သျှမ်းပြည်နယ်တောင်ပိုင်း၊ဟိုပုံးမြို့နယ်၊မဲနယ်တောင်ဒေသတွင် ပအိုဝ်းပြည်သူ့စစ် ( PNO) နှင့် စစ်ကောင်စီတို့ဂိတ်လာဖွင့်ပြီး ဒေသခံများထံငွေညစ်မှု မကြာခဏ ရှိနေကြောင်း သိရသည်။

မဲနယ်တောင်ဒေသတိုက်ပွဲဖြစ်ပွားပြီးနောက် ဧပြီလတွင် စစ်ကောင်စီနှင့် PNOပြည်သူ့စစ်တို့က လာဖွင့်ခဲ့ပြီး မှတ်ပုံတင်စစ်ဆေးခြင်း၊လိုအပ်သည်ထက်စစ်ဆေးနေသည့် အပြင် ဂိတ်ဖြတ်သန်းသွားလာသူများထံ​လည်း ငွေညစ်မှု မကြာခဏပြုလုပ်နေကြောင်း ဒေသခံများကပြောသည်။​

“ပစ္စည်းသယ်သွား သယ်လာသူကို ပိုက်ဆံတောင်းတာတွေရှိတယ်။ကျနော်တို့ သူငယ်ချင်းကိုခေါ်လာတာ ပိုက်ဆံတောင်းတယ်။ကိုယ်က အကြီးအကျယ် သိပ်မဖြစ်ချင်တော့ တစ်သောင်း၊နှစ်သောင်း ပိုက်ဆံပေးခဲ့ရတာတွေရှိတယ်။သူတို့ဒီလိုတွေလုပ်တာတော့သိပ်ပြီးတော့အဆင်မပြေဘူးပေါ့နော်။”ဟု မဲနယ်တောင်​ ဒေသခံ တစ်ဦးက ဆိုသည်​။

ယင်းဂိတ်သည် ညနေ၆နာရီကျော်လျှင်လည်း ဒေသခံများကို ဖြတ်သန်းသွားလာခွင့်မပြုသဖြင့် အရေးပေါ် ကျန်းမာရေး ကိစ္စများ၊ ဆေးရုံသွားရမည့် ကိစ္စများတွင် အနှောက်အယှက်များဖြစ်ပေါ်စေကြောင်း ဒေသခံများကပြောသည်။

“အရင်တုန်းဆိုအသွားအလာအရမ်းလွတ်လပ်တယ်။ ခုဆို ၆နာရီကျော်ရင် ပေးမဖြတ်တဲ့ဟာမျိုးတွေရှိတယ်။အရင်ဆိုကျန်မာရေးကိစ္စဘဲဖြစ်ဖြစ် ရွာမှာဆိုဆေးပေးခန်းလည်း အဲလောက်ဆေးဝါးတွေမလုံလောက်ဘူးလေ။ကလေးမွေးတာတို့၊ခွဲစိတ်ရတာတို့ဆိုရင် ဟိုပုံးထိသွားရတာတွေရှိတယ်” ဟု မဲနယ်ဒေသခံ က ထပ်လောင်းပြောသည်။

မဲနယ်တောင်ဒေသ နှင့်ဟိုပုံးသည် နှစ်နာရီခန့် ကားမောင်းရပြီး၊ ထိုကြားထဲ ဂိတ်ပိတ်ထားပါက အရေးပေါ်လူနာအတွက် အသက်အများကြီးထိခိုက်နိုင်ကြောင်းလည်း ဒေသခံများက သျှမ်းသံတော်ဆင့်ကိုပြောသည်။​

မဲနယ်တောင်ဒေသတွင် ပြီးခဲ့တဲ့ ဖေဖော်ဝါရီ၂၁ရက်ကစပြီး ပအိုဝ်းအမျိုးသား လွတ်မြောက်ရေးတပ်မတော် PNLA လက်နက်ယာဥ်တန်းကို PNO နှင့် စစ်ကောင်စီတို့ တားဆီးရာမှ တိုက်ပွဲ ပြင်းထန်မှု ဖြစ်ပွားခဲ့သည်။​