သျှမ်းပြည် မိုင်းရယ်မြို့နယ် ကျေးရွာတစ်ရွာရှိ နေအိမ်များထံ စစ်ကောင်စီတပ်သားများက အတင်းအဓမ္မ ဝင်ရောက်ကာ လိုချင်သည့် ပစ္စည်းများကို ယူဆောင်သွားကြောင်း ဒေသခံများ ပြောပြချက်အရ သိရသည်။

ပြီးခဲ့သည့် သြဂုတ်လ ဒုတိယပတ်မှ စတင်၍ မိုင်းရယ်မြို့နယ် စစ်ကောင်စီ ခြေလျင်တပ်ရင်း ခလရ-၆၇ အနီးရှိ ဝမ်မုရွာ(ဝၢၼ်ႈမူႉ)တွင် စစ်ကောင်စီတပ်သားများ ဝင်ရောက်လာပြီး ဒေသခံအိမ်များ အထဲရှိ ပစ္စည်းများကို သယ်ယူနေသည်။

ထို့ပြင် ကျေးရွာဒေသခံများသည် လုံခြုံရေးကင်းမဲ့မှုကြောင့် နီးစပ်ရာ ကျေးရွာရှိ ဘုန်းကြီးကျောင်းသို့ သွားရောက်တိမ်းရှောင်နေရကြောင်း အသက် ၄၀ ဝန်းကျင် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“စစ်ကောင်စီ တပ်နဲ့နီးတဲ့ရွာက အခုမနေရဲကြဘူး။ တခြားရွာတွေ ပြောင်းနေကုန်တာ။ လူမရှိတော့ အိမ်စောင့်လောက်ပဲ ကျန်တာ။ သူတို့က ရွာထဲဝင်ပြီး လိုချင်တာတွေ အကုန်လိုက်ယူနေတာ သဲ၊ အုတ်မကျန် အကုန် လိုချင်တာ ယူနေတယ်”ဟု အသက် ၄၀ ဝန်းကျင် ဒေသခံ အမျိုးသားတစ်ဦးက ပြောသည်။

ပြီးခဲ့သည့် ဇူလိုင်လ ၁၃ ရက်တွင် ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) ဌာနချုပ် ဝမ်ဟိုင်းမှ တပ်အင်အား အများအပြားဖြင့် မိုင်းရယ်မြို့ပေါ်သို့ ဝင်ရောက်နေရာယူ တပ်စွဲပြီး မြို့ပတ်လည်တွင် လုံခြုံရေး ယူပေးခဲ့ကြောင်း ဒေသခံများက ပြောသည်။

သို့သော် မိုင်းရယ်မြို့နယ် ဝမ်မုရွာတွင် စစ်ကောင်စီမှ ဒေသခံနေအိမ်များရှိ ပစ္စည်းများကို ဝင်ရောက် သယ်ယူနေသော်လည်း လုံခြုံရေးယူပေးနေသည့် SSPP/SSA မှ ဝင်‌ရောက်ဖြေရှင်းပေးခြင်း မရှိကြောင်း ၎င်းက ဆက်ပြောသည်။

“မိုင်းရယ်မှာက သျှမ်းစစ်သားတွေက လုံခြုံရေးယူထားတယ်သာ ပြောတာ၊ ပြေးနေရတဲ့ ရွာတွေကို သူတို့အနေနဲ့ ဘာမှ မလုပ်ပေးနိုင်ဘူးလေ။ မြို့လောက်ပဲ လုံခြုံတာ၊ ရွာတွေကတော့ လုံခြုံမှုမရှိဘူး၊ စိတ်ပူနေရတယ်”ဟု ၎င်းဒေသခံအမျိုးသားက ပြောဆိုသည်။

ဝမ်မုရွာသည် မိုင်းရယ်နှင့် ၅ မိုင်ခန့်သာ ကွာဝေးပြီး၊ ထိုရွာရှိ ဒေသခံများသည် လက်ရှိတွင် မိုင်းရယ်မြို့ပေါ်နှင့် အနီးအနားရှိ ကျေးရွာ ဘုန်းကြီးကျောင်းများတွင် ထွက်ပြေး တိမ်းရှောင် နေကြရကြောင်း သိရသည်။

လက်ရှိ မိုင်းရယ်မြိုနယ်တွင် ‘ဝ’တပ်ဖွဲ့ UWSA ၊ ကိုးကန့်တပ်ဖွဲ့ MNDAA ၊ ရှမ်းပြည်တိုးတက်ရေးပါတီ/ ရှမ်းပြည်တပ်မတော် SSPP/SSA နှင့် စစ်ကောင်စီတပ်တို့ သွားလာလှုပ်ရှားနေကြောင်း သိရသည်။