သျှမ်းပြည်အရှေ့ပိုင်း မိုင်းတုံမြို့နယ်တွင် မိုးရွာသွန်းမှုကြောင့် တစ်ပတ်ကျော်ကြာ ရေကြီးရေလျှံ ဖြစ်နေပြီး ကောက်ပဲသီးနှံစိုက်ခင်းများ ပျက်စီးဆုံးရှုံးမှု ကြုံနေရကြောင်း စုံစမ်းသိရသည်။
ပြီးခဲ့သည့် (သြဂုတ်လ ၁၄ ရက်) မှစတင်၍ မိုင်းတုံမြို့နယ်တွင် နေ့စဉ်နီးပါး မိုးအဆက်မပြတ် ရွာသွန်းမှုကြောင့် ၁ ပတ်ကျော်ကြာ ရေကြီးရေလျှံမှု ဖြစ်ပွားကာ မိုင်းတုံမြို့နှင့် ဝမ်မိုင်ရွာတလျှောက်ရှိ စပါးခင်းနှင့် ဟင်းသီးဟင်းရွက် စိုက်ပျိုးထားသော လယ်ကွင်းများ အားလုံးနီးပါး ပျက်စီး ဆုံးရှုံးနေကြောင်း အသက် ၄၀ ဝန်းကျင် ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
“မိုးတွေက တောက်လျှောက်ရွာနေတာ၊ ရေကိုမကျဘူး။ လယ်ထဲတွေလည်း ရေတွေက ပြည့်နေတာပဲ။ မိုင်းတုံမြို့ကနေ ဝမ်မိုင်ရွာတလျှောက်မှာရှိတဲ့ လယ်ကွင်းတွေ အားလုံးလိုလို ရေတွေမြုပ်နေတာ။ ရေကြီးတာက စပါးပင်တောင် မမြင်ရတော့ဘူး။ ပြန်လည်း မကောင်းနိုင်တော့ဘူး၊ ရက်လည်း ကြာနေပြီဆိုတော့”ဟု အသက် ၄၀ ဝန်းကျင် ဒေသခံအမျိုးသမီးတစ်ဦးက ပြောသည်။
မိုင်းတုံမြို့နှင့် ဝမ်မိုင်ရွာတလျှောက်တွင် စပါးစိုက်ပျိုးထားသော လယ်ဧကများစွာ ရှိနေပြီး ထိုရေကြီးရေလျှံမှုများကြောင့် ပျက်စီးဆုံးရှုံးမှုများလည်း မသိနိုင်သေးကြောင်း ၎င်းက ဆက်ပြောသည်။
ပြီးခဲ့သည့် သြဂုတ်လ ၁၅ ရက်ကလည်း မိုင်းတုံမြို့၌ မိုးသည်းထန်စွာ ရွာသွန်းမှုကြောင့် မိုင်းတုံ-တာဆန်းလမ်း ပြတ်တောက်သွားခဲ့ပြီး ပြန်လည်ပြင်ဆင်ထားကြောင်း သိရသည်။
သျှမ်းပြည်အရှေ့ပိုင်းတွင် သစ်တောများ အလွန်အကျွံ ခုတ်ယူခြင်း၊ သတ္တုများ အလွန်အကျွံ တူးဖော်ခြင်းနှင့် တောတောင်တွင် သစ်ပင်များမရှိတော့သဖြင့် မိုးရွာသွန်းသည်အခါ မြေကြီးမှ ရေစုပ်ယူမှု မရှိတော့သဖြင့် ယခုကဲ့သို့ ရေကြီးရေလျှံမှု ဖြစ်ပွားလာရခြင်းဖြစ်ကြောင်း သဘာဝပတ်ဝန်းကျင် စောင့်ကြည့် လေ့လာသူများက ဆိုသည်။
Leave a Comments