မြန်မာ-ထိုင်းနယ်စပ် တာချီလိတ်မြို့တွင် မယ်ဆိုင်ချောင်းရေ ပြန်ကျပြီးနောက် နေအိမ်အတွင်း ရွံ့နွံများ တင်ကျန်ခဲ့ရာ ပြည်သူများ ကိုယ်ထူကိုယ်ထ ပြန်လည်ရှင်းလင်းနေရကြောင်း သတင်းရရှိသည်။
သျှမ်းပြည် အရှေ့ပိုင်း တာချီလိတ်မြို့ ယမန်နေ့ (သြဂုတ် ၁၉ ရက်) ညပိုင်းတွင် မယ်ဆိုင်ချောင်းရေ ပြန်ကျကာ အချို့ရပ်ကွက်ရှိ ပြည်သူအိမ်ရှေ့ ဆိုင်ရှေ့တွင် ရွံ့နွံနှင့် အမှိုက်များ တင်ကျန်ခဲ့ကာ ရပ်ကွက်နှင့် လမ်းကြားများတွင် ကိုယ်ထူကိုယ်ထ ပြန်လည်ရှင်းလင်းနေရကြောင်း တာချီလိတ်မြို့ ဒေသခံအမျိုးသားတစ်ဦးက ပြောသည်။
“ရေတက်ပြီး ပြန်ကျရင် ရွှံ့နွံတွေက ကျန်ခဲ့ရော၊ ကိုယ်ဘာသာကိုယ် ရှင်းရတယ်။ ဒီနေ့ ပြီးသွားလို့ နောက်ရက်မိုးကြီးလို့ ရေထပ်တက်ရင်လည်း ပြန်လုပ်နေရတာ။ အမှိုက်တွေလည်း ပါတယ်။ ဒီနားတဝိုက်က ရပ်ကွက်တွေမှာတော့ စည်ပင်က လာရှင်းပေးတာမရှိဘူး ကိုယ့်ဟာကိုယ်ပဲ လုပ်နေကြတာ” ဟု ၎င်းဒေသခံက သျှမ်းသံတော်ဆင့်ကို ပြောသည်။
တာချီလိတ်မြို့တွင် မိုးရွာသွန်းပြီး မယ်ဆိုင်ချောင်းရေ မြင့်တက်မှုကြောင့် မြေနိမ့်ပိုင်း ရပ်ကွက်များဖြစ်သည့် မယ်ခေါင် ရပ်ကွက်၊ ဆန်ဆိုင်း (ခ) ရပ်ကွက်၊ တာလော့ ဈေးတန်း အနီးတစ်ဝိုက် ချောင်းဘေးရှိ ရပ်ကွက် တို့တွင် မကြာခဏ ဆိုသလို ရေကြီးရေလျှံမှုဖြစ်ကြောင်း ဒေသခံများကပြောသည်။
တာချီလိတ်မြို့ အနီးတဝိုက်တွင် ရွှေတူးဖော်ခြင်း၊ သတ္တုတွင်းတူးဖော်မှုများ အလွန်အကျွံ တူးဖော်မှုကြောင့် သစ်တောပြုန်းတီးလာကာ မိုးဆက်တိုက် ရွာသွန်းမှု၊ မိုးသည်းထန်စွာ ရွာသွန်းပါက ရေကြီးရေလျှံမှုများ နှစ်စဉ်နှစ်တိုင်း ဖြစ်ပွားလာသည်။
ယခုနောက်ပိုင်း သျှမ်းပြည်အရှေ့ပိုင်း တာချီလိတ်မြို့နယ်အတွင်း သယံဇာတ ဓာတ်သတ္တု တူးဖော်မှုများကို တွင်တွင်ကျယ်ကျယ် ပြုလုပ်နေကြသဖြင့် သဘာဝပတ်ဝန်းကျင် ယခင်ကထက် ပိုမိုပျက်စီးကာ မိုးရာသီတွင် ရေကြီးရေလျှံမှု ဖြစ်ပြီး၊ နွေရာသီတွင် ရေခမ်းခြောက်မှုကို ပြည်သူများ ကြုံတွေ့လာရသည်။
Leave a Comments