သျှမ်းပြည်တောင်ပိုင်း၊ ပင်လောင်းမြို့နယ်၊ ဆောင်းပြောင်းကျေးရွာတွင် ပအိုဝ်းပြည်သူ့စစ် (PNO) တပ်ထဲဝင်မှ နေရပ်ပေးပြန်မည်ဟုဆိုသော်လည်း စစ်ယူနီဖောင်းမရှိသည့်အတွက် နေရပ်ပြန်ခွင့်မပေးကြောင်း စုံစမ်းသိရသည်။
ပြီးခဲ့သည့် ဩဂုတ်လ ပထမပတ်ကစပြီး အသက် ၁၈နှစ်မှ အသက် ၄၀ အရွယ် ဆောင်းပြောင်းဒေသခံများကို (PNO) တပ်ထဲ စစ်မှုထမ်းရမည်ဟုဆိုပြီး ဖောင်ဖြည့်ခိုင်းကာ စစ်မှုမထမ်းလျှင် နေရပ်ပေးမပြန်တာကြောင့် ဒေသခံ အနည်းစု တပ်ထဲ ဝင်ခဲ့ကြရသည်။
“ ခုဆို စစ်သင်တန်းဆက်နေကြရတယ်။သင်တန်းတက်မှ ရွာထဲဝင်ရမယ်ပြောတယ်။ (PNO) ယူနီဖောင်းက အယောက်တိုင်းအတွက်မရှိဘူးလေ။ အဲတော့ PNO အင်္ကျီ မဝတ်ရတဲ့သူက ရွာမပြန်ရဘူး။” ဟု ဒေသခံအမျိုးသမီးတစ်ဦးက သျှမ်းသံတော်ဆင့်ကိုပြောသည်။
အဆိုပါတပ်ထဲဝင်ရမည်ဆိုသောကြောင့် ဆောင်းပြောင်းဒေသခံ (၂၀၀)ခန့် စစ်သင်တန်းတက်နေကြရသည်။
ထိုသို့ နေရပ်မပြန်ရတာကြောင့် ဒေသခံများသည် စိုက်ပျိုးထားသည့် စပါး၊ ပြောင်း စသည့် သီးနှံများကို ဆုံးရှုံးရမည်ကို စိုးရိမ်နေကြောင်းသိရသည်။
“ကျနော်တို့ စိုက်ခင်းပြန်ဖို့လိုတယ်လေ။ ကျနော်တို့ ငွေတွေကို စိုက်ခင်းထဲပဲ ထည့်ထားတာ။ ဒီစိုက်ခင်းတွေသာ ပျက်သွားရင် ငတ်ရုံပဲ ရှိတော့မယ်။ အိမ်ပြန်ချင်ပြီ။ကျနော်တို့ရွာသားတွေကိုလည်း ငဲ့ကြည့်ပေးစေချင်တယ်။” ဟု ဒေသခံတစ်ဦးက ဆိုသည်။
ပြီးခဲ့သည့် ဇွန်လနောက်ဆုံးပတ်၌ ဆောင်းပြောင်းကျေးရွာတွင် တိုက်ပွဲပြင်းထန်စွာဖြစ်ပွားခဲ့ပြီး ဒေသခံ အများပြား နီးစပ်ရာ ဘုန်းကြီးကျောင်းနှင့် တောတောင်ထဲတွင် စစ်ရှောင်နေကြရပြီး ယခုအချိန်ထိနေရပ်ပြန်ရန် အခက်ခဲရှိနေကြောင်းသိရသည်။
လက်ရှိဆောင်းပြောင်းဒေသဘက်တွင် စစ်သင်တန်းတက်ပြီးသည့်သူများကို အခြားကျေးရွာဖက်တွင် ဂိတ်စောင့်ခိုင်းထားကြောင်းသိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments