သျှမ်းပြည် ‘ဝ’ဒေသအတွင်း အွန်လိုင်းကျားဖြန့် ငွေလိမ်လုပ်ငန်း လုပ်ကိုင်သူ တရုတ်နိုင်ငံသား ၃၀၀ ကျော်ကို ‘ဝ’ပြည် သွေးစည်းညီညွတ်ရေးတပ်မတော် UWSA က ဖမ်းဆီးပြီး တရုတ်ရဲတပ်ဖွဲ့ထံ လွှဲပြောင်းပေးအပ်လိုက်ကြောင်း သတင်းသိရသည်။

ဩဂုတ်လ (၁၆) ရက်တွင် ‘ဝ’တပ်ဖွဲ့ UWSA ထိန်းချုပ်ဒေသ ပန်ဆန်းမြို့ရှိ တရားစီရင်ရေးဌာန လက်အောက်ခံ ‘ဝ’ရဲတပ်ဖွဲ့မှ ဖမ်းဆီးရမိသော အွန်လိုင်းကျားဖြန့်လုပ်ကိုင်သူ တရုတ်နိုင်ငံသား (၃၀၈) ဦးကို တရုတ်နယ်စပ်ဂိတ်မှတဆင့် တရုတ်ရဲတပ်ဖွဲ့ထံ လွှဲပြောင်းပေးလိုက်ကြောင်း ‘ဝ’တပ်ဖွဲ့မှ ဩဂုတ် (၁၇) ရက်တွင် သတင်းထုတ်ပြန်သည်။

‘ဝ’ဒေသတွင် ယခုတစ်ကြိမ် ဖမ်းဆီးမှုသည် ၂၀၂၄ ခုနှစ်အတွင်း အွန်လိုင်းကျားဖြန့် လုပ်ကိုင်သူများကို ဖမ်းဆီးရမိသည့် အရေအတွက် အများဆုံးဖြစ်ကြောင်း ဖော်ပြထားပြီး ၎င်းတို့၏ ကွန်ပျူတာနှင့် ဆက်စပ်ပစ္စည်းများ အားလုံးကို တရုတ်ရဲတပ်ဖွဲ့ထံ လွှဲပြောင်းပေးအပ်ခဲ့ကြောင်း သိရသည်။

အလားတူ ဩဂုတ်လ (၁၇) ရက်နှင့် (၁၉) ရက်ကလည်း အွန်လိုင်းကျားဖြန့်ခေါင်းဆောင် တရုတ်နိုင်ငံသား နောက်ထပ် (၉) ဦးကို ‘ဝ’ရဲတပ်ဖွဲ့က တရုတ်ရဲထံ ထပ်မံလွှဲပြောင်းပေးခဲ့ပြီး ၎င်းတို့အထဲမှ (၃) ဦးသည် ကိုးကန့်ဒေသရှိ ကျားဖြန့်လုပ်ကိုင်သူများနှင့် ပတ်သက်နေသည်ဟု ဆိုသည်။

ထို့အပြင် အွန်လိုင်းကျားဖြန့် လိမ်လည်လုပ်ကိုင်သူများကို ‘ဝ’တပ်ဖွဲ့ UWSA ၏ တရားစီရင်ရေးဌာနသို့ သတင်းပေး တိုင်ကြားပါက ဆုချီးမြှင့်မည်ဟုလည်း ထုတ်ပြန်ထားသည်။

ပြီးခဲ့သည့် ဇူလိုင်လ နောက်ဆုံးပတ်တွင် တန့်ယန်းမြို့နယ်သို့ တရုတ်ရဲဝတ်စုံ ဝတ်ဆင်ထားသည့် လက်နက်ကိုင်တပ်ဖွဲ့က တရုတ်အလိုရှိနေသည့် ‘ဝ’တပ်ဖွဲ့ UWSA ၏ ဆောက်လုပ်ရေးဌာနမှ ပေါက်အိုက်ပန်း (Chen Yanban) နှင့် မိုင်းလင်းခရိုင်မှူး အိုက်ဟော့ (Sheng Yankui) တို့ကို ထပ်မံလာရောက် ရှာဖွေခဲ့သည်။

၎င်းနောက်တွင် ‘ဝ’တပ်ဖွဲ့က ၎င်းဒေသအတွင်း ကျားဖြန့်လုပ်ကိုင်သူများကို ထပ်မံဖမ်းဆီးကာ တရုတ်ရဲတပ်ဖွဲ့ထံ လွှဲပြောင်းခြင်း ဖြစ်နိုင်ကြောင်း သိရသည်။

ညီနောင်မဟာမိတ် (၃) ဖွဲ့တို့သည် တရုတ်-မြန်မာနယ်စပ် တလျှောက်ရှိ အွန်လိုင်းကျားဖြန့် လုပ်ငန်းများကို တိုက်ဖျက်မည်ဟု ကြွေးကြော်ပြီး သျှမ်းပြည်မြောက်ပိုင်းတွင် “၁၀၂၇ စစ်ဆင်ရေး” စတင်ခဲ့သော်လည်း မူဆယ်မြို့တွင် ကျားဖြန့်လုပ်ကိုင်သူများ နေရာပြောင်းရွှေ့ လုပ်ကိုင်လာကြောင်း ဒေသခံများက ပြောသည်။

လားရှိုးအခြေစိုက် အရှေ့မြောက်ပိုင်း တိုင်းစစ်ဌာနချုပ်ကို ကိုးကန့်တပ်ဖွဲ့ MNDAA မသိမ်းပိုက်မီ ဇူလိုင်လ (၂၇) ရက်မှ စတင်ပြီး စစ်ကောင်စီ၏ သဘောတူညီမှုဖြင့် ‘ဝ’တပ်ဖွဲ့ UWSA လုံခြုံရေးတပ်ဖွဲ့ဝင် အင်အားအများအပြားက လားရှိုးမြို့ပေါ် ဝင်ရောက်တပ်စွဲထားသည်။