သျှမ်းပြည် တောင်ကြီးမြို့အတွင်း ထောက်ခံစာဖြင့် စက်သုံးဆီများကို တန်းစီဝယ်ယူနေရမှုကြောင့် ခရီးသည်တင် လိုင်းကားပြေးဆွဲသူများအတွက် ယခင်ကထက်ပိုကြပ်တည်းလာကြောင်းစုံစမ်းသိရသည်။
ပြီးခဲ့သည့် (ဇူလိုင်လ ၃၁)ရက်မှစတင်ပြီး တောင်ကြီးမြို့တွင် စက်သုံးဆီရောင်းချနေသည့် ဆိုင်ကြီးများတွင် ထောက်ခံစာဖြင့် တန်းစီပြီး စက်သုံးဆီကို ဝယ်ယူနေရသကဲ့သို့ စက်သုံးဆီ စျေးနှုန်းများလည်း တရိပ်ရိပ် မြင့်တက်လာခဲ့သည်။
ထို့ကြောင့် စက်သုံးဆီများကို တန်းစီ၍ဝယ်ယူနေရပြီး အကန့်သတ်ဖြင့်ရောင်းချပေးနေသည့်အတွက် ခရီးသည် တင်လိုင်းကားများ ပြေးဆွဲရန် အခက်အခဲကြုံတွေ့နေကြပြီး ဆီများပြတ်လပ်သွားမည်ကို စိုးရိမ်နေရ ကြောင်း ကားသမားတစ်ဦးက သျှမ်းသံတော်ဆင့်ကို ပြောသည်။
“ကာာတွေထွက်ဖို့ဆိုရင် ဆီထည့်ဖို့ကို တစ်ရက်လောက်အချိန်ကုန်တယ်။ ဆီကအကန့်အသတ်နဲ့ တစ်ဆိုင်ပြီး တစ်ဆိုင်ဝင်ဖြည့်နေရတာ။ တခါတလေတန်းစီပြီးစောင့်နေတာတောင် မရတာရှိတယ်။ အရင်လို ဒီနေ့ရောက်ရက် မနက်ဖြန်ချက်ချင်း ထွက် လို့အဆင်မပြေတော့ဘူး။ ခုတောင် ဆီနည်းရင် ကားထွက်မရတော့ဘူး ဆီတွေ ပျက်မှာကိုလည်း ပိုစိုးရိမ်ရတယ် ” ဟု ကားသမားတစ်ဦက သျှမ်သံတော်ဆင့်ကို ပြောသည်။
ထို့အပြင် တောင်ကြီး-မိုင်းရှူးမြို့သို့ သွားရာလမ်းရှိ မြို့ဝင်ဂိတ်များတွင် နံနက် (၆)နာရီမှ ညနေ(၆)နာရီသာ ဖြတ်သန်းသွားလာခွင့်ပြုသဖြင့် လိုင်းကားများအတွက် အဆင်မပြေမှုများ ကြုံတွေ့နေရကြောင်း ကားသမား တစ်ဦးက ဆက်ပြောသည်။
“ ဒီချိန်ကတော့ အခက်အခဲအမျိုးမျိုးပါပဲ။ ဂိတ်တွေကလည်း အချိန်နဲ့ဖြတ်သန်းရတော့ ခက်ခဲတယ်။ ဆီဖြည့် ဖို့အတွက် တန်းစီရတာတော့တရက်အချိန်ပေးရတယ်။ ညနေ (၆)နာရီကိုယ်သွားလိုတဲ့ခရီးမရောက်ရင် တည်းခိုရတာ အချိန်ထပ်ကုန်တာပေါ့” ဟု ၎င်းက ဆိုသည်။
ယခင်တွင် တောင်းကြီး-မိုင်းရှူးကို အချိန် ၆နာရီသာ မောင်းနှင်ရပြီး၊ လမ်းချော်ခြင်း၊ ကားလမ်းပိတ်ဆို့မှုဖြစ်ခြင်း၊ စစ်ရေးဖြစ်ပွားပါက ကားသမားများအတွက် အခက်အခဲများစွာကြုံရကြောင်း သိရသည်။
လက်ရှိမှာ တောင်ကြီး-မိုင်းရှူး ခရီးသည် တစ်ဦးလျှင် ကားခ ကျပ်ငွေ ( ၅သောင်း ) ပေးဆောင်ရသည်။
တောင်ကြီးမြို့ စက်သုံးဆီ ဈေးနှုန်း 92 တစ်လီတာလျှင် ၂၈၇၅ ကျပ် ၊ 95 တစ်လီတာလျှင် ၃၀၀၀ ကျပ်ဖြင့် ရောင်းချပေးနေသော်လည်း ကားတစ်စီးလျှင် ၂ သောင်းကျပ် မှ ၅ သောင်းကျပ် ၊ ဆိုင်ကယ်တစ်စီးလျှင် ၅ ထောင်ကျပ်ဖြင့် အကန့်အသတ်သာ ဖြည့်ပေးနေကြောင်း သိရသည်။
နိုင်ငံခြား ငွေလဲလှယ်နှုန်းကြောင့် စက်သုံးဆီရောင်းချရန် သိုလှောင်ထားသည့် ဆီများ မရှိသည့်အတွက် ဆိုင်အများအပြား ပိတ်ထားရကြောင်း၊ စက်သုံးဆီ သိုလှောင်ပြီး ရောင်းချနေသည့် ဆိုင်များလည်း အဆမတန် စျေးနှုန်းမြှင့်ကာ ရောင်းချနေမှုကြောင့် ပြည်သူများ အခက်ကြုံနေရကြောင်း သိရသည်။
Leave a Comments