သျှမ်းပြည် နောင်ချိုမြို့နယ်သို့ အင်အားဖြည့်တင်းနေသည့် စစ်ကောင်စီတပ်နှင့် တအာင်း (ပလောင်) အမျိုးသားလွတ်မြောက်ရေးတပ်မတော် TNLA ၊ PDF ပူးပေါင်းတပ်ဖွဲ့တို့ နှစ်ဘက်တိုက်ပွဲကြား အရပ်သားနေအိမ် ထိခိုက်ပျက်စီးခဲ့ကြောင်း စုံစမ်းသိရသည်။
ယမန်နေ့ (ဩဂုတ်လ ၂၁ ရက်) နံနက်ပိုင်းတွင် နောင်ချိုမြို့နယ် တောင်ရှည်ကျေးရွာအုပ်စုသို့ ရောက်ရှိလာသည့် အင်အားဖြည့် စစ်ကောင်စီယာဉ်တန်းကို TNLA နှင့် PDF ပူးပေါင်းတပ်ဖွဲ့တို့က ကြားဖြတ်တိုက်ခိုက်လျက် ရှိရာ တောင်းခမ်းကျေးရွာရှိ အမြောက်စခန်းကွပ်ကဲမှုဌာနချုပ် (မစခ-၉၀၂) မှ ပစ်ကူလာသည့် လက်နက်ကြီးကျည် ကျရောက်ပေါက်ကွဲမှုကြောင့် အရပ်သားနေအိမ် ထိခိုက်ပျက်စီးမှုရှိကြောင်း ဒေသခံများက ပြောသည်။
“စစ်ကားတွေက ကံကြီးကနေ ကျော်ပြီး တောင်ရှည် တောင်းခမ်းအထိ ရောက်သွားပြီ၊ တံတားကြီးကိုလည်း ကျော်သွားပြီ။ ယာဉ်တန်းကို TNLA နဲ့ ဓနုတပ်၊ PDF ပူးပေါင်းတပ်က ဝိုင်းတိုက်ကြတာ။ မပြီးသေးဘူး နေ့တိုင်း တိုက်ပွဲဖြစ်နေကြတာ၊ ဖုန်းလိုင်းကလည်း ဖြတ်ထားတာ။ မနေ့ကတော့ နားရှိုးဘက် လက်နက်ကြီးပစ်လို့ နေအိမ်ထိတယ်”ဟု နောင်ချိုမြို့နယ် ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
နောင်ချိုမြို့နယ် တောင်းခမ်းနှင့် သရက်ချိုရွာတို့တွင် ရပ်စောက်မြို့ ကျောက်ဂူမှ အင်အားဖြည့်တင်းလာသည့် စစ်ကောင်စီတပ်နှင့် TNLA ပူးပေါင်းတပ်တို့ ၂ ရက်ဆက် တိုက်ပွဲပြင်းထန်ခဲ့ကြောင်း ဒေသခံများထံမှ သိရသည်။
အလားတူ တောင်းခမ်းရွာအခြေစိုက် အမြောက်တပ် (မစခ-၉၀၂) တိုက်ပွဲအတွင်း စစ်ကောင်စီတပ်မှ ဂျက်ဖိုက်တာဖြင့် တစ်ကြိမ် လာရောက်ဗုံးကြဲ တိုက်ခိုက်ခဲ့ကြောင်း TNLA သတင်းနှင့် ပြန်ကြားရေးဌာနက ထုတ်ပြန်ထားသည်။
လက်ရှိတွင် နောင်ချိုမြို့ပေါ်တွင် တိုက်ပွဲများ ငြိမ်သက်နေသော်လည်း မြို့တောင်ဘက်ရှိ ရေဖြူ၊ ကံကြီး၊ ရွှေမုဋ္ဌော၊ တောင်းခမ်း၊ မဲပုတ်၊ နောင်ချိုလေး ကျေးရွာဘက်သို့ ဇူလိုင်လကုန်ပိုင်းက စတင်၍ TNLA ပူးပေါင်းတပ်များနှင့် စစ်ကောင်စီတပ်အကြား တိုက်ပွဲဖြစ်ပွားခဲ့ကာ စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်မှုများ ပြုလုပ်လျက် ရှိသည်။
“အခုက စစ်ရှောင်တွေ မပြန်ရဲဘူးဆိုတာ လေယာဉ်ပျံကြောက်လို့၊ ၁၅ ရက်နေ့က ယာယီဈေးထဲ လေယာဉ်နဲ့ ဗုံး ၂ လုံး လာကြဲတယ် မကွဲဘူး။ နောက်တစ်လုံး ထပ်ချတာ အဲ့တာက လေထဲမှာ ကွဲသွားတယ် လူတော့မထိဘူး။ နောက်ထပ်က သပြေရေဘက်က ဘုန်းကြီးကျောင်းဘက် ထင်းရှူးတောထဲ ကျတယ်”ဟု ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
နောင်ချိုမြို့နယ်အတွင်းရှိ စစ်ကောင်စီလက်အောက်ခံ ခလရ-(၁၁၄၊ ၁၁၅) တို့ကို “၁၀၂၇ စစ်ဆင်ရေး” ဒုတိယပိုင်း အစကတည်းက TNLA ပူးပေါင်းတပ်များ တိုက်ခိုက်သိမ်းပိုက်နိုင်ခဲ့ပြီး ဇူလိုင်လအတွင်းက ဒုံးတပ်ရင်း (၆၀၆) ကို သိမ်းပိုက်နိုင်ပြီးနောက် နောင်ချိုမြို့ပေါ်ကို အလုံးစုံ ထိန်းချုပ်ထားသည်။
လက်ရှိတွင် နောင်ချိုမြို့တောင်ဘက်ရှိ တောင်းခမ်းရွာအခြေစိုက် အမြောက်စခန်းကွပ်ကဲမှု ဌာနချုပ် (မစခ-၉၀၂) ကို TNLA ပူးပေါင်းတပ်များ ဆက်လက်ထိုးစစ်ဆင် တိုက်ခိုက်လျက်ရှိရာ ရပ်စောက်မြို့နယ်ရှိ အင်တောမြို့နှင့် ကျောက်ဂူကျေးရွာအုပ်စုဘက်အထိ တိုက်ပွဲဖြစ်ပွားလာနိုင်ကြောင်း စစ်ရေးသတင်းရင်းမြစ်က ပြောသည်။
Leave a Comments