သျှမ်းပြည်တောင်ပိုင်း၊ ဆီဆိုင်မြို့နယ် ထီရီး(ပွဉ်ရင်း )ရွာ တွင် ပအိုဝ်း အမျိုးသားလွတ်မြောက်ရေး တပ်မတော် (PNLA)နှင့် စစ်ကောင်စီ၊ ပအိုဝ်းပြည်သူ့စစ် (PNO) တို့ တိုက်ပွဲ ပြင်းထန်စွာ ဖြစ်ပွားနေပြီး စစ်ကောင်စီ၏ လက်နက်ကြီးကြောင့် နေအိမ် (၄)လုံးထက်မနည်း ပျက်စီးသွားကြောင်းသိရသည်။
ပြီးခဲ့သည့် သြဂုတ်လ ၆ရက်မှ စကာ ဆီဆိုင် အရှေ့ဘက်ခြမ်းတွင် တိုက်ပွဲ ပြင်းထန်စွာဖြစ်ပွားနေပြီး ဒေသခံအများစုမှာ ထွက်ပြေးတိမ်းရှောင်နေရကြောင်းသိရသည်။
“မိုးလင်းမိုးချုပ် တိုက်ပွဲ ပြင်းထန်နေတာ သုံးရက်ရှိပြီ။ ညဘက်လက်နက်ကြီးနဲ့ ပစ်ချတာ။ ညက ရွာမှာ ပြန်အိပ်တာ အိမ်ဘေး လာကျတာ။ လန့်လိုက်တာ။ ရွာထဲက အိမ် ၄လုံး ကျော်လောက်မီးလောင်သွားတယ်။” ဟု ထီရီး (ပွဥ်ရင်း) ဒေသခံတစ်ဦးက သျှမ်းသံတော်ဆင့်ကို ပြောသည်။
ဆီဆိုင်မြို့တွင်းမှာ တိုက်ပွဲမဖြစ်သေးသော်လည်း ကျေးရွာဖက်တွေမှာ တိုက်ပွဲ ပြင်းထန်စွာ ဖြစ်ပွားနေတာကြောင့် ဒေသခံအများစုမှာ မြို့ပေါ်နှင့်နီးစပ်ရာ တော်တောင်ထဲကို စစ်ဘေးရှောင်တိမ်းနေရကြောင်းသိရသည်။
” လက်ရှိတော့ မြို့တွင်းက ငြိမ်နေသေးတယ်။ ရွာဖက်တော့ တော်တော်ဖြစ်နေကြတယ်။ ပြေးတဲ့သူကပြေးပဲ။ စိတ်တော့မကောင်းဘူး။ ကိုယ့်လူမျိုးအချင်းချင်းကို ပြန်သတ်နေကြတယ်။ ကြားထဲက ပြည်သူတွေ ဒုက္ခရောက်ကြတာပဲ။”ဟု ဒေသခံ တစ်ဦးက ထပ်လောင်းပြောကြားထားသည်။
သြဂုတ်လ ၄ ရက်နေ့ကတည်းက စစ်ကောင်စီမှ PNLA ထိန်းချုပ်နယ်မြေ ဗန်းမတ် ဖက်ကို လက်နက်ကြီးဖြင့် တဘက်သတ်ပစ်ခတ် တိုက်ခိုက်ခဲ့သည်။
ယခုလက်ရှိ ဆီဆိုင်မြို့အရှေ့ဖက် ခြမ်းတွင် တိုက်ပွဲ ပြင်းထန်လျှက်ရှိသည်။
အလုပ်သင် သတင်းထောက် နန်းလရောင် ရေးသားသည်။
