သျှမ်းပြည် အရှေ့ပိုင်း ကျိုင်းတုံမြို့တွင် အဆောင်နေထိုင်ပြီး ပညာလာသင်ကြားသည့် ကျောင်းသူ၊ ကျောင်းသားများကို နေရပ်သို့ပြန်ခိုင်းနေသည့်ဟု ကောလဟာလ သတင်းထွက်ပေါ်နေသည်။
သြဂုတ် ၁၅ ရက်တွင် စစ်ကောင်စီတပ်ဖွဲ့နှင့် ၎င်းလက်အောက်ခံအဖွဲ့အစည်းများက အစည်းအဝေး ပြုလုပ်နေကြပြီး ကျိုင်းတုံမြို့သို့ ပညာလာရောက်သင်ကြားနေသူများကို မိမိနေရပ်ပြန်ခိုင်းနေကြောင်း သတင်းထွက်ပေါ်နေသည်ဟု ကျိုင်းတုံ တက္ကသိုလ်အနီးနေထိုင်သူ တစ်ဦးက သျှမ်းသံတော်ဆင့်ကိုပြောသည်။
“ဘယ်ကနေ သတင်းထွက်ပေါ်နေလဲမသိဘူး။ အဆောင်နေတဲ့ကလေးတွေ အိမ်ပြန်ရမယ်ဆိုပြီး သတင်းတွေကြားတယ်။ ကျမတို့လည်း သေချာမသိဘူး။ အခုက သူတို့တွေ ပြန်ရမှာလား မပြန်ရဘူးလားမသိဘူး” ဟု ၎င်းကပြောသည်။
ထို့အပြင် အချို့ တက္ကသိုလ်ကျောင်းတွင် စားမေးပွဲ ဖြေဆိုမည့် နေ့ရက်ကို ရွှေ့ပြောင်းထားရကြောင်းလည်း ပြောဆိုနေကြသည်။
” တက္ကသိုလ်ကျောင်းတော့မသိဘူး။ အခြေခံကျောင်းက ကလေးတွေကတော့ ဇူလိုင် လက အစမ်းစာမေးပွဲဖြေထားတယ်။ ပညာရေးမှူးတွေကို စောင့်ကြည့်ရမှာပါ။ ကျနော်ကတော့ ဘာမှမကြားသေးဘူး” ဟု ကျိုင်းတုံမှ မိခင်တစ်ဦးက သျှမ်းသံတော်ဆင့်ကိုပြောသည်။
လက်ရှိ ကျိုင်းတုံမြို့တွင် သတင်းမျိုးစုံထွက်ပေါ်နေသဖြင့် အခြားဒေသမှ လာရောက်ပြီး အဆောင်နေသည့် ကျောင်းသားမိဘများက စိုးရိမ်မှုရှိနေပြီး၊ သား၊သမီးများကို နေရပ်သို့ ပြန်ခေါ်နေကြောင်း အသက် ၄၀အရွယ်ရှိ အမျိုးသမီး တစ်ဦးက ထပ်လောင်းပြောသည်။
“ကျိုင်းတုံမှာက စစ်ကောင်စီတွေနဲ့ ဝ တွေ ဆွေးနွေတယ်ဆိုတဲ့ သတင်း ကြားတယ်။ကျိုင်းတုံမှာ ကျောင်းတက် နေတဲ့ ကလေးကိုလည်း သူများက အိမ်တွေပြန်ခိုင်းနေတယ်ကြားတော့ စိတ်ပူပြီးတော့ ပြန်တော့ ပြန်လာခိုင်း နေတယ်။ တချို့တွေလည်း ဒီနေ့ပြန်လာကြတယ်” အထက်ပါ အမျိုးသမီးက ဆိုသည်။
ကျိုင်းတုံမြို့သည် စစ်အာဏာရှင် နှင့် တိုက်ပွဲတစုံတရာမရှိသည့် အရပ်ဒေသဖြစ်သည်။
Leave a Comments