သျှမ်းပြည်တောင်ပိုင်း၊ ပုံးအင်းဒေသတွင်း ရေများထပ်တက်လာပြီး လမ်းများပါ ပျက်စီးသွားသောကြောင့် ဒေသခံများ အခက်အခဲများစွာကြုံတွေ့နေရကြောင်း သိရသည်။

ယမန်နေ့ (ဩဂုတ်လ ၂၁ ရက်) တွင် ပုံးအင်းဒေသအတွင်း ရေများထပ်တက်လာပြီး ကားလမ်းများပါပြိုကျပျက်စီးနေကြောင်း ရေထပ်တက်လာမှုကြောင့် နောင်စန့်ကျေးရွာချောင်းကူးတံတားကြီး အောက်ဖက်မှလည်းသွား၍မရတော့သဖြင့် ကုန်းလမ်းအပြင် ရေလမ်းပါ ပိတ်ဆို့မှုများရှိလာကြောင်း ဒေသခံတစ်ဦးက သျှမ်းသံတော်ဆင့် သို့ ပြောသည်။

“လမ်းပန်းဆက်သွယ်ရေးကတော့ ခက်ခဲနေပြီး ကားနဲ့လည်းမရ လှေနဲ့လည်း သွားမရဖြစ်နေတယ်၊ ရေလမ်းကလည်း တံတားအောက်ဖြတ်မရတော့ဘူး၊ တောင်ကြီး-ဆီဆိုင်ကားလမ်းနဲ့ ဆက်သွယ်ထားတဲ့ လမ်းကလည်း ပျက်သွားလို့ ရွာကလူတွေကတော့ ဆိုင်ကယ်ဖြတ်လို့ရအောင်တော့ ဝါးနဲ့ဖြစ်သလိုလုပ်ထားရပါတယ်” ဟု ၎င်းကပြောသည်။

လက်ရှိတွင် ရေလွှမ်းမိုးမှုကြောင့် စပါးခင်းများပါ ရေအောက်ရောက်သွားပြီး စပါးစိုက်တောင်သူများလည်း အခက်အခဲများစွာတွေ့လာကြောင်း တောင်သူတစ်ဦးကပြောသည်။

“တစ်နှစ်လုံး ရင်းလာခဲ့ရပြီးမှ သိမ်းယူခါနီးကျမှ ပျက်စီးသွားတော့ စားဖို့တောင်ခက်ခဲလာပြီ” ဟု ၎င်းကပြောသည်။

ထို့အပြင် ရေမြှုပ်နေသည့်အတွက် ကလေးများ ကျောင်းသွားရန် ခက်ခဲသည့်အတွက် ကျောင်းများလည်း ပိတ်ထားရကြောင်း သိရသည်။

ဩဂုတ်လ ၁၄ ရက်မှစတင်၍ မိုးသည်းထန်စွာရွာသွန်းခဲ့ပြီးနောက် ကုန်းကျိုင်း၊ အသုံးတော်၊ နားဟီး၊ ကက္ကူ၊ နောင်မွန်၊ ပုံးအင်း၊ ဘန်းယဉ် ကျေးရွာအုပ်စုများအတွင်း ကျေးရွာပေါင်း ၁၉ ရွာခန့် ရေနှစ်မြုပ်နေကြောင်းသိရသည်။

ပုံးအင်းဒေသတွင် နှစ်စဉ်နှစ်တိုင်း မိုးရွာသွန်းခြင်းကြောင့် ရေကြီးရေလျှံမှု ဖြစ်ပွားလေ့ရှိသော်လည်း ယခုနှစ်တွင် ယခင်နှစ်များထက် ၂ လပိုစော၍ ရာသီဥတုဖောက်ပြန်မှုကြောင့် မိုးရွာသွန်းရာ ရေကြီးရေလျှံ ဖြစ်ပွားနေခြင်း ဖြစ်သည်။

အလုပ်သင် သတင်းထောက် ယူဂျင်း ရေးသားသည်။