သျှမ်းပြည် လောက်ကိုင်မြို့တွင် စစ်ကောင်စီတပ်၏ လေကြောင်းဗုံးကြဲ တိုက်ခိုက်မှုကြောင့် အရပ်သားတစ်ဦး သေဆုံးခဲ့ရကြောင်း ကိုးကန့်တပ်ဖွဲ့ MNDAA က ထုတ်ပြန်လာသည်။

ယမန်နေ့ (ဇူလိုင်လ ၁၄ ရက်) နံနက် ၂ နာရီခန့် လူအများ အိပ်မောကျချိန်တွင် စစ်ကောင်စီတပ်မှ လောက်ကိုင်မြို့ရှိ တုံချိန်ရပ်ကွက်သို့ လေကြောင်းဖြင့် နှစ်ကြိမ် ဗုံးကြဲတိုက်ခိုက်ခဲ့ရာ အရပ်သားတစ်ဦး သေဆုံး၍ အနည်းဆုံး ပြည်သူ(၁) ဦး ထိခိုက်ဒဏ်ရာရရှိခဲ့ပြီး ဟိုတယ်နှင့် အခြားအဆောက်အဦးများ ထိခိုက်ပျက်စီးခဲ့ရကြောင်း The Kokang မီဒီယာမှ သတင်းထုတ်ပြန်လာသည်။

လောက်ကိုင်မြို့ပေါ် စစ်ကောင်စီတပ်မှ လေကြောင်းဗုံးကြဲ တိုက်ခိုက်မှုကြောင့် သေဆုံးခဲ့သူမှာ ဆီအောရွာနေ အသက် (၃၇) နှစ်အရွယ်ရှိ Wang ဆိုသူ အမျိုးသားဖြစ်ပြီး ဦးခေါင်းအနောက်ပိုင်း ထိမှန်ဒဏ်ရာဖြင့် သေဆုံးခဲ့ကာ ဒေသအာဏာပိုင်များမှ မီးသင်္ဂြိုဟ်ပေးခဲ့ကြောင်း သိရသည်။

ထို့အပြင် လောက်ကိုင်မြို့ တုံချိန်ရပ်ကွက် Rainbow တံတားဘေးရှိ Royal Lover Hotel နှင့် Dongcheng International Hotel များအပြင် ဖူလီလိုက်နှင့် ဟွမ်ကျားလိဟွာ ဟိုတယ်များလည်း ထိခိုက်ခဲ့ပြီး ပေါက်ကွဲမှု ပြင်းထန်သောကြောင့် အနီးဝန်းကျင်ရှိ အဆောက်အဦးများလည်း ပျက်စီးသွားကြောင်း ကိုးကန့်မီဒီယာ သတင်းတွင် ဖော်ပြထားသည်။

“၁၀၂၇ စစ်ဆင်ရေး” ဒုတိယပိုင်း စတင်ပြီးနောက် လောက်ကိုင်ဒေသတွင် တိုက်ပွဲဖြစ်ပွားမှု မရှိသော်လည်း စစ်ကောင်စီဘက်က ဗုံးကြဲတိုက်ခိုက်မည်ကို စိုးရိမ်သဖြင့် စာသင်ကျောင်းများ ပိတ်ထားပြီး လေကြောင်းရန် အထူးသတိပြုရန် ကိုးကန့်တပ်ဖွဲ့ MNDAA ၏ အုပ်ချုပ်ရေးအဖွဲ့က ကြေညာခဲ့ကြောင်း ဒေသခံများ ပြောဆိုချက်အရ သိရသည်။

ကိုးကန့်ဌာနချုပ် လောက်ကိုင်မြို့ လေကြောင်းဗုံးကြဲ တိုက်ခိုက်ခံရပြီးနောက် ရမခ အခြေစိုက် လားရှိုးမြို့ကို ထိုးစစ်ဆင်နေသည့် ကိုးကန့်တပ်ဖွဲ့ MNDAA မှ တရုတ်နိုင်ငံ၏ စိုးရိမ်မှုကို အကြောင်းပြပြီး ဇူလိုင်လ ၁၄ ရက် ညသန်းခေါင်မှ စ၍ ဇူလိုင်လ ၁၈ ရက် ည ၁၂ နာရီအထိ လေးရက်ကြာ ယာယီ အပစ်အခတ် ရပ်စဲမည်ဖြစ်ကြောင်း ထုတ်ပြန်ကြေညာခဲ့သည်။

ယင်းမတိုင်ခင်ကလည်း ကိုးကန့်တပ်ဖွဲ့ MNDAA ထိန်းချုပ်ထားသည့် သိန္နီမြို့ပေါ်ရှိ ရဲစခန်း၊ စာသင်ကျောင်းနှင့် ပညာရေးမှူးရုံးတို့ကို ဇူလိုင်လ ဒုတိယပတ်အတွင်း စစ်ကောင်စီတပ်မှ လေကြောင်းဖြင့် ၂ ကြိမ်ထက်မနည်း ဗုံးကြဲတိုက်ခိုက်ခဲ့သည်။