သျှမ်းပြည်တောင်ပိုင်း တောင်ကြီးခရိုင်အတွင်း စစ်မှုထမ်းအတွက်ဟုဆိုကာ ငွေကျပ် ၄သိန်း အထိ ကောက်ခံနေကြောင်း စုံစမ်းသိရသည်။

ပြီးခဲ့သည့် ဇူလိုင်လကုန်ပိုင်းက သျှမ်းပြည်တောင်ပိုင်း၊ ညောင်ရွှေမြို့နယ်၊ နန်းပန်မြို့ရှိ ကျေးရွာအချို့အတွင် စစ်မှုထမ်းရန် အကြောင်းပြချက်များဖြင့် ငွေကျပ် ၃ သိန်းခွဲမှ ၄ သိန်းအထိကောက်ခံမှုများရှိနေကြောင်း ဒေသခံတစ်ဦးက သျှမ်းသံတော်ဆင့်သို့ ပြောသည်။

“တစ်အိမ်ကို ၃ သိန်းခွဲကောက်တယ်၊ မလောက်သေးရင် ထပ်ကောက်မယ်လည်းပြောတယ်၊ ကျမတို့က လစာနဲ့တောင်စားမလောက်တာ တချို့ရွာဆို ၄ သိန်းထိတောင် ကောက်နေကြတယ်” ဟု ၎င်းကပြောသည်။

ထို့ အပြင် ကောက်ခံသည့်ငွေအားထည့်ဝင်ခြင်းမရှိလျှင် သက်ဆိုင်ရာသို့ တိုင်ကြားမည်ဟု ကျေးရွာအုပ်ချုပ်ရေးမှူးများမှ ခြိမ်းခြောက်နေကြောင်းသိရသည်။

“မထည့်ရင်လည်း ရွာလူကြီးက အထက်ကိုတိုင်မယ်တဲ့၊ ဘယ်နှလစာကိုလည်းမပြောဘူး၊ ၃ သိန်းခွဲဆိုတာ အနည်းဆုံးကောက်ပေးတာလို့တောင်ပြောတယ် ထပ်ပြီးကောက်အုံးမယ်လည်းပြောတယ်၊ မထည့်လို့ တစ်ခုခုဖြစ်ရင်တာဝန်မယူဘူးလို့ပြောတယ်” ဟု ၎င်းကဆက်ပြောသည်။

ယခင်လများတွင် တစ်အိမ်လျှင် ငွေကျပ်၂ သောင်းခွဲ သာ ကောက်ခံနေရာမှ ဇူလိုင်လကုန်တွင် ၃ သိန်းခွဲထိ တိုးသွားကြောင်းသိရသည်။

“ကျမတို့ အိမ်ဆို စစ်မှုထမ်းအရွယ်မရှိဘူး။ ကျမက ကလေးအမေ၊ အမျိုးသားကလည်း မရှိတော့ဘူး အဖေကလည်း အသက် ၇၀ ကျော်နေပြီ၊ အဲ့တာတောင် ငွေထည့်ပေးရမယ်တဲ့ ” ဟု နန်းပန်မြို့နယ်အနီးတွင်နေထိုင်သည့် အမျိုးသမီးတစ်ဦးကပြောသည်။

အလားတူ ယမန်နေ့ ဩဂုတ်လ ၁၁ ရက် တွင်လည်း တောင်ကြီးမြို့ပေါ်ရပ်ကွက် အချို့တွင်လည်း စစ်မှုထမ်းအတွက်ဟုဆိုကာ ငွေကျပ် ၁ သိန်းမှ ၁ သိန်းခွဲအထိကောက်ခံနေကြောင်း မြို့ခံအချို့ထံမှသိရသည်။

လက်ရှိတွင် နိုင်ငံတဝန်း စစ်ကောင်စီနှင့်‌ တော်လှန်ရေးတပ်ဖွဲ့များ၏တိုက်ပွဲများကြောင့် စစ်ကောင်စီတပ်တွင် အင်အားများပြုန်းတီးမှုများစွာဖြစ်ပေါ်နေပြီး ထိုလိုအပ်ချက်များကို ဖြည့်တင်းရန်အတွက် စစ်မှုထမ်းဥပဒေထုတ်ပြန်ခဲ့ပြီးနောက် နေရာအနှံ့တွင် စစ်မှုထမ်းဥပဒေနှင့် ပတ်သက်သော အခက်အခဲ ပြဿနာများစွာဖြစ်ပေါ်နေလျက်ရှိသည်။

အလုပ်သင် သတင်းထောက် ယူဂျင်း ရေးသားသည်။