ထိုင်းနိုင်ငံရောက် မြန်မာရွှေ့ပြောင်းအလုပ်သမား အမျိုးသားတစ်ဦးသည် အိပ်မောနေသည့် ဇနီးဖြစ်သူ၏ ပါးစပ်ထဲသို့ ဗြောက်အိုးထည့်ပြီး ဖောက်ခဲ့သဖြင့် ပွဲချင်းပြီးသေဆုံးခဲ့ကြောင်း ထိုင်းမီဒီယာများတွင် ဖော်ပြထားသည်။​

ဖြစ်စဉ်မှာ ထိုင်းနိုင်ငံ မဲဟောင်ဆောင်မြို့နယ် မောက်စံပယ်အုပ်စုရှိ ရပ်ကွက် ၄ တွင် ဖြစ်ပွားခဲ့ပြီး တိုင်းကြားမှုအရ ရဲတပ်ဖွဲ့များက ယမန်နေ့ (သြဂုတ် ၆ )ရက်တွင် မှုခင်းနေရာသို့ သွားရောက်စစ်ဆေးခဲ့သည်။​

မှုခင်းဖြစ်ပွားသည့်နေရာတွင် သေဆုံးနေလျက်ရှိသည့် အသက် ၅၃ နှစ်ရွယ် ပါလင်း၏ ပါးစပ်မှာ စုတ်ပြတ်သတ်ပြီး အိပ်ယားခင်းထဲတွင်လည်း ကျွတ်ကျနေသည့် သွားများတွေ့ရှိထားကြောင်း သတင်းများတွင်ရေးသားထားသည်။

ထို့ပြင်၎င်း၏ မျက်နှာတွင်လည်း မည်သူမည်ဝါ ခန့်မှန်း၍ မရနိုင်အောင် ဒဏ်ရာများစွာရရှိထားကြောင်း၊ အခန်းထဲတွင်လည်း မဖောက်ရသေးသည့် ဗောက်အိုးအချို့လည်းတွေ့ရှိကြောင်း ဆိုထားသည်။

အဆိုပါမှုခင်းနှင့် ပတ်သက်၍ သေဆုံးသွားသူ၏ ခင်ပွန်းဖြစ်သူ အသက် ၅၄ နှစ်အရွယ် လုံးရွမ်းက သူသတ်ခဲ့တာ မဟုတ်ကြောင်း၊ အခန်းထဲကို ဘယ်သူဝင်လာပြီး သူ့ဇနီးကို သတ်သွားမှန်းမသိကြောင်း၊ ညအချိန် ပေါက်ကွဲသံတစ်ခုမျှလည်း မကြားရကြောင်း ငြင်းဆိုထားသည်။

သို့သော် ပတ်ဝန်းကျင်များ၏ပြောပြချက်အရ လုံးရွမ်းသည် အမြဲအရက်သောက်မူးယစ်နေပြီး မကြာခဏ ၎င်း၏ဇနီးဖြစ်သူနှင့် ရန်ဖြစ်စကားများဖူးသူဖြစ်သည်။

ပြီးခဲ့သည့် သြဂုတ် ၄ ရက် ဥပုလ်နေ့တွင် ပါလင်းသည် ဘုန်းကြီးကျောင်းတွင် ဥပုလ်သွားစောင့်ပြီး ပြန်လာပြီး အသတ်မခံရသည့်အချိန်ထိ ၎င်းတို့လင်မယား၂ဦးသည် ရန်ဖြစ်စကားများသံကိုကြားနေရသည်ဟု ပတ်ဝန်းကျင်ပြောပြချက်အရကြောင်း ထိုင်းမီဒီယာတွင်ရေးသားထားသည်။

ထို့ကြောင့် ပါလင်းကို သတ်သွားသူမှာ ၎င်း၏ခင်ပွန်းဖြစ်သူ လုံးရွမ်းကိုယ်တိုင်ဖြစ်နိုင်သည်ဟု ဆိုပြီး ရဲတပ်ဖွဲ့က သံသယဖြင့် ဖမ်းဆီးကာ စစ်ဆေးနေကြောင်း သိရသည်။