တရုတ် – မြန်မာ နယ်စပ် မူဆယ်မြို့သို့ ရောက်ရှိနေသော လားရှိုး ရမခ တိုင်းမှူးကို ညီနောင်မဟာမိတ်တပ်မှ လက်နက်ချရန် ကမ်းလှမ်း ပြီးနောက် သေနက်သံများ စတင်ထွက်ပေါ်လာကြောင်း သတင်းရရှိသည်။

အရှေ့မြောက်တိုင်းစစ်ဌာနချုပ်-ရမခ ဗိုလ်မှူးချုပ်စိုးလှိုင်ကို တွင် ညီနောင် မဟာမိတ်တပ်မှ လက်နက်ချရန် ကမ်းလှမ်းခဲ့သည့်သတင်းသည် ယမန်နေ့တွင် ထွက်ပေါ်ခဲ့ကြောင်း စစ်ရေးသတင်းအရင်းမြစ်တစ်ဦးက သျှမ်းသံတော်ဆင့်ကို ပြောသည်။

ထိုထွက်ပေါ်လာပြီးနောက် တရုတ် – မြန်မာနယ်စပ် မူဆယ်မြို့တွင် ယမန်နေ့ (သြဂုတ်လ ၈ ရက်) ည ၉နာရီ ဝန်းကျင် စစ်ကောင်စီ၏ တပ်စခန်း ရမခ ၉၉ အနီးတွင် လက်နက်ပစ်ခံသံများကြား နေရပြီး ပြည်သူလူထုများ တိုက်ပွဲဖြစ်လာမည်ကို စိုးရိမ်နေကြောင်း မူဆယ်မြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“မူဆယ်မှာက တိုက်ပွဲမတော့ မဖြစ်သေးဘူး။မနေ့ညက စစ်ကောင်စီကတော့ လျှောက်ပစ်နေတယ်။ဘာကြောင့်လည်းဆို တာသိရသေးဘူး။ အခုတော့ ငြိမ်နေတယ်။ ဒေသခံတွေကတော့ စိုးရိမ်တာပေါ့။ ”ဟု မူဆယ်မြို့ ဒေသခံအမျိုးသားတစ်ဦးက ပြောသည်။

မူဆယ်မြို့ တိုက်ပွဲ မဖြစ်ဖို့အရေးသည် လားရှိုး ရမခ တိုင်းမှူးသစ် ဗိုလ်မှူးချုပ်စိုးလှိုင် ၏ အဖြေပေါ်မူတည် နေကြောင်း လည်း စစ်ရေး သတင်းအရင်းမြစ်က သျှမ်းသံတော်ဆင့်ကိုပြောသည်။

“အခု ထိတော့ တိုင်းမှူး ကအကြောင်းမပြန်သေးဘူး။ သူ့အဖေပေါ်မူတည်တယ်။ သူက လက်နက်ချရင်တော့ မူဆယ်မြို့က စစ်ရေးမဖြစ်ဘူး လွှတ်သွားမယ်” ဟု ၎င်းက ဆိုသည်။

လားရှိုးမြို့ရှိ ကိုးကန့် အရှေ့မြောက်တိုင်းစစ်ဌာနချုပ်-ရမခကို ပူးပေါင်းတပ် တိုက်ခိုက်နေစဥ် ယင်းကာလ တိုင်းမှူးဖြစ်သူ ဗိုလ်ချုပ်စိုးတင့်သည် ဖြုတ်ချ ခံခဲ့ရပြီး မူဆယ်၌ အထိုင်ချထားသည့် တပ်မ (၉၉) တပ်မမှူး ဗိုလ်မှူးချုပ်စိုးလှိုင် (DSA- 42) ကို အစားထိုး ခန့်အပ်ခဲ့သည်။

မူဆယ်မြို့တွင်း စစ်ရေး ဖြစ်ပေါ်လာပါက ပြည်သူများအနေဖြင့် အဖက်ဖက် စိုးရိမ်ပူပန်နေကြကြောင်း၊ ယခင် လားရှိုး၊ နမ္မတူ၊ နမ့်ခမ်းနှင့် အခြားဒေသအတွင်း တိုက်ပွဲဖြစ်ပွားမှုကြောင့် ပြည်သူအများစုသည် မူဆယ်မြို့ဘက်သို့ ရွှေ့ပြောင်းလာနေထိုင်ကြသည်။

မူဆယ်မြို့သည် တရုတ်နိုင်ငံနှင့် နယ်စပ်မြို့ဖြစ်သော်လည်း အရေးအကြောင်း ဖြစ်ပေါ်လာပါက တရုတ်ဘက်သို့ ဝင်ရောက် စစ်ရှောင်ရန် ခက်ခဲနေကြောင်း ဒေသခံများကပြောသည်။

တရုတ်နိုင်ငံဘက်မှ ကိုဗစ် – ၁၉ ကူးစက်ရောဂါကြောင့် တရုတ် – မြန်မာ နိုင်ငံထိစပ်နေတဲ့ နယ်စပ်မျဉ်းများကို ခြံစည်းရိုးခတ်လိုက်ပြီးနောက်ပိုင်း တိုင်းရင်းသားလက်နက်ကိုင်များနှင့် စစ်ကောင်စီတို့ တိုက်ပွဲများဖြစ်ပွားလျှင် နယ်စပ်ဒေသတွင် နေထိုင်သော ဒေသခံများအတွက် ထွက်ပြေးတိမ်းရှောင်ရန် ခက်ခဲနိုင်ကြောင်း မူဆယ်မြို့ခံများက ပြောသည်။

ပြီးခဲ့သည့် ၁၀၂၇ စစ်ဆင်ရေး ပထမပိုင်း ကာလ မူဆယ်မြို့ ပတ်ပတ်လည်ရှိ ဒေသ အားလုံးကို ညီနောင်မဟာမိတ် ၃ ဖွဲ့နှင့် KIA က သိမ်းပိုက်ထားသဖြင့် လက်ရှိ စစ်ကောင်စီ ထိန်းချုပ်ထားသည့် မူဆယ်ကို မဟာမိတ်တပ်များ တိုက်ခိုက် သိမ်းပိုက်ရန် လွယ်ကူသည့် အနေအထား ဖြစ်သည်။