သျှမ်းပြည် မြောက်ပိုင်း မူဆယ်မြို့နယ် အတွင်း လုံးခြုံရေးအတွက် ငှားရမ်းထားသည့် ပြည်သူ့စစ်(၃)ဦးသည် အိမ်ရှင်သူဌေးအပါအဝင် (၃)ဦးကို သတ်ပြီး ပိုက်ဆံ သိန်း ၆ထောင်ကျော်ယူဆောင်သွားကြောင်း စုံစမ်းသိရသည်။

လွန်ခဲ့သည့် သြဂုတ် ၁၂ရက် မူဆယ်မြို့ ဟိုမွန်ရပ်ကွက် ၄၅ကုန်းတွင် နေထိုင်သည့် သူဌေးသည် အိမ်လုံခြုံရေးအတွက် ပြည်သူ့စစ် (၃)ဦးကို ငှားရမ်းခဲ့ပြီး၊ ထိုပြည်သူ့စစ် (၃)ဦးသည် အိမ်ရှင် သူဌေး အပါအဝင် (၃)ဦးကို သတ်ပြီး ကျပ်ငွေ သိန်း၆ထောင်ကျော် ယူဆောင်သွားကြောင်း ၎င်းအကြောင်းကို သိရှိသည့် မူဆယ်မြို့ ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။

“အိမ်လုံခြုံရေးအတွက်ဆိုပြီး ပြည်သူ့စစ် (၃)ဦးကို ငှားရမ်းထားတာ။ အဲ့အိမ်က ပိုက်ဆံရှိတာသိတော့ သူတို့တွေက သူဌေးရော သူအိမ်က လူ (၂)ယောက်ကိုပါ သတ်သွားတာ။ စုစုပေါင်း (၃)ဦး သတ်ခံရတာ။ ပိုက်ဆံလည်း သိန်း ၆ထောင်ကျော် ယူသွားတယ်” ဟု ၎င်းက ပြောသည်။

ပြည်သူ့စစ်များမှ ပစ်သတ်လိုက်သည့် အမျိုးသား ၂ဦး၊ အသက် (၁၈)နှစ်အရွယ် အမျိုးသမီး ၁ဦးဖြစ်ပြီး လက်ရှိ သက်ဆိုင်ရာအဖွဲ့အစည်းများမှ ဆက်လက်ရှာဖွေနေသည်ဟု လူမှုကူညီးရေးအသင်းတစ်ဦးက ပြောသည်။

‘’အသတ်ခံရတဲ့ ၃ယောက်က ကျား ၂ယောက်နဲ့ မိန်းမ ၁ ယောက် ။ အဲအိမ်ထဲမှာ လူဘယ်လောက်ရှိတာတော့ မပြောတတ်ဘူး။ သိတာတော့ သူဌေးတွေပဲ ဘာအလုပ်လုပ်ကြတာလည် မသိဘူး။ လူသတ်မှုဖြစ်ပွားရတဲ့ အထိဆိုတော့လေ ။ လူသတ်သွားတဲ့ ၃ယောက်ကို သက်ဆိုင်ရာအဖွဲ့အစည်းက ရှာဖွေနေတုန်းပဲ ‘’ ဟု ထိုလူမှုကူညီရေးအသင်းက ပြောသည်။

စစ်အာဏာသိမ်းပြီးတဲ့နောက် မူဆယ်မြို့နယ်တွင် ပိုက်ဆံလဲလှယ်သူများ၊ ပိုက်ဆံရှိတဲ့သူဌေးများ မကြာခဏ ပြန်ပေးဆွဲခံရသည့်အတွက် ၎င်းတို့သည် လုံခြုံရေးအတွက် ပြည်သူ့စစ်တပ်ဖွဲ့ဝင်များကို ငှားရမ်းခဲ့ကြသည်။

ထို့ကြောင့် လက်ရှိမှာ မူဆယ်မြို့တွင်းနေထိုင်သည့် သူဌေးများသည် လုံခြုံရေး ငှားရမ်းသည့် ပြည်သူ့စစ်ကို ပြန်လည် ကြောက်လန့်နေရသည့် အခြေအနေဖြစ်သည်။

မူဆယ်မြို့သည် တရုတ်နယ်စပ်မြို့ဖြစ်ပြီး လက်ရှိအချိန်ထိ မူဆယ်မြို့သည် တိုက်ပွဲမဖြစ်ပွားသေးသည့် ဒေသတစ်ခုဖြစ်နေသေးကြောင်း သိရသည်။

အလုပ်သင် သတင်းထောက် နန်းဆိုင်ခမ်း ရေးသားသည်။