သျှမ်းပြည်တောင်ပိုင်းသို့ ရောက်ရှိနေသည့် စစ်ဘေးရှောင်များသည် (၈)လကျော်ကြာလာပြီး အိမ်ငှားခများ ယခင်က စျေးနှုန်းမြင့်တက်သဖြင့် အခက်အခဲကြုံနေရကြောင်း သတင်းရရှိသည်။

အဆိုပါ သျှမ်းပြည်တောင်ပိုင်းသို့ ရောက်ရှိနေသည့် စစ်ဘေးရှောင်များသည် ကရင်နီပြည် (ကယားပြည်နယ်) မှ “၁၁.၁၁ စစ်ဆင်ရေး” နှင့် သျှမ်းပြည်မြောက်ပိုင်း “၁၀၂၇စစ်ဆင်ရေး” တိုက်ပွဲကြောင့် ထွက်ပြေးလာသည့်သူများ ဖြစ်သည်။

“အိမ်ရှင်က မနေ့ဖုန်းဆက်လာတယ်။ လက်ရှိအိမ်ကိုအငှားရပ်မလို့တဲ့ ခုလက်ရှိလစာနဲ့ အဆင်မပြေတော့ဘူး။ အိမ်လခတိုးချင်တယ်ဆိုလည်း ပြောလို့ရတယ်။ တစ်လလောက်ကြိုပြောပေးရင်ကောင်းတာပေါ့ ။ အခု က နှစ်ပတ် နဲ့ အိမ် ဘယ်လိုရှာရမှာလဲ။ ဒုက္ခရောက်တယ်” ဟု ညောင်ရွှေမြို့သို့ ရောက်ရှိနေသော အသက် ၄၇ နှစ်အရွယ်ရှိ စစ်ဘေးရှောင် အမျိုးသမီး တစ်ဦးက ပြောသည်။

ထိုစစ်ဘေးရှောင်များသည် သျှမ်းပြည်တောင်ပိုင်း တောင်ကြီးမြို့၊ အောင်ပန်းမြို့ နှင့် ညောင်ရွှေမြို့ရှိ နေအိမ်များတွင် ငှားရမ်းနေရသည်။

“တချို့ဆို ခြံဝယ်အိမ်ဆောက်ပေါ့။ မတတ်နိုင်သေးတဲ့စစ်ရှောင်တွေကတော့ ခုမိုးတွင်းလည်းဖြစ် အရောင်းအဝယ်က မဖြစ်နဲ့ဆိုတော့ ဒုက္ခရောက်တာပေါ့။ ကျမနတို့ ရပ်ကွက်နား အဆောင်မှာ တစ်လ ငါးသောင်းကျပ် နဲ့ နေတဲ့အဖွဲ့တွေတောင် စားစရာပြတ်ကုန်ပြီ” ဟု ၎င်းက ဆက်ပြောသည်။

လက်ရှိတွင် “၁၀၂၇” စစ်ဆင်ရေးနောက်ဆက်တွဲတိုက်ပွဲများကြောင့် သျှမ်းမြောက်မှ စစ်ဘေးရှောင်များလည်း ရောက်ရှိလာသည့်အတွက် နေရာထိုင်ခင်း အခက်အခဲများရှိလာကြောင်းကိုလည်း လူမှုကူညီရေး အသင်းများထံမှ သိရသည်။

လက်ရှိတွင် သျှမ်းပြည်တောင်ပိုင်းတွင် စစ်ဘေးတိမ်းရှောင်နေရဆဲအရပ်သား ဦးရေ (၅၃၄၀၀) ဦးခန့်ရှိပြီး ထိုအထဲမှ ၁၅၀၀၀ နှင့် အထက်သည် ကရင်နီပြည်မှ စစ်ဘေးရှောင်ပြည်သူများဖြစ်ကြောင်း Pa-o Youth Organization (PYO) ၏ ထုတ်ပြန်ချက်တွင်ဖော်ပြထားသည်။

အလုပ်သင် သတင်းထောက် ယူဂျင်း ရေးသားသည်။