နိုင်ငံအနှံ့ တိုက်ပွဲများတွင် ရှုံးနိမ့်မှုများနှင့် စစ်အင်အားလျော့ပါးနေသည့် စစ်ကောင်စီသည် ကြီးငယ်၊ ကျား-မ မရွေး ပြည်သူများကို စစ်တပ်ထဲသွင်းမည့်အစီအစဥ်အား ကြိုးပမ်းနေသည်။

သြဂုတ်လ ၁၆ ရက်နေ့က ပြည်သူ့လုံခြုံရေးနှင့် အကြမ်းဖက်နှိမ်နှင်းရေး ဗဟိုကြီးကြပ်မှုအဖွဲ့ဟု စစ်ကောင်စီက ဖွဲ့စည်းလိုက်ပြီးနောက် လမ်းအလိုက်၊ ရပ်ကွက်အလိုက်၊ ကျေးရွာအလိုက် လုံခြုံရေး တည်ဆောက်ရမည်ဟု စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က စစ်ကောင်စီထုတ် သတင်းစာမှတစ်ဆင့် (သြဂုတ် ၂၅)ရက် ကပြောသည်။

အဓိကအားဖြင့် ပြည်သူ့စစ်မှုထမ်း ဥပဒေအောက်တွင် အကျုံးမဝင်သည့် အသက် ၃၅ နှစ်နှင့်အထက် အမျိုးသားများကို အဓိကပစ်မှတ်ထားခေါ်ယူမည်ဟု သိရှိရသည်။

အသက် ၃၅ နှစ်မကျော်သေးသော်လည်း ပြည်သူ့စစ်မှုထမ်းဥပဒေအရ စစ်မှုထမ်းရန် ဆေးမအောင်သူများ၊ စစ်မှုထမ်းရန် ဆိုင်းငံ့ထားသူများကိုလည်း အလှည့်ကျကင်းစောင့်ရန် ဆင့်ခေါ်မည်ဟု စစ်ကောင်စီ၏ ပြောခွင့်အရာရှိ ဗိုလ်ချုပ်ဇော်မင်းထွန်းက ဘီဘီစီ (မြန်မာပိုင်း) ကို ပြောဆိုထားသည်။

“ရည်ရွယ်တာကတော့ အသက် ၃၅ နှစ်ပြည့်ပြီးသွားပြီ။ သို့သော် လုံခြုံရေးမှာ ဝာာဝန်ထမ်းဆောင်နိုင်တဲ့သူတွေ၊ တည်ငြိမ်းအေးချမ်းရေးမှာ တာဝန်ထမ်းဆောင်နိုင်တဲ့သူတွေ အဓိကအမျိုးသားတွေပေါ့။ သူတို့နဲ့ ကျနော်တို့က ဒါဦးစားပေးပြီး ဖွဲ့စည်းသွားမှာဖြစ်ပါတယ်။ ရည်ရွယ်ချက်ကလည်း မိမိတို့ မြို့၊ ရွာ ၊ ရပ်ကွက် လုံခြုံရေးနဲ့ တည်ငြိမ်အေးချမ်းရေး ဖြစ်ပါတယ်။ ကျနော်တို့က လိုအပ်တဲ့ ကာကွယ်ရေးပစ္စည်းတွေ လက်နက်အပါအဝင် တပ်ဆင်ပေးမှာ ဖြစ်ပါတယ်” ဟု ဗိုလ်ချုပ်ဇော်မင်းထွန်းက ပြောသည်။

သို့သော် မည့်သည့်လက်နက်များဆိုသည်ကိုတော့ စစ်ကောင်စီအရာရှိ ထုတ်ဖော်ပြောဆိုခွင့်မရှိပေ။

ထိုကိစ္စနှင့် ပတ်သက်၍ နိုင်ငံရေး၊ စစ်ရေး လေ့လာသုံးသပ်သူ ဦးသန်းစိုးနိုင်က ယခုလိုပြောဆိုထားသည်။

“တကယ်တော့ ပြည်သူလုံခြုံရေးနဲ့ အကြမ်းဖက်မှု ဆန့်ကျင်ရေး စနစ်ထူထောင်မယ်ဆိုတာက ဒီတိုက်ပွဲတွေမှာ ရှုံးနိမ့်ရှုံးပြီး စစ်အင်အားလျော့ပါးနေတဲ့ စစ်ကောင်စီအနေနဲ့ တပြည်လုံးအသက်အရွယ်မရွေး၊ ပြည်သူလူထု တစ်ရပ်လုံးကို စစ်ဘောင်ထဲဆွဲသွင်းဖို့၊ စစ်တပ်ထဲကိုမောင်းပို့ဖို့ ကြိုးပမ်းနေတဲ့အစီစဉ် ဖြစ်ပါတယ်” ဟု ဦးသန်းစိုးနိုင်က သျှမ်းသံတော်ဆင့်ကို ပြောသည်။

ဖေဖော်ဝါရီလအတွင်း ပြည်သူ့စစ်မှု မထမ်းမနေရ ဥပဒေကို စစ်ကောင်စီက အသက်သွင်းပြီးနောက် အသက် ၁၈ နှစ်မှ ၂၃ နှစ်အတွင်း အမျိုးသားများနှင့် အသက် ၁၈ နှစ်မှ ၂၇ နှစ်အတွင်း အမျိုးသမီးများ စစ်မှုထမ်းရန် စစ်ကောင်စီက ထုတ်ပြန်ထားသည်။

အသက်မွေးဝမ်းကြောင်း ပညာရပ်တစ်ခုခုဖြင့် ကျွမ်းကျင်သူအဖြစ် သတ်မှတ်ပါက အမျိုးသား ၄၅ နှစ်အထိ၊ အမျိုးသမီး ၂၅ နှစ်အထိ အကျုံးဝင်မည်ဟုလည်း ပြောဆိုထားသည်။

လက်ရှိ ပြည်သူ့စစ်မှုထမ်း ဥပဒေအောက်တွင် စစ်ကောင်စီက သင်တန်းငါးကြိမ်အထိ ဖွင့်လှစ်ထားပြီး သင်တန်းအပတ်စဉ်တစ်ခုလျှင် လူသစ် ၅,၀၀၀ ခေါ်ယူနေကြောင်း သိရသည်။

“အကုန်လုံးကို စစ်ထွက်တိုက်ခိုင်းနေတာပေါ့ဗျာ။ စစ်ထွက်တိုက်ခိုင်းတယ်ဆိုတာက အခုစစ်ကောင်စီမှာ လျော့ပါးနေတဲ့ အင်အားတွေဖြည့်တင်းဖို့ စစ်မှုထမ်းရမဲ့သူတွေကို ရှေ့တန်းပို့ပြီး အသေခံခိုင်းနေတာပေါ့။ တကယ်ကျတော့ လက်တွေ့အဓိပ္ပာယ်ကသာ ပြည်သူတွေကို စစ်ထဲပါဝင်လာရအောင်၊ ပြည်သူတွေအားလုံးကို စစ်ဒဏ်ကြောင့် သေကြေ၊ ဒဏ်ရာရ၊ ဒုက္ခိတဖြစ်ဆိုတဲ့ အဖြစ်မျိုးထဲရောက်အောင် တွန်းပို့နေတဲ့ ဥပဒေမဲ့ အမည်ကို ထုတ်ပြန်နေတာ ဖြစ်ပါတယ်” ဟု ဦးသန်းစိုးနိုင်က ထပ်လောင်းပြောသည်။

ပြီးခဲ့သည့် ဧပြီလ ၁၂ ရက်နေ့မှာလည်း “အရန်တပ်ဖွဲ့ဝင်များအတွက် စစ်မှုထမ်းစည်းမျဉ်း ထုတ်ပြန်ခြင်း” ဟု စစ်ကောင်စီအမည်ပေးထားသည့် အစီအစဉ်တွင် အကြောင်းမျိုးမျိုးဖြင့် ပင်စင်ယူထားသည့် စစ်မှုထမ်းဟောင်းများ အနည်းဆုံး ၃ နှစ် ထပ်မံစစ်မှုထမ်းရမည်ဟု စစ်ကောင်စီက ထပ်မံထုတ်ပြန်လာခဲ့သည်။

အသက် ၅၅ နှစ်အောက် စစ်မှုထမ်းဖြစ်ပါက လှုပ်ရှားစစ်ဆင်ရေး တာဝန်ထမ်းဆောင်ရမည်ဖြစ်ပြီး၊ အသက် ၅၅ နှစ်မှ ၆၇ နှစ်အတွင်း ဖြစ်ပါက တပ်ဌာနချုပ်များ၊ စစ်ဆင်ရေး ခြေကုပ်စခန်းများနှင့် နေရာလုံခြုံရေး တာဝန်များ ထမ်းဆောင်ရမည်ဟု ဆိုသည်။

တစ်နည်းအားဖြင့် စစ်မှုထမ်းဟောင်းများကို ပင်စင် ခံစားခွင့်ပယ်ဖျက်လိုက်ပြီး လစာရိက္ခာ ခံစားခွင့်ဖြင့် စစ်မှုထမ်းဟောင်းများကို ပြန်လည်ခေါ်ယူခဲ့ခြင်း ဖြစ်သည်။