သျှမ်းပြည်နယ်တောင်ပိုင်း၊ ဟိုပုံးမြို့နယ်ရှိ သနပ်ဖက်စိုက်သည့် တောင်သူများသည် ကုန်ဈေးနူန်းအဆမတန်မြင့်တက်လာခြင်းကြောင့် အမြတ်မရသည့် အပြင် အရှုံးဖြင့်ရင်ဆိုင်နေရကြောင်း သတင်းရရှိသည်။
ပြီးခဲ့သည့် ဇူလိုင်လ အစတွင် သနပ်ဖက်ရာသီအစ ဖြစ်သော်လည်း သနပ်ဖက်ဈေးကွက် မရှိသည့်အတွက် တောင်သူများ အရှုံးဖြင့် ရင်ဆိုင်ခဲ့ရပြီး ယခုကာလတွင်လည်း ဈေးကောင်းရရှိနေသော်လည်း ကုန်ဈေးနူန်းအဆမတန်မြင့်တက်လာတာကြောင့် တောင်သူများထပ်မံ၍ အရှုံးဖြင့်ရင်ဆိုင်နေကြရကြောင်းသိရသည်။
“ အခုကဈေးကောင်း နေတယ်။ ဒါပေမဲ့လည်း ကုန်ဈေးနူန်းက အရမ်းမြင့်လာတော့ ရင်းထားရတာတွေ မကာမိဘူး။ ရှုံးတယ်လို့ပဲပြောရမှာပဲ။ လုပ်အားခတွေ သနပ်ဖက်လုပ်တဲ့အခါ သုံးတဲ့ ထင်းခ အဲဒါတွေ နုတ်လိုက်ရင် ဘာမှကိုမကျန်တာ။” ဟု ဒေသခံတစ်ဦးကဆိုသည်။
သနပ်ဖက်မှာ နှစ်မျိုးနှစ်စားခွဲခြားထားပြီး သနပ်ဖက် အရွက်ကြီးဆိုလျှင် တစ်ပိဿလျှင် ကျပ်ငွေ( တစ်သောင်းခွဲ) အထိ ရရှိနေပြီး အသေးဆိုလျှင် ကျပ်ငွေ( ကိုးထောင်)မျှသာ ရရှိနေကြောင်းသိရသည်။
အလားတူ ဘော်ဆိုင်း ကျေးရွာနှင့် ပင်းတယဒေသဘက်တွင်လည်း ကုန်ဈေးနူန်းကြောင့် သနပ်ဖက်စိုက်တောင်သူများ စားဝတ်နေရေးခက်ခဲနေကြောင်း သိရသည်။
“ အခုကျနော်တို့ဖက်မှာလည်း ဈေးနူန်းတွေ မြင့်နေတာ သနပ်ဖက်ကို ပိုအားကိုးလုပ်ရတော့ အဆင်မပြေဘူးပေါ့လေ။ ကုန်ကျစရိတ်နဲ့ ပြန်ရတာနဲ့က အတူတူလောက်ပဲ ကျတယ်။ စားဖို့တောင် မကျန်ဘူး။”ဟု ဘော်ဆိုင်းဒေသခံတစ်ဦးက ဆိုသည်။
ဟိုပုံးဒေသ စိုက်ပျိုးသည့် သနပ်ဖက်စိုက်တောင်သူများသည် တောင်ကြီးဘက်သို့ သနပ်ဖက်ကို အဓိကတင်ပို့ပြီး ပင်းတယနှင့်ဘော်ဆိုင်းဒေသဘက်မှ သနပ်ဖက်သည် ပဲခူးတိုင်းဒေသကြီး ဝေါမြို့ ရှိ ဆေးလိပ်ခုံများရှိရာကို အဓိကတင်ပို့ကြသည်။
သနပ်ဖက်ကိုသျှမ်းပြည်နယ်တောင်ပိုင်းရှိ ပအိုဝ်းတိုင်းရင်းသား၊ ဓနုတိုင်းရင်းသားများက အများဆုံးစိုက်ပျိုး လျက်ရှိကြောင်းသိရသည်။
အလုပ်သင် သတင်းထောက် နန်းလရောင် ရေးသားည်။
Leave a Comments