သျှမ်းပြည်မြောက်ပိုင်း မြန်မာအမျိုးသား ဒီမိုကရက်တစ် မဟာမိတ်တပ်မတော် (MNDAA) ထိန်းချုပ်ထားသည့် လားရှိုးမြို့တွင် လက်နက်ချ အညံ့ခံသည့် ရမခ တပ်မိသားစု (၁၀၀၀) နီးပါးကို ခရီးစရိတ် (၅၀၀၀၀) ကျပ်စီ ပေးပြီး ပြန်လွှတ်ပေးလိုက်ကြောင်း ဩဂုတ်လ ၇ ရက်နေ့က သတင်းထုတ်ပြန်သည်။

ဩဂုတ်လ ၆ ရက်နေ့တွင် အရှေ့မြောက်တိုင်း စစ်ဌာနချုပ် ရခမ မှ ဖမ်းဆီးရမိသော စစ်သုံ့ပန်း မိသားစုဝင် ၃၈၅ ဦးကို လွှတ်ပေးပြီးနောက် ယမန်နေ့ (ဩဂုတ်လ ၇ ရက်) တွင် စစ်သုံ့ပန်း မိသားစုဝင် ၄၄၅ ဦးတို့ကို MNDAA နိုင်ငံရေးဌာန ရှေ့တန်းလုပ်ငန်းအဖွဲ့မှ အိမ်ထောင်စု တစ်စုစီအတွက် ခရီးစရိတ် ငွေကျပ် (၅၀၀၀၀) ကျပ်ပေး၍
နေရပ်သို့ ပြန်နိုင်ရန် လွှတ်ပေးခဲ့ခြင်းဖြစ်သည်။

ကိုးကန့်တပ်ဖွဲ့ MNDAA ၏ စစ်သုံ့ပန်းများအား ဆက်ဆံရေးမူဝါဒကို အကောင်အထည် ဖော်ခြင်းအဖြစ် ၂၀၂၃ ခုနှစ် “၁၀၂၇ စစ်ဆင်ရေး”အတွင်း လက်နက်ချခဲ့သော စစ်ကောင်စီတပ်သားများနှင့် မိသားစုဝင်များအား ခရီးစရိတ်ပေးပြီး ဘေးကင်းရာသို့ ရောက်ရှိနိုင်ရန် ယာဉ်များကိုပါ စီစဉ်ပေးခဲ့ကြောင်း ကိုးကန့်မီဒီယာတွင် ဖော်ပြထားသည်။

သို့သော် စစ်ခေါင်းဆောင် မင်းအောင်လှိုင်သည် ကိုးကန့်တပ် MNDAA ကို ၎င်း၏ မိန့်ခွန်းတွင် ရှုတ်ချပြောဆိုခဲ့ပြီး ကိုးကန့်တပ်သည် စစ်ကောင်စီတပ်သားများနှင့် မိသားစုဝင်များကို ဖမ်းဆီကာ ကြမ်းတမ်းစွာ ဆက်ဆံခဲ့ကြောင်း စွပ်စွဲပြောဆိုခဲ့ပြီး လိမ်ညာမှုများသည် နောက်ဆုံးတွင် အဖြေမှန် ပေါ်လာလိမ့်မည်ဟုလည်း MNDAA ဘက်က ပြောသည်။

လားရှိုးမြို့အခြေစိုက် ရမခ တိုင်းစစ်ဌာနချုပ်ကို ကိုးကန့်တပ်ဖွဲ့ MNDAA က တိုက်ခိုက်သိမ်းပိုက်စဉ် ဖမ်းဆီးရမိခဲ့သည့် စစ်သုံ့ပန်း မိသားစုဝင် ၁၀၀၀ ခန့်ကို MNDAA နှင့် PDF ပူးပေါင်းတပ်က ပြန်လည်လွှတ်ပေးခဲ့ရာ ‘ဝ’တပ်ဖွဲ့ UWSA နှင့် သျှမ်းတပ် SSPP/SSA တို့က တဆင့်ကူညီ သယ်ယူပို့ဆောင်ပေးခဲ့ကြောင်း ဒေသခံများထံမှ သိရသည်။

ပြီးခဲ့သည့် နှစ်ဆန်းပိုင်း ဇန်နဝါရီလ ၄ ရက်တွင်လည်း လောက်ကိုင်အခြေစိုက် ဒေသကွပ်ကဲမှုစစ်ဌာနချုပ် (ဒကစ) တပ် လက်နက်ချခဲ့ရာ စစ်ကောင်စီတပ်သား ၂၁၀၀ ကျော်နှင့် မိသားစု၀င် ၁၆၀၀ ကျော်၊ စုစုပေါင်း လူ ၄၀၀၀ နီးပါးကို ကိုးကန့်တပ်ဖွဲ့ MNDAA က လားရှိုးနှင့် ကျိုင်းတုံဘက် ပြန်ပို့ပေးခဲ့သည်။

အလုပ်သင် သတင်းထောက် နန်းဆိုင်ခမ်း ရေးသားသည်။