တိုက်ပွဲများ ပြင်းထန်နေသည့် သျှမ်းမြောက်၊ လားရှိုး ခံစစ် အတွက် စစ်ကောင်စီက စစ်ကူ စစ်သားနှင့် ဆာလာအိတ် သိန်းချီ လေကြောင်း အသုံးပြု ပေးပို့နေသည်ဟု စစ်ရေးသတင်းရင်းမြစ်က ယနေ့ (ဇူလိုင်လ ၁၆ ရက်) တွင် ပြောသည်။

ညီနောင်မဟာမိတ်တပ်များ အပစ်ရပ်ထားသည့် ကာလ လားရှိုးမြို့ မကျဆုံးစေရေး ခံစစ်ပြင်နေရာ သဲ၊ ကျောက်စရစ်နှင့် မြေကြီး စသည်များ ဆာလာအိတ်အတွင်း ထည့်သွင်း၍ ဘန်ကာ၊ ပစ်ကျင်း စသည့် အကာအကွယ်များ တည်ဆောက် ပြင်ဆင်ရာတွင်အသုံးပြုသည်ဟု စစ်ရေးသတင်းရင်းမြစ်က ဆိုသည်။

“အရင်က ဆာလာအိတ် ဆိုတာ သက်ဆိုင်ရာတပ်က နေ့တွက်စားရိတ် (ရိက္ခာစို) ငွေထဲက ဝယ်ရတာ။ အခုက အရေးကြီးတဲ့ အချိန်ဖြစ်လို့လား မသိဘူး ဆာလာအိတ်တွေ သိန်းချီပြီး လေကြောင်းနဲ့ပို့နေတာ။ စစ်ကူကတော့ ရာဂဏာန်းရှိမယ်။ မူဆယ်ကိုလည်း ပို့တယ်” ဟု ၎င်းကရှင်းပြသည်။

ယမန်နေ့က လားရှိုးမြို့ ရမခ စစ်တိုင်းဌာနချုပ်နှင့် စစ်မြေပြင်သို့ စစ်ကူ စစ်သားများနှင့် ဆာလာအိတ်များ သာမက လက်နက် ရိက္ခာများကို ရှေ့တန်း လှုပ်ရှား စစ်ကြောင်းများပေါ် လေကြောင်း အသုံးပြု လေထီးဖြင့် ချပေးခဲ့ကြောင်း သိရသည်။

ပြီးခဲ့သည့် ဇူလိုင်လ ၁၄ ရက် ညသန်းခေါင်မှစ၍ သျှမ်းမြောက်၌ ယာယီ အပစ်အခတ် ရပ်စဲကြောင်း လားရှိုးမြို့ကို ဝိုင်းထားသည့် MNDAA က ညီနောင်မဟာမိတ်တပ်များ ကိုယ်စား ထုတ်ပြန်ထားပြီး တိုက်ပွဲအရှိန် လျော့ကျနေစဥ် စစ်ကောင်စီက ယခုကဲ့သို့ ခံစစ်ပြင်နေခြင်း ဖြစ်သည်။

ယမန်နေ့ (ဇူလိုင် ၁၅)ရက် နံနက်ပိုင်း မှစ၍ လားရှိုးမြို့အနီး တိုက်ပွဲ ဖြစ်ပွားနေပြီး လက်နက်ကြီး လက်နက်ငယ် ပစ်ခတ်သံများ ကြားနေရကြောင်း မြို့တွင်း နေထိုင်နေသူများက ပြောဆိုထားသည်။