သျှမ်းပြည် အရှေ့ပိုင်း မိုင်းယောင်းမြို့နယ်တွင် မိုးရွာသွန်းမှုကြောင့် ရေကြီးရေလျှံမှုများ မကြာခဏ ကြုံတွေ့နေရသည့်အပြင် မြေပြိုခြင်း၊ လမ်းတံတား ပျက်စီးခြင်းများ ကြုံတွေ့နေရကြောင်း သိရသည်။
ယနေ့ (သြဂုတ်လ ၂၂) ရက် နံနက်ပိုင်းတွင် သျှမ်းပြည်အရှေ့ပိုင်း မိုင်းယောင်းမြို့နယ်အတွင်း မိုးရွာသွန်းမှုကြောင့် ခိုကဲ – ပါမန် – ဝမ်ကောင်း – ဝမ်တောင် – ဓာတ်လုံတော် သွားသည့် လမ်းပေါ်ရှိ တံတားတစ်စင်းမှာ တောင်ကျရေ တိုက်စားမှုကြောင့် ပျက်စီးခဲ့ကြောင်း သိရသည်။
ထိုပြိုကျသွားသည့် တံတားသည် ၂၀၀၃-၂၀၀၄ တွင် ပြည်သူ့အင်အားဖြင့် ကိုယ်ထူကိုယ်ထ တည်ဆောက်ထားပြီး အရှည် ၂၅ ပေ၊ အကျယ် ၂၀ ပေ၊ အမြင့် ၇ ပေရှိကာ ခိုကဲနှင့် ပါမန်းကြားတွင် တည်ရှိကြောင်း သိရသည်။
အလားတူ ယမန်နေ့ (သြဂုတ်လ ၂၁ ရက်) ညပိုင်း မိုးရွာသွန်းမှုကြောင့် ယနေ့ (သြဂုတ် ၂၂ ရက်) တွင် တာချီလိတ်မြို့ မြေနိမ့်ပိုင်း ရပ်ကွက်များဖြစ်သည့် မယ်ခေါင် ရပ်ကွက်၊ ဆန်ဆိုင်း (ခ) ရပ်ကွက်၊ တာလော့ ဈေးတန်း အနီးတစ်ဝိုက် ချောင်းဘေးရှိ ရပ်ကွက်တို့တွင် တတိယအကြိမ် ရေကြီးရေလျှံမှုများ ကြုံတွေ့ နေရကြောင်း တာချီလိတ်မြို့ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
“မနေ့က မိုးတွေ အရမ်းရွာတာ။ ဒီနေ့နိုးလာတော့ ကြည့်လိုက်တော့ ရေကအပြည့်ပဲ။ အိမ်ထဲ ဆိုင်ထဲတွေ ရေဝင်ကုန်ပြီ။ ရေကလည်း ခါးလောက်ရှိတယ်။ ခဏခဏ ဒီလိုကို ရေကြီးနေတာ။ ရေကျရင် အဲ့ရွှံ့တွေကို ပြန်ရှင်းရတော့မယ်”ဟု ၎င်းတာချီလိတ်ဒေသခံ အမျိုးသမီးက ပြောသည်။
တာချီလိတ်မြို့ မယ်ဆိုင်ချောင်းရေ မြင့်တက်မှုကြောင့် ရေကြီးရေလျှံမှုများ မကြာဏ ကြုံတွေ့နေရသော်လည်း သက်ဆိုင်ရာ တာဝန်ရှိသူများမှ တာဝန်ယူ ဖြေရှင်းပေးခြင်း မရှိသေးကြောင်း ဒေသခံများက ပြောသည်။
တာချီလိတ်မြို့တွင် ရေများပြန်ကျလျှင် အချို့ရပ်ကွက်ရှိ ပြည်သူအိမ်ရှေ့ ဆိုင်ရှေ့တွင် ရွှံ့နွံနှင့် အမှိုက်များ တင်ကျန်ခဲ့ကာ ရပ်ကွက်နှင့် လမ်းကြားများ၊ လမ်းမကြီးများပေါ်တွင် ကိုယ်ထူကိုယ်ထ ပြန်လည်ရှင်းလင်း နေရကြောင်း သိသည်။
တာချီလိတ်မြို့ အနီးတဝိုက်တွင် ရွှေတူးဖော်ခြင်း၊ သတ္တုတွင်းတူးဖော်မှုများ အလွန်အကျွံ တူးဖော်မှုကြောင့် သစ်တောပြုန်းတီးလာကာ မိုးဆက်တိုက် ရွာသွန်းမှု၊ မိုးသည်းထန်စွာ ရွာသွန်းပါက ရေကြီးရေလျှံမှုများ နှစ်စဉ်နှစ်တိုင်း ဖြစ်ပွားလာသည်။
ယခုနောက်ပိုင်း သျှမ်းပြည်အရှေ့ပိုင်း တာချီလိတ်မြို့နယ်အတွင်း သယံဇာတ ဓာတ်သတ္တု တူးဖော်မှုများကို တွင်တွင်ကျယ်ကျယ် ပြုလုပ်နေကြသဖြင့် သဘာဝပတ်ဝန်းကျင် ယခင်ကထက် ပိုမိုပျက်စီးကာ မိုးရာသီတွင် ရေကြီးရေလျှံမှု ဖြစ်ပြီး၊ နွေရာသီတွင် ရေခမ်းခြောက်မှုကို ပြည်သူများ ကြုံတွေ့လာရသည်။
Leave a Comments