သျှမ်းပြည်တောင်ပိုင်း ၊ ပုံးအင်းဒေသဘက်တွင် မိုးသည်းထန်စွာရွာသွန်းမှုကြောင့် ဆည်ရေလျှံကာ စပါးခင်းပျက်စီးသွားကြောင်း သတင်းရရှျိသည်။
ပြီးခဲ့သည့် ဇွန်လ တွင်လည်း မိုးရက်ဆက်ရွာသွန်းမှုသဖြင့် ရေကြီးခဲ့ပြီး နွေစပါးခင်းများ ရေနစ်မြှုပ်ကာ ယခု ဩဂုတ်လတွင် မိုးအဆက်မပြတ်ရွာသွန်းတာကြောင့် မိုးစပါးများ ထပ်မံရေနစ်မြုပ်ခဲ့သည်။
ရေကြီးရေလျှံနေသည်မှာ ဆယ်ရက်ရှိပြီ ဖြစ်ပြီး ယနေ့အချိန်ထိ ရေမကျသေးသဖြင့် လမ်းသွားလမ်းလာ ခက်ခဲပြီး စားဝတ်နေရေးအတွက် စိုးရိမ်မှုရှိနေကြောင်း သိရသည်။
“ မိုးရွာတာ တစ်လကြိုစောသွားတော့ ရေကြီးတာ။ အခု ကျေးရွာ တစ်အုပ်စုလုံးရေမြှုပ်နေတာ။ စိုက်ထားတဲ့ စပါးခင်းကလည်း အကုန်မြှုပ်ကုန်တာ။ နဂိုကတည်းက လမ်းသွားလာရခက်ခဲပါတယ်ဆို အခုရေကြီးတော့ ပိုဆိုးပေါ့။ “ ဟု ဒေသခံ အမျိုးသားက ဆိုသည်။
ထို့အပြင် စပါးစိုက်ရန်အတွက် ပိုက်ဆံထုတ်ချေးထားသည့် အကြွေးများလည်း ရှိနေပြီး နေထိုင်စားသောက်ရေးအတွက်ပါ ခက်ခဲကာ နောင်နှစ် ပြန်စိုက်စရာ အရင်းမရှိသည့်အပြင် အကြွေးပါ ဆပ်ရမည်ဆိုသောကြောင့် ပိုပြီး ခက်ခဲ နေကြောင်းသိရသည်။
ယခုလို ရေကြီးပြီး စပါးခင်း ပျက်စီးသွားတာကြောင့် မြို့နယ်သုံးမြို့နယ် ဖြစ်သည့် တောင်ကြီး၊ ဟိုပုံးနှင့် ဆီဆိုင်မြို့နယ်မှုးများကို အကြောင်းကြားထားကြောင်းသိရသည်။
“မြို့နယ် သုံးမြို့နယ် ကိုတော့ အကြောင်းကြားထားတယ်။ သူတို့တော့ ရွာဆင်းပြီး လာကြည့် ပြီး ပြန်သွားတယ်။ အစည်းဝေးထိုင်အုံးမယ်ပြောတယ်။ ကျေးရွာတွေရဲ့အခက်ခဲကို ကြည့်ပြီး ဆွေးနွေးကြမယ်ထင်တယ်။”ဟု အဆိုပါ အမျိုးသားက ထပ်လောင်းပြောသည်။
ယခင် ၂၀၂၁တွင်လည်း ရေကြီးရေလျှံမှုကြောင့် စပါးခင်းများပျက်စီးခဲ့ပြီး ယခုနှစ်များတွင် ရေမကျသေးတာကြောင့် စပါးခင်းပျက်စီးမှုဧကကို မသိရှိရသေးကြောင်း ဒေသခံများကပြောသည်။
သျှမ်းပြည်နယ်တောင်ပိုင်းတွင် သဘာဝဘေးဖြစ်သည့် ရေကြီးမှု မြေပြိုမှုများကြောင့်ဒေသခံပြည်သူများစွာ အခက်ခဲ ကြုံနေရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments