သျှမ်းပြည်တောင်ပိုင်း၊ ပင်လောင်းမြို့နယ် လိန်းညားကျေးရွာအုပ်စုရှိ ဆယ်ကျော်သက် လူငယ်များအပါအဝင် လက်နက်မပါဘဲ ပအိုဝ်းပြည်သူ့စစ် PNO မှ ကင်းစောင့်ခိုင်းနေကြောင်း စုံစမ်းသိရသည်။

ပြီးခဲ့သည့်( သြဂုတ်လ ၃ )ရက်နေ့မှစပြီး လိန်းညား ကျေးရွာအုပ်စုရှိ အသက် ၁၈ နှစ် လူငယ်များနှင့် အသက် ၄၅ အရွယ် လူကြီးများကို ပအိုဝ်းပြည်သူ့စစ် (PNO) က လက်နက်မပေးဘဲ ရွာအနီးနားတွင် အလှည့်ကျကင်းစောင့်ခိုင်းကာ မစောင့်လျှင် ဒဏ်ကြေးများ ပေးဆောင်နေရကြောင်း ကိုယ်တိုင်ကြုံတွေ့ရသည့် ဒေသခံများပြောပြချက်အရသိရသည်။

” မစောင့် ဘူးဆိုရင်တော့ ပိုက်ဆံတောင်းတယ်။ သွားစောင့်လို့ သူတို့ခေါ်တဲ့ မနက် ၆နာရီ မရောက်လို့နောက်ကျရင်လည်း ပိုက်ဆံ၃၅၀၀၀ ကျပ်ပေးရတယ်။ ရွာတောင်ဖက်ကို (၇)ယောက် စောင့်ရတယ်။ ပုံမှန်ဆို စစ်တပ်က နှစ်ယောက် ရွာသားက နှစ်ယောက် ရွာ အနောက်ပိုင်း အဲလိုခွဲစောင့်ရတယ်။ ရွာသားကို လက်နက်ပေးမကိုင်ထားဘူး”ဟု ဒေသခံလူငယ်တစ်ဦးက သျှမ်းသံတော်ဆင့်ကိုပြောသည်။

ထိုသို့ လုံခြုံရေးယူကာ ကင်းစောင့်နိုင်ရန်အတွက် PNO မှ ကျေးရွာများတွင် အဖွဲ့များသတ်မှတ်ကာ နံနက် ၆နာရီလျှင် ခေါင်းဆောင်အိမ်သို့ သွား၍စုဝေးရကြောင်းသိရသည်။

လက်ရှိ လုံခြုံရေးယူကာ ကင်းစောင့်ခိုင်းသော ကျေးရွာများမှာ တတောက်တို့ ၊ ဟံတနျား၊ တခါးရင်းရွာ၊ လဲင်းတနျား၊ ထီးဗိ၊ ကောင်ဗွာ၊ နှင့် ညောင်မွူးတို့ ဖြစ်ကြသည်။

ယခုကဲ့သို့ လက်နက်မရှိဘဲ လုံခြုံရေးယူကာ ကင်းစောင့်ပေးနေရသည့်အပေါ် ကိုယ့်လူမျိုးလည်ပင်း ကိုယ်ပြန်ညှစ် နေသလိုခံစားရကြောင်း ဒေသခံအမျိုးသမီးတစ်ဦး က ပြောသည်။

“သူတို့ လုံခြုံရေး ကင်းစောင့်ရတဲ့အခါက လက်နက်မရဘူး လက်နက်မရှိဘူးပေါ့နော်။ အဲတခုက စိတ်ပူပန်ရတယ် ရုတ်တရက် သူများတွေ လာခဲ့ရင် သူတို့ ဘယ်လိုခုခံ ကာကွယ်မလဲ ။လက်နက်မရှိတော့ စိတ်တိုတယ်။ သူတို့က ကိုလူမျိုးအချင်းချင်း ဖြစ်ပြီးတော့ ကိုယ်လူမျိုးလည်ပင်ကို ပြန်ညစ်နေတယ် အဲလိုခံစားရတယ်။ “ဟု ၎င်းအမျိုးသမီးက ထပ်လောင်း ပြောသည်။

ပြီးခဲ့သည့် မတ်လက တိုက်ပွဲကြောင့် ပင်လောင်းရှိ ကျေးရွာများစုမှာ စစ်ရှောင်နေကြရသည်။

ယခုလက်ရှိတွင် ပင်းလောင်ဒေသဘက်တွင် ရေကြီးရေလျှံမှုနှင့် မြေပြိုကာ လမ်းပြတ်တောက်မှုများကြောင့် စစ်ဘေးရှောင်နှင့် ဒေသခံများ သွားလာရအခက်ခဲဖြစ်နေကြောင်းသိရသည်။

အလုပ်သင် သတင်းထောက် နန်းလရောင် ရေးသားသည်။