သျှမ်းပြည် သိန္နီမြို့ကို ကိုးကန့်တပ်ဖွဲ့ MNDAA မှထိန်းချုပ်လာပြီးနောက် စစ်ကောင်စီတပ်သည် မြို့ပေါ်သို့ လေကြောင်းဖြင့် ဗုံးကြဲတိုက်ခိုက်မှုကြောင့် တစ်လအတွင်း အရပ်သား ၁၃ ဦးသေဆုံးသွားခဲ့သည်ဟု ရှမ်းလူ့အခွင့်အရေးမဏ္ဍိုင် SHRF က သြဂုတ် ၆ ရက်မှာ ထုတ်ပြန်ထားသည်။

“၁၀၂၇ စစ်ဆင်ရေး” ဒုတိယလှိုင်းအဖြစ် MNDAA နှင့် ၎င်းမဟာမိတ်တပ်ဖွဲ့များ လားရှိုးမြို့ကို စတင်တိုက်ခိုက်သည့် ဇူလိုင်လ ၁၃ ရက်မှစတင်ခဲ့ပြီး စစ်ကောင်စီတပ်သည် လေယာဉ်ဖြင့် သိန္နီမြို့ရဲစခန်း အနီးသို့ ပေါင် ၅၀၀ ဗုံး သုံးလုံးကြဲချခဲ့သဖြင့် အရပ်သားနေအိမ် ၁၀ လုံးခန့်ပျက်စီးခဲ့သည်ဟု ထုတ်ပြန်ချက်၌ ဖော်ပြထားသည်။

ယင်းနောက် သိန္နီမြို့ ရပ်ကွက် ၁ ၊ ၂ ၊ ၃ နှင့် ဝိန်းနန်း (ရပ်ကွက် ၄ )၊ မိုင်းလီကျေးရွာအား စစ်ကောင်စီတပ်က လေကြောင်းဖြင့် ဗုံးကြဲတိုက်ခိုက်ခဲ့ရာ ဇူလိုင်လ တစ်လတည်းတွင် အရပ်သား ၁၂ ဦးသေဆုံးပြီး ၂၄ ဦး ဒဏ်ရာရရှိခဲ့ကြောင်း ဆိုသည်။

“စစ်ကောင်စီဘက်ကတော့ သူတို့အနေနဲ့ တိုက်ပွဲတွေမနိုင်လို့ လူထုကိုရမ်းပြီးမှပစ်တယ်။ ဒါတမင်သက်သက် လူထုကို ထိခိုက်နစ်နာအောင်လုပ်တယ်လို့ မြင်တယ်” ဟု ရှမ်းလူ့အခွင့်အရေးမဏ္ဍိုင် SHRF ၏ တာဝန်ခံ ယိင်းလျန်းဟန်က ပြောသည်။

ထို့အပြင် တရုတ်သဘာဝဓာတ်ငွေ့ပိုက်လိုင်းတစ်လျောက်ရှိ ကျေးရွာနှင့် မြို့တွင်လည်း နှစ်ပတ်သာ ကာလအတွင်း စစ်ကောင်စီ၏ လေကြောင်းတိုက်ခိုက်မှုနှင့် လက်နက်ကြီးပစ်ခတ်မှုကြောင့် အရပ်သား ၄၆ ဦးသေဆုံးပြီး၊ ၃၅ ဦးဒဏ်ရာရရှိထားကြောင်း SHRF က ထုတ်ပြန်ထားသည်။

ထိုထိခိုက်သေဆုံးမှုသည် TNLA၊ MNDAA နှင့် PDF တပ်ဖွဲ့တို့၏ “၁၀၂၇ စစ်ဆင်ရေး” ဒုတိယပိုင်းစတင်သည့် ဇွန်လ ၁၉ ရက်မှ ဇူလိုင်လ ၄ ရက်အထိ ကာလအတွင်း စစ်ကောင်စီတပ်၏ လေကြောင်း ဗုံးကြဲတိုက်ခိုက်ခံရခြင်း ဖြစ်ကြောင်း ဖော်ပြထားသည်။

လက်ရှိ တိုက်ပွဲဖြစ်ပွာခြင်းမရှိဘဲ TNLA ထိန်းချုပ်ထားသည့် ကွတ်ခိုင်မြို့နှင့် MNDAA ထိန်းချုပ်ထားသော လောက်ကိုင်၊ သိန္နီမြို့တို့ကို စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်နေလျက်ရှိသည်။