စစ်ကောင်စီ အသက်သွင်းလိုက်သည့် ပြည်သူ့စစ်မှုထမ်း ဥပဒေအရ မဖြစ်မနေစစ်သင်တန်းကို တက်ခဲ့ရပြီးနောက် ရှေ့တန်းကို ပို့ခံလိုက်ရသည့်သင်တန်ဆင်းတစ်ဦးက အထက်ပါအတိုင်း ဖွင့်ဟပြောဆိုလာခဲ့ခြင်း ဖြစ်သည်။

ပြီးခဲ့သည့်လပိုင်းက စစ်ကိုင်းတိုင်း ရွှေဘိုမြို့မှာ ပြည်သူ့စစ်မှုထမ်း စစ်သင်တန်းတက်ခဲ့ရပြီးသည့်နောက် သျှမ်းပြည်တောင်ပိုင်း ဆီဆိုင်မြို့နယ် ခမရ (၄၂၄) တပ်ရင်းထံ အပို့ရသည်ဟု သူကဆိုသည်။

သြဂုတ် ၁၀ ရက်တွင် ဆီဆိုင်မြို့နယ်အတွင်း တိုက်ပွဲ၌ ထိုသင်တန်းဆင်းတစ်ဦးကို စစ်သုံ့ပန်းအဖြစ် ပအိုဝ်းအမျိုးသားလွတ်မြောက်ရေးတပ်မတော် PNLA ကဖမ်းဆီးရမိပြီး စစ်ဆေးမေးမြန်းခဲ့ခြင်း ဖြစ်သည်။

ယင်းတိုက်ပွဲအတွင်း စစ်ကောင်စီအလောင်း ၃ လောင်း၊ စစ်သုံ့ပန်း ၁ ဦးအပါအဝင် သေနတ် MA 1 တလက်နှင့် ဒရုန်းတစင်းကို PNLA ဘက်က သိမ်းဆည်းရမိခဲ့သည်။

၎င်းက “ခေါင်းဆောင်တွေက ပစ်ပစ်ဆိုတော့ လေး၊ ငါး ထောင့်တော့ ပစ်လိုက်တယ်။ ကျည်ဆံက ဆယ်ထောင့်တောင် မရှိဘူး။ ၇ ထောင့်၊ ၈ ထောင့်လောက်ဘဲပစ်တယ်။ သူတို့ကအရှေ့က ကျနော်တို့က အနောက်က။ လူကောင်မမြင်ဘူး၊ သူတို့ကပစ်ပစ်လို့ဆို ပစ်လိုက်တာ” ဟု ပြောသည်။

ထို့အပြင် အဖမ်းမခံရခင်အချိန်ထိ ဒေသခံနေအိမ်ပေါ်တွင် ထမင်းဟင်းချက်စားနေကြောင်း၊ လူကိုမူးယစ်စေသည့် ဆေးဝါးတစ်မျိုးကိုသုံးစွဲနေကြောင်း သူကဆက်ပြောသည်။

မြန်မာမှ ဒုက္ခရောက်နေသော စစ်ကောင်စီသည် ဆုတ်ယုတ်နေသည့် စစ်အင်အားကို ပြန်လည်ဖြည့်တင်းရန် ကာလကြာမြင့်ပြီဖြစ်သော အတင်းအကျပ် စစ်မှုမထမ်းမနေရဥပဒေကို ဖေဖော်ဝါလ ၁၀ ရက်တွင် စတင်ကျင့်သုံးခဲ့သည်။

ထို့နောက် အပတ်စဉ် (၁)၊ (၂)၊ (၃) ဟူ၍ မဲနှိက်စနစ်ဖြင့် သော်လည်းကောင်း၊ အတင်းအဓ္ဓ ပေါ်တာဆွဲစနစ်ဖြင့် သော်လည်းကောင်း နည်းမျိုးစုံဖြင့် တပ်သားသစ် စုဆောင်းခဲ့သည်။

လက်ရှိအချိန်ထိ အပတ်စဉ် (၄) အထိ စစ်သင်တန်းပေးနေဆဲဖြစ်ပြီး လာမည့် အပတ်စဉ် (၅) တွင် အမျိုးသမီးများကိုပါ စစ်မှုထမ်းခေါ်မည်ဟု စစ်ကောင်စီက ပြောဆိုထားသည်။

သို့သော် သင်တန်းဆင်း လူငယ်များအား တပ်ရင်း၊ တပ်ဖွဲ့များသို့ ပို့ဆောင်ခြင်း မပြုဘဲ ဥပဒေမဲ့ ရှေ့တန်းစစ်မျက်နှာများသို့ တိုက်ရိုက်ပို့ဆောင်နေသဖြင့် သေဆုံးမှုများ များပြားနေသည်ဟု သိရသည်။

ပြီးခဲ့သည့် ဇွန်လ ၂၈ ရက်တွင်လည်း သင်တန်းဆင့်သည့် ပြည်သူ့စစ်မှုထမ်း သင်တန်း အပတ်စဉ် (၁) သင်တန်းသားများကို သျှမ်း၊ ကရင်နီ၊ ရခိုင်၊ ကရင်၊ တနင်္သာရီ ဒေသများရှိ ရှေ့တန်းစစ်မြေပြင်များသို့ တိုက်ရိုက် ပို့ဆောင်ခဲ့သည်ဟု စစ်ရေးသတင်းရင်းမြစ်ထံ သိရသည်။

“သင်တန်းက ဆယ်ရက်တက်ရတယ်။ ရွှေဘိုမှာတက်တာ။ ပြောင်းလာတာတော့ ရက်ပိုင်းဘဲရှိသေးတယ်၊ လတောင်မရှိသေးဘူး။ ရက်ပိုင်းဘဲရှိသေးတာကို ကျနော်တို့ကို ရှေ့တန်းတန်းပို့တာ။ ကျနော်တို့ကို ၄၂၄ မှာလာထားပြီး ရှေ့တန်းကိုတစ်ခါတည်းပို့လိုက်တာ။ ကျနော်တို့မှာ အင်အား ၂၀၀ လောက်ရှိတယ်” ဟု PNLA မှဖမ်းဆီးရမိသော စစ်သုံ့ပန်းတစ်ဦးက ပြောသည်။

လက်ရှိ ဆီဆိုင်မြို့နယ်အရှေ့စိုက် ခမရ (၄၂၃) နှင့် (၄၂၄) တပ်ရင်းတွင်လည်း စစ်အင်အား ၅၀၀ ခန့်ရှိပြီး၊ ခမရ (၄၂၄) တပ်ရင်းကို ဗိုလ်ကြီး နေမျိုးဦးက ဦးဆောင်နေကြောင်း ဆိုသည်။

အဆိုပါ ကိစ္စနှင့်ပတ်သက်ပြီး ပအိုဝ်းအမျိုးသားလွတ်မြောက်ရေးတပ်မတော် PNLA ၏ ပြန်ကြားရေး တာဝန်ခံ ခွန်ရိန်းယံက ယခုလိုပြောသည်။

“ပြောရရင်တော့ ဒါကသေတွင်းပို့လိုက်တာပဲ။ အာဏာရူးမင်းအောင်လှိုင်က ကိုယ့်ကိုယ်သေတွင်း ပို့နေတဲ့အချိန်မှာ ကိုယ်ကမသေချင်ဘူးဆိုရင်တော့ ပါးနပ်မှရမယ်။ လိမ္မာမှရမယ်။ ကိုယ်ကအတင်းခေါ်ခံရလို့ ပါသွားတာဘဲဖြစ်ဖြစ်၊ ပေါ်တာဆွဲလို့ပါသွားတာဖြစ်ဖြစ်၊ ရှေ့တန်းအပို့ခံရတဲ့အချိန်မှာဘဲ ဖြစ်ဖြစ် ဘယ်လိုမျိုး အချိန်မှာဘဲဖြစ်ဖြစ် တော်လှန်ရေးတပ်ဖွဲ့တွေကိုကြိုးစားပြီး ဆက်သွယ်ပါ။ ပြီးတော့ ဘက်ပြောင်းခိုလှုံပါ တိုက်တွန်းချင်တယ်” ဟု ခွန်ရိန်းယံက ပြောသည်။

စစ်တပ်အာဏာသိမ်းပြီး သုံးနှစ်ကျော်အတွင်း ရှမ်းပြည်နယ်အပါအဝင် နိုင်ငံတစ်ဝှမ်းမှာ ခုခံတော်လှန်မှုထိုးစစ်ကို ရင်ဆိုင်နေရသည့် စစ်ကောင်စီတပ်သည် တိုင်းရင်းသားလက်နက်ကိုင်တပ်ဖွဲ့များကို ပြည်ပနိုင်တချို့က ငွေကြေး၊ လက်နက်နှင့် နည်းပညာအကူအညီများဖြင့် ကူညီပေးနေသည်ဟုလည်း ဗိုလ်ချုပ်မှူးကြီး မင်းအောင်လှိုင်က စွပ်စွဲပြောဆိုထားသည်။