေးပေးနေရကြောင်း စုံစမ်းသိရသည်။

ဇွန်လကုန်ခန့်က တောင်ကြီးမြို့သို့ စစ်ရှောင်ရန်ရောက်ရှိနေသော စစ်ဘေးရှောင်များကို တောင်ကြီးမြို့ စဝ်စံထွန်းရပ်ကွက်တွင် ရာအိမ်မှူး၊ ဆယ်အိမ်မှူးများက တစ်ပတ်လျှင်တစ်ကြိမ် ဧည့်စာရင်းတိုင်ခိုင်းပြီး ငွေကောက်ခံမှုများရှိနေကြောင်း စစ်ရှောင်နေသည့် အမျိုးသမီးတစ်ဦးက သျှမ်းသံတော်ဆင့်သို့ပြောသည်။

“ရောက်တာက ၆ လပိုင်းလောက်တည်းကရောက်တာပါ၊ ရောက်တည်းက ဆောင်နေရတာ ကလေးငယ်ပါမကျန် တစ်ယောက်ကို ၂၀၀၀ ပေးရပါတယ် တပတ်တစ်ကြိမ်ကိုပေးနေရတာပါ၊ လာမဆောင်ရင် အိမ်ရှင်ရော အိမ်ငှားရော ၅ သောင်းစီ ဒဏ်ရိုက်မယ်လို့ပြောပါတယ်” ဟု ၎င်းအမျိုးသမီးက ပြောသည်။

လက်ရှိတွင် တောင်ကြီးမြို့နှင့် သျှမ်းတောင်ရှိမြို့များသို့ သျှမ်းမြောက်နှင့် ကရင်နီပြည်နယ်မှ စစ်ဘေးရှောင်အများအပြားရောက်ရှိနေပြီး အိမ်ငှားခများဈေးမြင့်လာခြင်း၊ နေရေးထိုင်ရေးအခက်အခဲများရှိခြင်းအပြင် စစ်ကောင်စီလက်အောက်ခံ အဖွဲ့များကလည်း နည်းလမ်းမျိုးစုံဖြင့် တင်းကြပ်မှုများရှိနေသည်။

“လခက တစ်လမှ ၁သိန်းခွဲပဲရတာ၊ အသက်ကြီးမိဘနှစ်ယောက်နဲ့ မုဆိုးမတစ်ယောက် ကလေးတစ်ယောက်နဲ့ တပတ်တစ်ကြိမ်ပေးနေရတော့ အဆင်မပြေတော့ဘူးလေ၊ သူတို့ကို ကိုယ်ချင်းစာတတ်စေချင်တယ်” ဟု စစ်ဘေးရှောင်နေသည့် အမျိုးသမီးက ပြောသည်။

လားရှိုးမှ ထွက်ပြေးတိမ်းရှောင်လာသည့် စစ်ဘေးရှောင်များသည် တောင်ကြီးမြို့ပေါ်ရှိ ဆွေမျိုးအိမ်များတွင် နေထိုင်ကြသကဲ့သို့ ဆွေမျိုး မရှိသည့် စစ်ဘေးရှောင်များမှာ ဘုန်းကြီးကျောင်းများကိုသာ အားကိုးနေရသလိုအချို့ ဘုန်းကြီးကျောင်းများသည် စစ်ဘေးရှောင်များ လက်မခံမှုများလည်းရှိကြောင်း စစ်ရှောင်များထံမှသိရသည်။

လက်ရှိအချိန်ထိ သျှမ်းပြည် မြောက်ပိုင်းတကြောတွင် စစ်ကောင်စီဘက်မှ လေကြောင်းဗုံးကြဲမှုများ ဆက်တိုက်ရှိနေသေးသဖြင့် စစ်ရှောင်များ နေရပ်ပြန်ရန် ခက်ခဲနေသေးကြောင်း သိရသည်။

အလုပ်သင် သတင်းထောက် ယူဂျင်းရေးသားသည်။