သျှမ်း-မန္တလေးနယ်စပ်ရှိ မိုးကုတ်နှင့် မိုးမိတ်မြို့များမှ စစ်ဘေးရှောင်များသည် ပြင်ဦးလွင်-မိုးကုတ်လမ်းကို စစ်ကောင်စီတပ်မှ ပိတ်ထားခြင်းကြောင့် နောင်ချိုဘက်မှတဆင့် စစ်ဘေးတိမ်းရှောင်နေရကြောင်း စုံစမ်းသိရသည်။

ပြီးခဲ့သည့် ဇူလိုင်လ ၂၄ ရက်တွင် မိုးကုတ်မြို့အရှေ့ပိုင်းရှိ စစ်ကောင်စီတပ်စခန်းများကို တအာင်း(ပလောင်) အမျိုးသားလွတ်မြောက်ရေးတပ်မတော် TNLA နှင့် PDF ပူးပေါင်းတပ်ဖွဲ့များက တိုက်ခိုက်သိမ်းပိုက်ပြီးနောက် ပြင်ဦးလွင်-မိုးကုတ် လမ်းပိုင်းကို စစ်ကောင်စီဘက်က ပိတ်ထားလိုက်ပြီး ဖြတ်သန်းခွင့် မပေးတော့ကြောင်း သိရသည်။

မိုးကုတ်နှင့် မိုးမိတ်မြို့တို့ကို TNLA နှင့် PDF တပ်ဖွဲ့များက ထိန်းချုပ်လိုက်ပြီးနောက် မြို့ခံအများစုမှာ စစ်ကောင်စီတပ်မှ လေကြောင်းဖြင့် ထပ်မံလာရောက် ဗုံးကြဲမည်ကို စိုးရိမ်ခြင်းကြောင့် ဩဂုတ်လဆန်းပိုင်းမှ စ၍ မိုးကုတ်-ဟိုခို-နောင်ချို လမ်းပိုင်းမှတဆင့် ပြင်ဦးလွင်မြို့သို့ ကွေ့ဝိုက်၍ ထွက်ပြေးတိမ်းရှောင်နေရကြောင်း စစ်ဘေးရှောင်များက ပြောသည်။

“မိုးကုတ်၊ မိုးမိတ်ဘက်က စစ်ရှောင်တွေ အုပ်စုလိုက် ရှောင်လာကြတာ၊ လမ်းကတော့ ပိတ်လိုက်၊ ဖွင့်လိုက်ပေါ့။ မိုးကုတ် အရှေ့ဘက်ကနေ ထွက်လာရင် ဟိုခိုအထိ ၃ နာရီကျော်လောက် မောင်းရင် နောင်ချိုထဲ ရောက်ပြီ။ အခုရက်ပိုင်းအတွင်း ကား၊ ဆိုင်ကယ် ရာနဲ့ချီ နေ့တိုင်း ထွက်လာနေကြတယ်”ဟု နောင်ချိုမြို့ရောက် မိုးကုတ်စစ်ဘေးရှောင်တစ်ဦးက သျှမ်းသံတော်ဆင့်ကို ပြောသည်။ 

မိုးကုတ်မြို့မှ ထွက်ခွာလာသည့် စစ်ဘေးရှောင်များသည် နောင်ချိုမြို့နယ်အတွင်း ဟိုခို၊ သုံးဆယ်၊ ရွှေညောင်ပင်၊ ရေမောင်းတန်းမှတဆင့် ပြည်ထောင်စုကားလမ်းမကြီးကို ဖြတ်ကျော်ပြီး လယ်ကျင်းကွေ့၊ အင်းဝိုင်းသကြားစက်သို့ ဆက်လက်မောင်းနှင်ကာ ပြင်ဦးလွင်နှင့် မန္တလေးမြို့ဘက်သို့ ဆက်လက်ထွက်ခွာသွားကြောင်း သိရသည်။

အလားတူ မန္တလေး-မိုးကုတ်လမ်းပိုင်းပေါ်ရှိ မတ္တရာနှင့် သပိတ်ကျင်းမြို့များကိုလည်း ပြည်သူ့ကာကွယ်ရေးတပ်ဖွဲ့များက ထိန်းချုပ်ထားနိုင်ပြီး စစ်ကောင်စီတပ်နှင့် တိုက်ပွဲဆက်လက် ဖြစ်ပွားနေခြင်းကြောင့် ဖြတ်သန်းသွားလာရန် ခက်ခဲကြောင်း မိုးကုတ်စစ်ဘေးရှောင်များက ပြောသည်။

မိုးကုတ်အခြေစိုက် စစ်ကောင်စီတပ်စခန်းများကို TNLA နှင့် PDF ပူးပေါင်းတပ်ဖွဲ့များက ထိုးစစ်ဆင် တိုက်ခိုက်ခဲ့သည့် တိုက်ပွဲကာလ ၁ လကျော်အတွင်း စစ်ကောင်စီတပ်၏ လက်နက်ကြီးနှင့် လေကြောင်းဗုံးကြဲမှုကြောင့် ကလေး (၉) ဦး အပါအဝင် အရပ်သား (၃၁) ဦး သေဆုံးပြီး (၆၀) ကျော် ထိခိုက်ဒဏ်ရာ ရရှိကြောင်း ဒေသခံများထံမှ သိရသည်။