သျှမ်းမြောက်ရှိ ကိုးကန့်တပ် MNDAA သိမ်းပိုက် အုပ်ချုပ်နေသည့် လောက်ကိုင်မြို့ကို ယနေ့ (ဇူလိုင်လ ၁၄ ရက်) နံနက်ပိုင်း လူအများ အိပ်မောကျချိန် စစ်ကောင်စီတပ် ဗုံးကြဲ တိုက်ခိုက်ခဲ့ကြောင်း ဒေသခံများက ပြောသည်။

လောက်ကိုင်ဒေသတွင် တိုက်ပွဲ ဖြစ်ပွားမှု မရှိသော်လည်း ‘၁၀၂၇’ စစ်ဆင်ရေး ဒုတိယပိုင်း စတင်ပြီးနောက် စစ်ကောင်စီဘက်က ဗုံးကြဲ တိုက်ခိုက်မည်ကို စိုးရိမ်သဖြင့် ကြိုတင် ပြင်ဆင်မှုများ ပြုလုပ်ခဲ့ရာက ယခုကဲ့သို့ ဗုံးကြဲလာခြင်း ဖြစ်သည်။

“မနက် ၂ နာရီကျော်လောက်က ဗုံးလာကြဲတာ။ အဆောက်အအုံတွေ ပျက်စီးတယ်လို့ သိရတယ်။ လူထိမထိကတော့ မသိဘူး။ မနက်လင်းကတည်းက အပြင်ထွက်တဲ့လူ သိပ်မရှိဘူး။ မီးနဲ့ အင်တာနက်က မရတာ ရက်ကြာနေပြီ” ဟု မြို့ခံ တစ်ဦးက ပြောသည်။

ဒေသတွင်း သတင်းများ ဖော်ပြနေသည့် လူမှုကွန်ရက် စာမျက်နှာ တချို့တွင် လောက်ကိုင်မြို့ကို စစ်ကောင်စီက ယနေ့ မနက် ၂ နာရီခွဲနှင့် ၃ နာရီ ၂ ကြိမ် ဗုံးကြဲ တိုက်ခိုက်ခဲ့ရာ ဟွမ်ကျားလိဟွာ ဟိုင်တည်နှင့် ဖူလီလိုက်ဟိုတယ် ဗုံးထိမှန်ခဲ့သည်ဟု ဖော်ပြထားသည်။

ဖြစ်စဥ် အသေးစိတ်ကိုမူ သျှမ်းသံတော်ဆင့် အနေဖြင့် ဆက်လက် စုံစမ်းနေဆဲ ဖြစ်သည်။

ပြီးခဲ့သည့် ဇူလိုင်လ ၃ ရက်နေ့ ကိုးကန့်တပ် လားရှိုးမြို့ကို စတင် တိုက်ခိုက်စဉ် ကတည်းက လောက်ကိုင်မြို့ကို တရုတ်ဘက်မှ လျှပ်စစ်မီးနှင့် အင်တာနက် ဖြတ်တောက်ထားကာ နယ်စပ်ဂိတ်များ ပိတ်ထားခဲ့သည်။

ယင်းနောက် လောက်ကိုင်မြို့ရှိ စာသင်ကျောင်းများ ပိတ်ထားပြီး လေကြောင်းရန် အထူးသတိပြုရန် ကိုးကန့် အုပ်ချုပ်ရေးအဖွဲ့က ကြေညာကာ ပြည်သူ့စစ်သင်တန်းပေးခဲ့ကြောင်း ဒေသခံများ အနေဖြင့် စားနပ်ရိက္ခာနှင့် စက်သုံးဆီများ ဝယ်ယူစုဆောင်းခဲ့သည်ဟု ဒေသခံများက ပြောဆိုထားသည်။

၁၀၂၇ စစ်ဆင်ရေး ပထမပိုင်း ကာလက ကိုးကန့်တပ် MNDAA သည် သျှမ်းမြောက်ရှိ ချင်းရွှေဟော်၊ လောက်ကိုင်၊ ကုန်းကြမ်း၊ ဖောင်းဆိုင်၊ မုန်းကိုး၊ ပန်ဆိုင်း၊ ကွမ်းလုံ နှင့် သိန္နီမြို့များကို သိမ်းပိုက်ခဲ့ပြီး ယခု လားရှိုးမြို့ကို အကြီးအကျယ် ထိုးစစ်ဆင်နေစဥ် လောက်ကိုင်မြို့ ဗုံးကြဲခံရခြင်း ဖြစ်သည်။