သျှမ်းပြည်နယ်တောင်ပိုင်း ပင်လောင်းမြို့နယ်ဆောင်းပြောင်းကျေးရွာဒေသခံများကို PNOပြည်သူ့စစ် တပ်ထဲ ဝင်ကြောင်း လက်မှတ်ထိုးမှသာ ရွာထဲပေးနေမည်ဟု ရွာသားများကိုခြိမ်းခြောက်အကြပ်ကိုင်ကြောင်း ဒေသခံများထံမှသိရသည်။
ရွာသားများအားလုံး နေအိမ်သို့ပြန်နေလိုလျှင် ရွာထဲရှိအသက်၁၈မှ အသက်၄၀အောက် အမျိုးသား၊အမျိုးသမီးအားလုံးကို PNOပြည်သူ့စစ်ထဲဝင်ကြောင်းလက်မှတ်ထိုးမှသာ ပြန်လာနေ ခွင့်ပြုမည်ဖြစ်သဖြင့် ဒေသခံများအခက်ခဲကြုံတွေ့နေရပါသည်။
“ဆောင်းပြောင်းရွာကိုဝင်တဲ့လမ်းအကုန်ပိတ်ထားတယ်။ သူတို့ခုလို ပြောလာတော့ရွာသားတစ်ယောက်မှ လက်မှတ်မထိုးဘူး။ ရွာသားတစ်ယောက်မှ သဘောမတူဘူး။ ဒါကအာဏာရှင်ဆန်ဆန်လုပ်တဲ့လုပ်ရပ်ဖြစ်တယ်”ဟု ဒေသခံတစ်ဦးက သျှမ်းသံတော်ဆင့်ကိုပြောသည်။
ဆောင်းပြောင်းကျေးရွာသည် ပြီးခဲ့သည့် ဇွန်လ နောက်ဆုံးပတ်တွင် စတင်ကာ တိုက်ပွဲပြင်းထန်စွာ ဖြစ်ပွားပြီး နောက် ဒေသခံများရွာလုံးကျွတ်ထွက်ပြေးတိမ်းရှောင်ခဲ့ရသည်။
“ခုဆောင်ပြောင်းမှာ တိုက်ပွဲမဖြစ်တာ တစ်လရှိတော့မယ်။ရွာထဲမှာPNOတွေပဲ ဝင်နေနေတာ။ရွာသားအိမ်ပေါ်လဲ တက်နေတယ်။ ချက်ချင်တာချက် ယူစားချင်တာယူစားတယ်။တချို့အိမ်တွေဆို သူတို့က သော့ဖျတ်ပြီး ဝင်နေနေတယ်”ဟု ဒေသခံတစ်ဦးကပြောသည်။
PNOက ရွာသားများကို ယခုလို အကြပ်ကိုင် ပြုလုပ်ခြင်းကြောင်းရွာသားများ ရွာထဲပြန်မနေကြဘဲ တစ်ခြားရွာတွင် စစ်ဘေးရှောင်ဘဝဖြင့်သာခက်ခဲစွာ နေထိုင်နေရကြောင်း သိရသည်။
