မြန်မာ-ထိုင်းနယ်စပ် တာချီလိတ်မြို့ပေါ်တွင် ယခုရက်ပိုင်း မိုးဆက်တိုက် ရွာသွန်းမှုကြောင့် မယ်ဆိုင်ချောင်းရေ မြင့်တက်လာပြီး အနိမ့်ပိုင်းရပ်ကွက်များ ရေကြီးရေလျှံမှု ကြုံတွေ့နေရကြောင်း သတင်းရရှိသည်။
တာချီလိတ်မြို့တွင် မိုးသည်းထန်စွာ ရွာသွန်းမှုကြောင့် ယမန်နေ့ ( သြဂုတ်လ ၁) ရက်မှ စတင်၍ မယ်ဆိုင်ချောင်းရေ မြင့်တက်လာပြီး အနိမ့်ပိုင်း ရပ်ကွက်များဖြစ်သည့် မယ်ခေါင်ရပ်ကွက်၊ ဆန်ဆိုင်း (ခ) ရပ်ကွက်၊ တာလော့ဈေးတန်း အနီးတစ်ဝိုက်နှင့် မြို့ပတ်လမ်းတစ်လျှောက် ရေကြီးရေလျှံမှုများ ကြုံတွေ့နေရကြောင်း တာချီလိတ်မြို့ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“မနေ့ မနက်က မယ်ဆိုင်ချောင်းရေ စတက်တယ်။ ညကျတော့ ရပ်ကွက်တွေထဲထိ ရေတက်လာတယ်။ အဲ့အနီးတဝိုက်နဲ့ မြေနိမ့်ပိုင်းတွေက ရေခဏ ခဏကြီးတယ်။ တာချီလိတ်မှာ အဲ့လိုရေတွေတက်ရင် ဆိုင်ဖွင့်ထားတဲ့ လူတွေဆို ပစ္စည်းပြောင်းရွှေ့ရတာ ခက်တယ်။ လေးတဲ့ပစ္စည်းတွေဆို မ,ရခက်တယ်။ လမ်းလည်း သွားလာရ ခက်တယ်”ဟု တာချီလိတ်မြို့ ဒေသခံ အမျိုးသား တစ်ဦးက ပြောသည်။
တာချီလိတ်မြို့တွင် ယခင်နှစ်များကတည်းက မိုးရာသီရောက်တိုင်း ရေကြီးရေလျှံမှုများ နှစ်စဉ်နှစ်တိုင်း ဖြစ်ပွားလေ့ရှိသော်လည်း သက်ဆိုင်ရာ တာဝန်ရှိသူများမှ အရေးယူ ဖြေရှင်းပေးခြင်း မရှိကြောင်း ဒေသခံများက ပြောသည်။
တာချီလိတ်မြို့ အနီးတဝိုက်တွင် ရွှေတူးဖော်ခြင်း၊ သတ္တုတွင်းတူးဖော်မှုများ အလွန်အကျွံ တူးဖော်မှုကြောင့် သစ်တောပြုန်းတီးလာကာ မိုးဆက်တိုက် ရွာသွန်းမှု၊ မိုးသည်းထန်စွာ ရွာသွန်းပါက ရေကြီးရေလျှံမှုများ နှစ်စဉ်နှစ်တိုင်း ဖြစ်ပွားလာသည်။
ယခုနောက်ပိုင်း သျှမ်းပြည်အရှေ့ပိုင်း တာချီလိတ်မြို့နယ်အတွင်း သယံဇာတ ဓာတ်သတ္တု တူးဖော်မှုများကို တွင်တွင်ကျယ်ကျယ် ပြုလုပ်နေကြသဖြင့် သဘာဝပတ်ဝန်းကျင်များသည် ယခင်ကထက် ပျက်စီးကာ မိုးရာသီတွင် ရေကြီးရေလျှံမှု ဖြစ်ပြီး၊ နွေရာသီတွင် ရေခန်းခြောက်မှုကို ပြည်သူများ ကြုံတွေ့လာရသည်။
Leave a Comments