သျှမ်းပြည်မြောက်ပိုင်း လားရှိုးမြို့တွင်း စစ်ကောင်စီတပ်နှင့် ကိုးကန့်တပ်ဖွဲ့ (MNDAA) တို့သည် ယနေ့ (ဇူလိုင် ၁၉ ရက်) နံနက်အစောပိုင်းမှ စတင်ကာ စစ်ရေးပြန်လည် ပြင်းထန်နေကြောင်း စုံစမ်းသိရသည်။
အရှေ့မြောက် တိုင်းစစ်ဌာနချုပ် ရမခ အခြေစိုက်ရာ လားရှိုးမြို့ကို ထိုးစစ်ဆင် တိုက်ခိုက်နေသည့် ကိုးကန့်တပ်ဖွဲ့ MNDAA သည် လေးရက်ကြာ တစ်ဖက်သက် စစ်ရေးရပ်ဆိုင်းခဲ့ပြီးနောက် ယနေ့ (ဇူလိုင်လ ၁၉ ရက်) နံနက်အစောပိုင်းမှ စတင်ပြီး လက်ရှိသတင်းရေးသားချိန်အထိ စစ်ရေးပြန်လည် ပြင်းထန်နေသည်ဟု ဒေသခံများ ပြောပြချက်အရ သိရသည်။
“ဒီနေ့ အခြေအနေ အရမ်းဆိုးတယ်။ လားရှိုးမုခ်ဦး အနီးမှာရှိတဲ့ ခလရ-၄၁ တပ်မှာ တိုက်ပွဲပြင်းထန်နေတယ်။ မနက်က စစ်ကောင်စီတပ်က လေယာဉ်နဲ့ လာပြီး ဗုံးကြဲသေးတယ်။ ၄၁- တပ်ထဲမှာလည်း မီးလောင်တာ ကြမ်းတယ်” ဟု လားရှိုးမြို့ တိုက်ပွဲအတွင်း ပိတ်မိနေသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
လားရှိုးမုခ်ဦးအနီး စစ်ကောင်စီတပ်စခန်းဖြစ်သည့် ခြေလျင်တပ်ရင်း (ခလရ-၄၁)အတွင်းသို့ လက်နက်ကြီးကျပြီး မီးလောင်မှုဖြစ်ပွားခဲ့ကြောင်း လားရှိုးမြို့ ဒေသခံတစ်ဦး၏ လူမှုကွန်ယက် စာမျက်နှာတွင် ရေးသားထားသည်။
လက်ရှိ လားရှိုးမြို့နယ်တွင် ဖုန်းလိုင်းများ၊ အင်တာနက်များနှင့် Wifi များ ပြတ်တောက်နေပြီး အဆက်အသွယ် ပြုလုပ်ရန် ခက်ခဲကြောင်း သိရသည်။
ထို့အပြင် လားရှိုးမြို့တွင်းရှိ စစ်ကောင်စီလက်အောက်ခံ ပြည်သူ့စစ်နေအိမ်ကိုလည်း MNDAA တပ်ဖွဲ့က ဝင်စီးမှုပြုလုပ်ခဲ့ကြောင်း ဒေသခံများက ပြောဆိုနေကြသော်လည်း သျှမ်းသံတော်ဆင့်မှ သီးခြားအတည်ပြုနိုင်ရန် ဆက်လက်စုံစမ်းနေသည်။
Leave a Comments