သျှမ်းပြည် တောင်ကြီးမြို့တွင် စက်သုံးဆီများ ပြတ်လပ်လုနီးပါးဖြစ်နေပြီး၊ မှောင်ခိုရောင်းသူများ ဈေးနှုန်းမြှင့်တင်ကာ ရောင်းချနေကြောင်း သတင်းရရှိသည်။

ပြီးခဲ့သည့် (ဇူလိုင်လ ၃၁)ရက်မှစတင်ပြီး တောင်ကြီးမြို့တွင် စက်သုံးဆီရောင်းချနေသည့် ဆိုင်ကြီးများတွင် စက်သုံးဆီကို အကန့်အသက်ဖြင့် ရောင်းချပေးနေပြီး  တန်းစီကာ ဝယ်ယူနေရသကဲ့သို့ စက်သုံးဆီ စျေးနှုန်းများလည်း တရိပ်ရိပ် မြင့်တက်လာခဲ့သည်။

ယနေ့ (သြဂုတ်လ ၉ ရက်) တောင်ကြီးမြို့အတွင်းရှိ စက်သုံးဆီဆိုင်ကြီးများလည်း ပိတ်နေပြီး စက်သုံးဆီများ စတင်ပြတ်လပ် လုနီးပါးဖြစ်နေပြီး၊ မှောင်ခိုရောင်သူများလာကာ စက်သုံးဆီဈေးနှုန်းများကိုလည်း စျေး မြှင့်တင်၍ ရောင်းချနေကြောင်း တောင်ကြီးမြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။ 

“မြို့ထဲကတော့  ဆိုင်တွေပိတ်ကုန်ပြီ။မြို့ပြင်တွေလောက်ပဲကျန်တာ။မနက်ကနေညထိ ကိုတန်းစီနေတဲ့ ကာတွေရှိတယ်။မီးပုံးပျံအနီးအနားမှာလဲ ရေသန့်ဘူးနဲ့ အပြင်မှာ ဆီတွေရောင်‌နေတာရှိတယ်။ဈေးတော့ကြီး တာပေါ့။ကျနော်တောင်  ၄ဘူးလောက်ဝယ်လိုက်သေးတယ်။”ဟု ၎င်းဒေသခံအမျိုးသားတစ်ဦးက ပြောသည်။ 

တောင်ကြီးမြို့ စက်သုံးဆီ ဈေးနှုန်း 92 တစ်လီတာလျှင် ၄၅၀၀ ကျပ် ထိ ရှိနေပြီး၊ ကားတစ်စီးလျှင်  ၅ သောင်းကျပ် ၊ ဆိုင်ကယ်တစ်စီးလျှင် ၅ ထောင်ကျပ် ဖြင့် အကန့်အသတ်သာ ဖြည့်ပေးနေကြောင်း သိရသည်။ 

တောင်ကြီးမြို့အတွင်း စက်သုံးဆီများကို တန်းစီဝယ်ယူနေရမှုကြောင့် ခရီးသည်တင် လိုင်းကားပြေးဆွဲသူများ အတွက် ယခင်ကထက်ပိုကြပ်တည်းလာကြောင်း သိရသည်။

နိုင်ငံခြား ငွေလဲလှယ်နှုန်းကြောင့် စက်သုံးဆီရောင်းချရန် သိုလှောင်ထားသည့် ဆီများ မရှိသည့်အတွက် ဆိုင်အများအပြား ပိတ်ထားရကြောင်း၊ စက်သုံးဆီ သိုလှောင်ပြီး ရောင်းချနေသည့် ဆိုင်များလည်း အဆမတန် စျေးနှုန်းမြှင့်ကာ ရောင်းချနေမှုကြောင့် ပြည်သူများ အခက်ကြုံနေရကြောင်း သိရသည်။