သျှမ်းပြည်တောင်ပိုင်း ဟိုပုံးမြို့နယ် အနောက်ဘက်ရပ်ကွက်တွင် စစ်ကောင်စီမှ အရပ်သားများကို စစ်မှုထမ်းရန် အတွက် လာရောက်ပြီး စည်းဝေးနေချိန် ရပ်ကွက်အုပ်ချုပ်ရေးမှူး နှင့် အရပ်သား စကားများ ရန်ဖြစ်ပွားခဲ့ကြောင်း စုံစမ်းသိရသည်။
ပြီးခဲ့သည့် ဩဂုတ်လ ၆ရက်တွင် ဟိုပုံးမြို့နယ် အနောက်ရပ်ကွက်တွင် စစ်ကောင်စီကနေပြီး စစ်မှုထမ်းခေါ်ဆိုရာ မလိုက်လိုပဲ လူငှား တစ်ဦးခေါ်ဆိုပါက (၇၅)သိန်း ပေးဆောင်ရမည်ဟု ပြောဆိုရာမှ ရန်ဖြစ်ပွားခဲ့ကြကြောင်းအစည်းအဝေး သွားတက်သည့် အမျိုးသားတစ်ဦးက သျှမ်းသံတော်ဆင့်ကိုပြောသည်။
“ တကယ်တော့ စစ်မှုထမ်းဖို့လာညှိတာ။ လူ(၅၀)ဦးမှာ တစ်ဦးသွားရမယ်။ အဲ့တစ်ဦးက မသွားချင်ရင် အပြင်လူငှားရမ်းဖို့ ကျပ် (၇၅)သိန်း ကျနော်တို့က စုပေးရမယ်။ ကျနော်တို့ တစ်ဦးကို တသိန်း နှစ်သောင်းကျပ် ပေးရမယ်။ ဘယ်က ငွေတွေနဲ့ပေးရမှာလဲဆိုပြီး ရန်ဖြစ်ကြတာ” ဟု ၎င်း အမျိုးသားတစ်ဦးက ပြောသည်။
ထိုငွေကြေးကိစ္စကြောင့် အစည်းအဝေးလာတက်သူများနှင့် ရပ်ကွက်အုပ်ချုပ်ရေးမှူးကြား ရန်ဖြစ်ပွားရာ ကိုယ်ထိ လက်ရောက် ဖြစ်မည်ကို ကြောက်သဖြင့် နောက်ဆုံးတွင် ရပ်ကွက်တစ်ခုလုံး မှ တစ်အိမ်ထောင်စုလျှင် ကျပ်ငွေ နှစ်သောင်းသာ ကောက်ယူမည် ဟု ဆုံးဖြတ်လိုက်သည်။
“ ထိုးနှက်တော့မယ့်အဆင့်ပါပဲ။ နောက်ဆုံးမှာ အဲ့ ၅၀ဦးကိုပဲမဟုတ်တော့ဘဲ တရွာလုံးက တစ်အိမ်ထောင်ကို ကျပ်ငွေ နှစ်သောင်းကျပ်ကောက်မယ်လို့ ဆုံးဖြတ်လိုက်တယ်” ဟု အထက်ပါ ပုဂ္ဂိုလ်က ဆိုသည်။
လက်ရှိ သျှမ်းပြည်တဝှမ်းလုံး တိုက်ပွဲဖြစ်ပွားနေပြီး ဟိုပုံးမြို့နယ်အတွင်းပြည်သူများလည်း စစ်ဘေးရှောင်နေရကာ စိုက်ပျိုးရေးမလုပ်နိုင်ချိန် စစ်ရှုံးနေသော စစ်ကောင်စီကလည်း တပ်သားသစ်စုဆောင်းရန် တာဆူနေချိန်ဖြစ်သည်။
ထို့ကြောင့် ပြည်သူများကို မငဲ့ညှာဘဲ စစ်မှုထမ်းခေါ်ဆိုခြင်း ၊ စစ်မှုထမ်းမလိုက်လိုပါက ငွေညှစ်မှုများပြုလုပ်နေသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments