သျှမ်းပြည် တောင်ပိုင်း စစ်ကောင်စီ၊ ပအိုဝ်းပြည်သူ့စစ် (PNO) ပူးပေါင်းတပ်ဖွဲ့နှင့် ပအိုဝ်း အမျိုးသားလွတ်မြောက်ရေးတပ်မတော် (PNLA) တို့ (၅)လကျော် အတွင်း ဖြစ်ပွားသည့် တိုက်ပွဲကြောင်း အရပ်သား (၉၆)ဦး သေဆုံးခဲ့ကြောင်း စုံစမ်းသိရသည်။
ထိုသေဆုံးသွားသည့် အရပ်သား (၉၆)ဦးသည် သျှမ်းပြည်နယ်တောင်ပိုင်း၊ပင်လောင်း၊ဟိုပုံး၊ဆီဆိုင်၊ညောင်ရွှေ၊ရပ်စောက်မြို့နယ် တို့ဖြစ်ကြောင်း ပအိုဝ်းလူငယ် အစည်းအရုံး ( PYO ) ထုတ်ပြန်ချက်အရသိရသည်။
ယင်းသေဆုံးမှုသည် ဖေဖော်ဝါရီလ၂၁ရက်နေ့မှ ဇူလိူင် ၆ရက်အထိ ဖြစ်ပြီး အများစုမှာ စစ်ကောင်စီနှင့် PNOပြည်သူ့စစ်ဘက်မှ လက်နက်ကြီး၊လေကြောင်း၊ဒရုန်း တိုက်ခိုက်မှုနှင့် ဖမ်းခံရပြီး သတ်ဖြတ်ခံရခြင်းကြောင့် သေဆုံးမှုအများဆုံး ဖြစ်ကြောင်း ထုတ်ပြန်ချက်တွက်ဖော်ပြထားပါသည်။
“သျှမ်းတောင် စစ်ပဋိပက္ခတိုက်ပွဲအတွင်းမှာ အရပ်သားသေဆုံးမှုက (၉၆) ဦးအထိ ရှိလာပြီ ဖြစ်တယ်။ ဒီအချက်အလက် PYO လက်လှမ်းမှီတဲ့အချက်အလက်ပဲ ဖြစ်တယ်။ မြေပြင် သေဆုံးမှုက ဒီထက်ပိုများနိုင်တယ်။ “ဟု PYO တာဝန်ရှိသူ မနန်းက သျှမ်းသံတော်ဆင့်ကိုပြောသည်။
အဆိုပါ သေဆုံးသူ(၉၆) ဦးတွင် အမျိုးသား(၆၆)ဦး ၊ အမျိုးသမီး(၇)ဦး၊ ကလေးငယ်(၁၆)ဦးနှင့် ကျား၊မအတည်မပြုနိုင်ခြင်း (၇)ဦးတို့ပါဝင်ကြောင်း သိရသည်။
ထို့အပြင် တိုက်ပွဲကာလအတွင်း ဒရုန်း၊ လက်နက်ကြီး၊ လေကြောင်း တိုက်ခိုက်မှု နှင့် မြေမြုပ်မိုင်း၊ကြွင်းကျန်လက်နက်ထိမှန်ခြင်းကြောင့် အရပ်သား၁၆၈ဦးလည်း ထိခိုက်ဒဏ်ရာရရှိခဲ့ကြောင်း ထုတ်ပြန်ချက်တွင်ဖော်ပြထားပါသည်။
တိုက်ပွဲဖြစ်ပွားသည့်အတွင်းတွင် စစ်ကောင်စီလေကြောင်းတိုက်ခိုက်မှု (၄၆၉)ကြိမ်၊ လက်နက်ကြီးပစ်ခတ်မှု (၄၂၀၂) ကြိမ်ရှိခဲ့ပြီး အရပ်သားနေအိမ် (၁၀၃၅)လုံး၊ဘာသာရေးအဆောက်အဦး (၃၀)လုံး၊စာသင်ကျောင်း (၁၄) လုံး၊လမ်းတံတား( ၄) ခု၊ဆေးရုံ ဆေးခန်း ( ၄) ခု၊ စျေး (၁) ခုတို့လည်းတိုက်ပွဲအတွင်း ပျက်စီးခဲ့ရကြောင်း သိရသည်။
ယခုတွင် တိုက်ပွဲပြင်းထန်နေဆဲ ဖြစ်သောကြောင့် သျှမ်းတောင်ဒေသခံ ၆၇၈၀၀ဦးနှင့်အထက်လည်း ဘေးကင်းရာ စစ်ဘေးတိမ်းရှောင်နေရဆဲဖြစ်ကြောင်း ပအိုဝ်းလူငယ်အစည်းအရုံး ထုတ်ပြန်ချက်တွင် ရေးသားထားသည်။
Leave a Comments