သျှမ်းပြည်တောင်ပိုင်း အင်းလေးမြောက်ဘက် ကျေးရွာအချို့တွင် ပအိုဝ်းပြည်သူ့စစ် (PNO)က ကျေးရွာရပ်ကွက်ထဲ ဝင်ရောက်ကာ KPay ဖြင့် ငွေအဝင်အထွက် ရှိသူများကို စစ်ဆေးမေးမြန်းမှု ပြုလုပ်နေကြောင်း သတင်းရရှိသည်။

ပြီးခဲ့သည့် ဩဂုတ်လ ပထမပတ်ကစပြီး PNO မှ အစစ်အဆေး ပိုမို တင်းကျပ်လာကာ လမ်းသွားလမ်းလာနှင့် ဒေသခံများကို နေအိမ်အထိ ဝင်ရောက်စစ်ဆေးမှု ပြုလုပ်နေကာ KPay အဝင်အထွက်ရှိသူများကို ပိုမိုစစ်ဆေးကာ ဖုန်းများကို အဓိကထား စစ်ဆေးနေတာကြောင့် ငွေညှစ်မှုတွေ လုပ်ဆောင်နေကြောင်း သိရသည်။

“KPay ကနေ ငွေ သုံးထောင်ပဲ လွှဲထားတာကို ဝင်စစ်ပြီး ရစ်တယ်။ ထောက်ပို့တွေ လုပ်နေလား ဘာလား ဆိုပြီး မေးတယ်။ ပြီးတော့ လမ်းပေါ်ဖြတ်ရင်လည်း ဒီနေရာက မစစ်ဘူးဆိုပြီး သွားလိုက်ရင် နေ့လည်လောက်ဆို ဖုန်းကအစ စစ်ပြီပဲ။ အခြေအနေက ခန့်မှန်းမရဘူး။ အရင်လို သွားလာလို့ မရတော့ဘူး” ဟု ဒေသခံအမျိုးသမီး တစ်ဦးက သျှမ်းသံတော်ဆင့်ကို ပြောသည်။

အင်းလေးဒေသအတွင်း စက်သုံးဆီ ပြတ်လပ်နေသည့်အပြင် ရေကြီးရေလျှံမှုများ ဖြစ်ပေါ်နေခြင်းကြောင့် စိုက်ခင်းအများအပြား ပျက်စီးကာ သွားလာရေး ခက်ခဲနေပြီး စားဝတ်နေရေးအတွက်ပါ စိုးရိမ်နေကြရကြောင်း ဒေသခံများထံမှ သိရသည်။

“လောင်စာဆီ မလုံလောက်တာနဲ့ ပတ်သက်ပြီးလည်း စားဝတ်နေရေးအတွက် စိုးရိမ်နေရပြီ။ အစစ်အဆေး တင်းကျပ်တာကြောင့်လည်း စိတ်ညစ်ရတယ်။ စိတ်ဓာတ်တွေပါ ကျနေပြီ။ ဒီစစ်ကြီး ဘယ်တော့ ပြီးမှာလဲ မသိဘူး။ ဘာမှ ရစရာ မျှော်လင့်စရာလဲ မရှိတော့ဘူး” ဟု အဆိုပါ ဒေသခံ အမျိုးသမီးက ထပ်လောင်းပြောသည်။

ထို့အပြင် စစ်ကောင်စီတပ်၏ စစ်မှုထမ်းဆင့်ခေါ်ခြင်းလည်း အမှတ်စဉ် (၅) တွင် အမျိုးသမီးများကိုပါ စတင် ဆင့်ခေါ်တော့မည် ဆိုသည့် သတင်းကြောင့် အမျိုးသမီးများလည်း စိုးရိမ်မှုများစွာ ရင်ဆိုင်နေရသည်။

လက်ရှိ အင်းလေးတွင် ခရီးသွားများနည်းပါးကာ စက်သုံးဆီများ ပြတ်လပ်နေခြင်းကြောင့် စက်လှေသမားများနှင့် ဈေးသည်များ အလုပ်လက်မဲ့ဖြစ်နေကြပြီး ဝင်ငွေမရှိတာကြောင့် ရေရှည်ရပ်တည်ရန် ခက်ခဲနေကြသည်။

အလုပ်သင် သတင်းထောက် နန်းလရောင် ရေးသားသည်။