သျှမ်းပြည် တောင်ပိုင်း ဆီဆိုင်မြို့နယ် အတွင်း တိုက်ပွဲ ထပ်မံဖြစ်ပွားသဖြင့် ဒေသခံများ ဘေးလွတ်ရာသို့ ထပ်ထွက်ပြေး တိမ်းရှောင်နေရကြောင်း စုံစမ်းသိရသည်။
သျှမ်းပြည်တောင်ပိုင်း၊ဆီဆိုင်မြို့နယ်၊ လွယ်သွဝ်ရွာနှင့် လွယ်ထွယ်ရွာ တို့တွင် ယနေ့ (သြဂုတ် ၆) မနက်ပိုင်းမှစပြီး ပအိုဝ်းအမျိုးသားလွတ်မြောက်ရေးတပ်မတော် (PNLA)နှင့် စစ်ကောင်စီ၊ ပအိုဝ်းပြည်သူ့စစ် (PNO) တို့ တိုက်ပွဲ ဖြစ်ပွားနေမှုကြောင့် ဒေသခံများ ထပ်မံ ထွက်ပြေးတိမ်းရှောင်နေကြရကြောင်း လွယ်ထွယ်ကျေးရွာ ဒေသခံတစ်ဦးက သျှမ်းသံတော်ဆင့်ကိုပြောသည်။
” ဒီမနက်ပဲ ထမင်းတောင် ပြီးအောင်မစားလိုက်ရဘူး။ ဝုန်း ဒိုင်းဆိုတာနဲ့ ထမင်းပန်းကန်ပစ်ချပြီး ပြေးခဲ့ရတာပဲ။ ဘာအထုတ်မှလည်း မသိမ်းလိုက်ရဘူး။ အသက်ဘေးလွတ်ရုံပြေးခဲ့ရတာ။” ဟု လွယ်ထွယ်ရွာ ဒေသခံ တစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် သြဂုတ်လ ၄ ရက်မှစပြီး စစ်ကောင်းစီဖက်မှ PNLA ထိန်းချုပ်နယ်မြေ ဗန်းမတ်ဘက်သို့ လက်နက်ကြီးများဖြင့် စတင်ပစ်ခဲ့သည်။
” အခု လွယ်ထွယ် နဲ့ လွယ်သွတ်တောင်ရှေ့ အုပ်စုထဲက အကုန်ပြေးကြပြီ။ ခုမနက်မှ ထပြေးကြတာ။ အရင်ကတော့ သတိပေးတာ ဘာညာရှိတာပေါ့။ ကြိုမရှောင်ထားကြဘူး။ ခုထိတော့ ထိခိုက်တာမကြားရသေးပါဘူး။”ဟု ဒေသခံအမျိုးသားတစ်ဦးက ဆိုသည်။
လက်ရှိဆီဆိုင်မြို့နယ်ရှိ တိုက်ပွဲ ဖြစ်ပွားရာ အနီးတဝိုက် ကျေးရွာများလည်း ထွက်ပြေးတိမ်းရှောငိနေကြရပြီး ခန့်မှန်းခြေ ၈၀၀ နီးပါး စစ်ဘေးရှောင်နေရကြောင်းသိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments