သျှမ်းပြည်မြောက်ပိုင်း တအာင်းအမျိုးသားလွတ်မြောက်ရေးတပ်မတော်(TNLA)ထိန်းချုပ်ထားသည့် ကွတ်ခိုင်မြို့နယ်တွင် ယနေ့ (ဩဂုတ် ၇) ရက် ညနေပိုင်း ၂နာရီဝန်းကျင်တွင် စစ်ကောင်စီတပ်မှ ပေါင် ၅၀၀ ဗုံး၂ လုံးထပ်မံလာကြဲသွားပြီး လူထိခိုက်မှုမရှိကြောင်း စုံစမ်းသိရသည်။
ယနေ့ (သြဂုတ် ၇)ရက် နေ့လည် ၂နာရီဝန်းကျင်တွင် စစ်ကောင်စီလေကြောင်းဖြင့် ပေါင် ၅၀၀ဗုံး ၂လုံးကို ရဲစခန်း အနီးနှင့် စစ်ကောင်စီတပ်စခန်းဟောင်းတွင် လာရောက်ကြဲသွားကြောင်း ၊ ထိုအနီးရှိ နေအိမ်များပျက်စီးမှုရှိကြောင်း ကွတ်ခိုင်မြို့မှ ဒေသခံ အမျိုးသမီးတစ်ဦးက သျှမ်းသံတော်ဆင့်ကိုပြောသည်။
” ရဲစခန်းနဲ ဗျူဟာကုန်းဘက်က စစ်တပ်ဟောင်းအနားမှာ လာကြဲသွားတယ်။ အဲ့ပတ်ဝန်းကျင်မှာ ရှိတဲ့ အိမ်တွေတော့ ပျက်စီးသွားတယ်။ ဘယ်နှစ်အိမ်လောက်တော့ မသိသေးဘူး။ လူထိခိုက်မှုတော့မရှိဘူး ’’ ဟု ၎င်းကပြောသည်။
ထို့ပြင်ဩဂုတ် ၅ ရက်တွင်လည်း စစ်တပ်မှ ဗုံးလာကြဲပြီးနောက် ပြည်သူများကြေက်ရွံ့ပြီး သတိရှိရှိဖြင့် နေရန်လိုအပ်ကြောင်း အသက် ၃၀ အမျိုးသားတစ်ဦးက သျှမ်းသံတော်ဆင့်ကို ထပ်မံပြောသည်။
‘’အရင်ရက်ကမှ ဗုံးလာကြဲသွားတယ် ။ အရမ်းကိုကြောက်ရွံ့နေပြီ ။ သတိနဲ့ပဲနေနေရတယ်။ နောက်ထပ်ဘယ်ချိန်မှ ထပ်လာကြဲမလဲဆိုတဲ့စိတ်နဲ့ ကြောက်ကြတယ် ‘’ဟု ၎င်းအမျိုးသားက ပြောသည်။
စစ်ကောင်စီသည် ဩဂုတ် ၅ရက်တွင်လည်း ကွတ်ခိုင်မြို့မဈေးကို လေကြောင်းဖြင့် ဗုံးကြဲသဖြင့် အရပ်သား ၆ဦး သေဆုံးကာ ၁၀ဦးဒဏ်ရာရရှိခဲ့ပြီး စျေးဆိုင်ခန်းပေါင်း ၄၀၀ကျော် မီးလောင်ပျက်စီးခဲ့သည်။
စစ်ကောင်စီသည် တိုက်ပွဲဖြစ်ပွားခြင်းမရှိသည့် မြို့ ၊ ရွာများရှိ ဈေး၊ စာသင်ကျောင်း၊ ဆေးရုံစသည့် အဆောက်အုံးများကို တိုက်လေယာဥ်ဖြင့် ဗုံးကြဲတိုက်ခိုက်နေ၍ တားဆီးဟန်တားပေးရန် အိမ်နီးချင်း တရုတ်နှင့် နိုင်ငံတကာသို့ မြောက်ပိုင်းမဟာမိတ်သုံးဖွဲ့က ဩဂုတ် ၆ ရက်တွင် တောင်းဆိုထားသည်။
ကွတ်ခိုင်မြို့နေထိုင်သူများအနေဖြင့် စစ်ကောင်စီဘက်မှ လေကြောင်းဖြင့် ဗုံးလာရောက်ထပ်မံကြဲခြင်း၊ တိုက်ပွဲများ ထပ်မံဖြစ်မည်ကို စိုးရိမ်နေကြသည်။
ကျောက်မဲမြို့တွင် စစ်ကောင်စီတပ်စခန်းများအဖြစ် ကျန်ရှိနေသော အမှတ် (၁) စစ်ဆင်ရေး ကွပ်ကွဲမှုဌာနချုပ် စကခ -၁ ၊ ခြေမြန်တပ်ရင်း ခမရ (၅၀၁) နှင့် (၅၀၂) တို့ ရှိနေသည်။
လက်ကျန်စခန်းသိမ်းတိုက်ပွဲအတွင်း စစ်ကောင်စီတပ်က စခန်းကုန်းအနီးတဝှိက်နှင့် ပတ္တမြားစေတီအနီး၊ ဂေါက်ကွင်းအနီးနှင့် ခမရ -၅၀၁ စခန်းနီးသို့ နှစ်ရက်အတွင်း စစ်ကောင်စီတပ်က ဂျက်ဖိုက်တာလေယာဉ်ဖြင့် ၁၆ ကြိမ် တိုက်ခိုက်ခဲ့ကြောင်း၊ ၎င်းတို့တပ်စခန်းသို့ ထောက်ပို့လေယာဉ် Y 12 ဖြင့် လက်နက်ခဲယမ်း ၂၂ ထုတ် လာရောက်ကြဲချခဲ့ကြောင်း သိရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments