သျှမ်းပြည် တောင်ကြီးမြို့ ရှိ ညပိုင်းတွင် ဖွင့်လှစ်ထားသည့် ညစျေးဆိုင်များကို စစ်ကောင်စီ လက်အောက်ခံ စည်ပင်မှ ပိတ်ခိုင်းကြောင်း စုံစမ်းသိရသည်။

သျှမ်းပြည် တောင်ပိုင်း တောင်ကြီးမြို့ အ.ထ.က (၁) ၏ မြောက်လက်ရှိ ညဈေးတွင် ဖွင့်လှစ်ထားသော စျေးဆိုင်များကို စစ်ကောင်စီလက်အောင်ခံ စည်ပင်သာယာရေးမှ သြဂုတ်လ ၁၁ ရက်မှစတင်ကာ ပိတ်ဆိုင်းခိုင်းကြောင်း၊ လိုက်နာ ဆောင်ရွက်ခြင်း မရှိပါက ဥပဒေနှင့်အညီ အရေးယူသွားမည်ဖြစ်ကြောင်း တောင်ကြီးမြို့ ညစျေးဆိုင်တွင် ရောင်းချသူတစ်ဦးက သျှမ်းသံတော်ဆင့်ကိုပြောသည်။

“တချို့ကလည်း ဘာလို့ပိတ်ခိုင်းလည်း ‌သေချာမသိဘူး။ ၂ ရက်လောက်ရှိပြီး ပိတ်ခိုင်းတာ။ အဲ့နားမှာဖွင့်တာလည်း မရှိတော့ဘူး။အကြောင်းပြချက် ဘာမှ မပေးဘဲ ပိတ်ခိုင်းတာ ” ဟု တောင်ကြီးမြို့ ဒေသခံအမျိုးသားတစ်ဦးက ပြောသည်။

ထိုညဈေးကို စစ်ကောင်စီလက်အောက်ခံ စည်ပင်မှ ယာဉ်ကြောပိတ်ဆို့မှုကြောင့် ညကင်းလှည့်ရန် ၊ ပတ်ကင်း၊ ဧည့်စာရင်းများ စစ်ဆေးဆောင်ရွက်ရာတွင် သွားလာ ခက်ခဲမှုများကြောင့် ဆိုင်များကို ဆက်လက်မဖွင့် လှစ်ရန် ထုတ်ပြန်ချက်ထားသည်ဟု လည်း တောင်ကြီးမြို့ စျေးသည်တစ်ဦးက ဆိုပြန်သည်။

“ညဆို အဲ့ညဈေးက လမ်းတွေမှာ လူပြည့်ပြီး ပိတ်တယ်။ ညတွေက ရဲတွေ ကင်းလှည့်တာရှိတယ်။ ပြီးရင် သူတို့ကလည်း ကား ၅စီး အနည်းဆုံး နဲ့ ည၈နာရီဆိုပတ်ပြီ။ အဲ့အကြောင်းပြချက်တွေနဲ့ ပိတ်ခိုင်းတာပဲ။ ” ၎င်းစျေးသည်က ပြောသည်။

လက်ရှိမှာ တောင်ကြီးမြို့ပေါ်သို့ သျှမ်းပြည် မြောက်ပိုင်းမှ “၁၀၂၇ စစ်ဆင်ရေး”ကြောင့် စစ်ဘေးရှောင်လာသူ ထောင်နှင့်ချီရှိပြီး စားနပ်ရိက္ခာများ အရေးပေါ် လိုအပ်နေကြောင်း စစ်ရှောင်ကူညီပေးသူများထံမှ သိရသည်။