သျှမ်းပြည်တောင်ပိုင်း၊ ညောင်ရွှေမြို့နယ်တွင် လွိုင်ကော်မှ စစ်ဘေးရှောင်လာသော လူငယ်တစ်ဦး အသတ်ခံရကြောင်း စုံစမ်းသိရှိရသည်။
အဆိုပါ အသတ်ခံရပြီး သေဆုံးသွားသည့် စစ်ရှောင်လူငယ်သည် အေးသာယာမြို့ နည်းပညာတက္ကသိုလ်တွင် ပထမနှစ်တက်ရောက်နေသော ကျောင်းသားတစ်ဦးဖြစ်ပြီး ဩဂုတ်လ ၂ ရက် သောကြာနေ့ညနေတွင် အေးသာယာမြို့မှ စစ်ရှောင်ရင်းနေထိုင်ရာ ညောင်ရွှေမြို့သို့ ပြန်လာစဉ် လမ်းတွင် အသတ်ခံခဲ့ရခြင်းဖြစ်သည်။
“ရဲတွေကတော့ တရားခံတော့မိထားပြီလို့ပြောတယ်၊ ဘာမှအရေးထပ်ယူတယ်လို့တော့ မကြားသေးဘူး၊ သေဆုံးသွားတဲ့သူ ရဲ့ ဆိုင်ကယ်ကိုလည်း ရဲတွေသိမ်းထားတယ်၊ သူငယ်ချင်း အချင်းချင်းဖြစ်တယ်လို့လည်းပြောကြတယ်” ဟု နီးစပ်သူတစ်ဦးက ပြောသည်။
အဆိုပါကိစ္စကြောင့် ညောင်ရွှေမြို့သို့ရောက်ရှိနေသည့် စစ်ဘေးရှောင်များသည်လည်း စိုးရိမ်ထိတ်လန့်နေကြရကြောင်း သိရသည်။
အဆိုပါ အေးသာယာ-စက်မှုဇုန်-ညောင်ရွှေလမ်းသည် ဆိုင်ကယ်လုယက်မှုများ မကြာခဏဖြစ်ပွားလျက်ရှိပြီး လူထိခိုက်မှုများပါရှိနေကြောင်း သိရသည်။
၂၀၂၄ ခုနှစ် ဇန်နဝါရီလတွင်လည်း ဆိုင်ကယ်လုယက်မှုဖြစ်ပွားခဲ့ကြောင်း ဒေသခံအမျိုးသမီးတစ်ဦးက သျှမ်းသံတော်ဆင့်ကိုပြောသည်။
“မောင်လေးတစ်ယောက် အေးသာယာကပြန်တာ ဆိုင်ကယ်လုခံရတာ ဌက်ကြီးတောင်ဓားလည်းပါတယ်၊ လူကတော့ လွတ်အောင်ပြေးခဲ့ရတယ် လက်နဲ့ ခြေထောက်မှာလည်း ဒဏ်ရာရခဲ့တယ်” ဟု ထိုအမျိုးသမီးကပြောသည်။
လုယက်မှုများဖြစ်နေသော်လည်း စစ်ကောင်စီ လက်အောက်ခံ ရဲဌာနမှ အရေးယူဆောင်ရွက်ခြင်းမရှိကြောင်း လည်းသိရသည်။
အလုပ်သင် သတင်းထောက် ယူဂျင်း ရေးသားသည်။
Leave a Comments