သျှမ်းပြည် မိုင်းရှူးမြို့တွင် မူးယစ်ဆေးဝါးသုံးစွဲသူ အမျိုးသားတစ်ဦး နေအိမ်ကို မီးရှို့ပြီး မီးလောင်မှုဖြစ်ပွား ခဲ့ကြောင်း သိရသည်။
ယမန်နေ့ (သြဂုတ်လ ၂၂ ရက်) ည ၉ နာရီခွဲဝန်းကျင်တွင် မိုင်းရှူးမြို့ ရပ်ကွက် (၂) အတွင်း မူးယစ်ဆေးဝါး သုံးစွဲသူ အမျိုးသားတစ်ဦးမှ နေအိမ်ကို မီးရှို့ခြင်းကြောင့် မီးလောင်မှု ဖြစ်ပွားခဲ့ပြီး ယနေ့(ဩဂုတ်လ ၂၃ ရက်) တွင် ၎င်းအမျိုးသားကို သက်ဆိုင်ရာ တာဝန်ရှိသူများမှ လိုက်လံဖမ်းဆီးနေကြောင်း အသက် ၃၀ ဝန်းကျင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ဒီမှာက မနေ့ကတည်းက မိုးတွေ အရမ်းရွာနေတာ။ သူ့အိမ်မှာ သူ့မိဘတွေတောင် မအိပ်ရဲဘူး။ မူးယစ်ဆေး သုံးရင်းနဲ့ အိမ်ကို မီးလောင်သွားတာ။ တခြားအိမ်တွေတော့ မီးမကူးလိုက်ဘူး။ သူ့အိမ်တော့ လုံးဝ မီးလောင်သွားတယ်။ သူ့ကိုတော့ ဒီနေ့ လိုက်ဖမ်းနေကြတယ်”ဟု ၎င်းဒေသခံ အမျိုးသမီးက ပြောသည်။
မိုင်းရှူးမြို့တွင် မူးယစ်ဆေးဝါး သုံးစွဲရင်း နေအိမ်မီးလောင်မှုကြောင့် နေအိမ်နှင့်ပစ္စည်းများ ဆုံးရှုံးခဲ့ရပြီး လူထိခိုက်သေဆုံးမှု မရှိခဲ့ကြောင်း သိရသည်။
စစ်အာဏာသိမ်းပြီးနောက် သျှမ်းပြည်တဝှမ်းတွင် မူးယစ်ဆေးဝါး ရောင်းဝယ်ဖောက်ကားမှု များလာပြီး သုံးစွဲသူများလည်း ပိုပြီးတိုးလာကြောင်း၊ လက်ရှိမှာ မူးယစ်ဆေးဝါး WY ဆေးပြားသည် တစ်လုံးလျှင် ၂၀၀ ကျပ်ခန့်သာ ရှိပြီး ကြက်ဥတစ်လုံးလျှင် ၅၀၀ ကျပ်ထိရှိကာ ကြက်ဥစျေးသည် မူးယစ်ဆေးပြားထက် ပိုများနေသည်။
Leave a Comments