သျှမ်းပြည် သီပေါမြို့ကို စစ်ကောင်စီတပ်မှ လေကြောင်းဖြင့် အပြင်းအထန် ဗုံးကြဲတိုက်ခိုက်ခဲ့ခြင်းကြောင့် နေအိမ်အတွင်း ပိတ်မိနေသည့် အရပ်သားပြည်သူများ ဗုံးဆံထိမှန် သေဆုံးခဲ့ကြောင်း စုံစမ်းသိရသည်။
ယမန်နေ့ (ဩဂုတ်လ ၁၅ ရက်)တွင် သီပေါမြို့ စစ်ကောင်စီ ခြေလျင်တပ်ရင်း ခလရ-(၂၃) ကို တအာင်း(ပလောင်) အမျိုးသားလွတ်မြောက်ရေးတပ်မတော် TNLA နှင့် ပူးပေါင်းတပ်ဖွဲ့က ထိုးစစ်ဆင်တိုက်ခိုက်ခဲ့သည်။
စစ်ကောင်စီတပ်ဘက်မှ လေကြောင်းပစ်ကူဖြင့် အပြင်းအထန် ဗုံးကြဲတိုက်ခိုက်ခဲ့ရာ မြို့ဟောင်းနှင့် တုံဆင့်ဘက်ရှိ နေအိမ်အတွင်း ပိတ်မိနေသည့် အရပ်သား ပြည်သူများ ဗုံးဆံထိမှန် သေဆုံးခဲ့ကြောင်း ဒေသခံများက ပြောသည်။
“လေယာဉ်နဲ့ နေ့ခင်းတစ်ပိုင်းလုံး ပြီးတော့ တစ်ညလုံးပဲ ဗုံးလာကြဲတာ၊ လက်နက်ကြီးကော သေနတ်သံကော အဆက်မပြတ် ကြားရတယ်။ မနေ့က မြို့ဟောင်းထဲ လူထိခိုက်တာ များတယ်၊ တချို့လည်း မထွက်ပြေးနိုင်ကြသေးဘူး။ တိုက်ပွဲဖြစ်နေတာ မြို့ထဲနဲ့ စစ်တပ် ခလရ-၂၃ နား ပြင်းတယ်”ဟု သီပေါမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် သီပေါမြို့ပေါ် မန်မိုင်၊ ကျောင်းစု၊ တုံဆင့်နဲ့ စစ်ကောင်စီတပ် ခလရ-၂၃ အနီးတွင် တိုက်ပွဲပြင်းထန်နေပြီး တုံဆင့်နှင့် မြို့ဟောင်းရပ်မှ ပြည်သူများမှာ နားခဲနှင့် ဘော်ကြိုဘုန်းကြီးကျောင်းဘက်သို့ ထွက်ပြေးတိမ်းရှောင်နေရပြီး မြို့အဝင်အထွက်ကို TNLA က ကန့်သတ်ထားကြောင်း ဒေသခံများထံမှ သိရသည်။
“မြို့ဟောင်းဘက် ထွက်မပြေးနိုင်တဲ့လူတော့ လက်နက်ထိပြီးတော့ ဒဏ်ရာရတာ သေတာ ရှိတယ်။ တုံဆင့် ဘက်က မသန်စွမ်း ရှိတဲ့ အိမ်တွေဆိုရင် တချို့က ပစ္စည်းတွေ အရင်သယ်ထုတ်သွားပြီး လူကို နောက်မှ လာကယ်မယ်ပေါ့၊ ပြန်လာတော့ မြို့ထဲ ဝင်လို့မရတော့တာ။ အခု အိမ်မှာ ကျန်ခဲ့တဲ့ မသန်စွမ်းမိဘတွေက သေလား၊ ရှင်လား မသိနိုင်တော့ဘူး”ဟု သီပေါမြို့မှ ၎င်းဒေသခံအမျိုးသားက သျှမ်းသံတော်ဆင့်ကို ဆက်ပြောသည်။
သီပေါမြို့တွင် တိုက်ပွဲကြား သေဆုံးသွားသူများ၏ အချို့ရုပ်အလောင်းများကို သွားရောက်ကောက်ယူနိုင်ခြင်း မရှိဘဲ နေအိမ်ထဲ ပုပ်ပွနံစော်ပြီး ပစ်ထားရသလို ဒဏ်ရာဖြင့် သေဆုံးနေသည့် စစ်သားအလောင်းများကိုလည်း နမ္မတူမြစ်ထဲ မျှောချနေကြောင်း မျက်မြင်တွေ့ရှိခဲ့သူများက ပြောသည်။
ယမန်နေ့ (ဩဂုတ်လ ၁၅ ရက်) တစ်ရက်တည်းတွင် သီပေါမြို့သို့ စစ်ကောင်စီတပ်မှ Y-12 ထောက်ပို့လေယာဉ်ဖြင့် (၁၆) ကြိမ် ဗုံး(၁၁၃) လုံး လာရောက်ကြဲချခဲ့ကြောင်း TNLA သတင်းနှင့် ပြန်ကြားရေးဌာနက ထုတ်ပြန်ထားသည်။
လက်ရှိတွင် သီပေါမြို့ကို TNLA ပူးပေါင်းတပ်ဖွဲ့က မြို့ကို ထိန်းချုပ်ထားသော်လည်း စစ်ကောင်စီတပ် ခလရ-(၂၃)၊ ခမရ-၅၀၄/၅၀၄ တပ်ရင်းတို့ကို ဆက်လက်ထိုးစစ်ဆင် တိုက်ခိုက်နေပြီး နှစ်ဘက်တိုက်ပွဲ တစ်ပတ်အတွင်း အရပ်သား (၂၀) ကျော် ထိခိုက်သေဆုံး၍ ပြည်သူနေအိမ် အများအပြား ပျက်စီးကြောင်း သီပေါဒေသခံများက ပြောသည်။။
Leave a Comments