သျှမ်းပြည် မိုင်းရယ်မြို့နယ်သို့ ရှမ်းပြည်တိုးတက်ရေးပါတီ/ ရှမ်းပြည်တပ်မတော် SSPP/SSA တပ်အင်အား ထောင်နှင့်ချီ ဝင်ရောက်လာပြီး မြို့ပေါ်တွင် နေရာယူထားကြောင်း စုံစမ်းသိရသည်။
ယနေ့ (ဇူလိုင်လ ၁၃ ရက်) နံနက် ၅ နာရီကျော်မှ စတင်ပြီး မိုင်းရယ်မြို့ပေါ်သို့ SSPP ဌာနချုပ် ဝမ်ဟိုင်းမှ တပ်အင်အား အများအပြား ဝင်ရောက်နေရာယူထားပြီး မြို့ပတ်လည်တွင် လုံခြုံရေးယူထားကြောင်း မိုင်းရယ်ဒေသခံများက ပြောသည်။
“မနက်က မြို့ထဲကို ဝင်တာက ကားကြီး ၁၀ စီးကျော်လာတယ် စစ်သား ၂၀၀ ကျော်ပေါ့။ မြို့ပတ်လည်မှာ နေရာယူထားတဲ့ စစ်ကြောင်းနဲ့ဆိုရင် ၁ ထောင်ကျော်ရှိတယ်။ ဆောင်ကြဲ အထိ လမ်းမကြီးတလျှောက် အကုန်နေရာယူထားပြီ။ ဆောင်ကြဲက စစ်ကောင်စီတပ်ကိုလည်း ထွက်ခိုင်းတယ်လို့ ပြောနေကြတယ်။ မြို့ပေါ်စစ်တပ်ကတော့ မပြောတတ်သေးဘူး”ဟု မိုင်းရယ်မြို့နယ်မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
ဇူလိုင်လ ဒုတိယပတ်အတွင်း မိုင်းရယ်မြို့နယ် ဟိုယကျေးရွာအုပ်စုတွင် စစ်ကောင်စီတပ်နှင့် ကိုးကန့်တပ်ဖွဲ့ MNDAA တို့ တိုက်ပွဲအပြင်းအထန် ဖြစ်ပွားခဲ့ပြီးနောက် သျှမ်းတပ် SSPP/SSA က မိုင်းရယ်မြို့ပေါ်သို့ ဝင်ရောက်လာခြင်း ဖြစ်သည်။
“မနက်မိုးလင်း ၅ နာရီကျော်တုန်းက တစ်သုတ်ရောက်တယ်၊ ဒီနေ့လယ် နောက်ထပ်တစ်သုတ် ထပ်ရောက်မှာ အင်အား ၈၀၀ လောက်က ကောင်းလန်း (ၵွင်းလၢင်း) ကို ကျော်လာပြီ။ အခုကတော့ မြို့အပြင်ဘက် နေရာအားလုံးကို လုံခြုံရေး ယူထားပြီ၊ ထပ်လာဦးမှာနဲ့ဆိုရင် SSPP စစ်သားထောင်ချီ ရှိမယ်။ သူတို့ရှိနေတဲ့ နေရာတိုင်းမှာ SSPP အလံလွှင့်ထားတယ်”ဟု ၎င်းဒေသခံအမျိုးသားက သျှမ်းသံတော်ဆင့်ကို ဆက်ပြောသည်။
မိုင်းရယ်မြို့နယ်သို့ SSPP တပ်ဖွဲ့မှ ဝင်ရောက်နေရာယူထားခြင်းနှင့် ပတ်သက်ပြီး သျှမ်းသံတော်ဆင့်မှ SSPP ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်ထံ ဆက်သွယ်မေးမြန်းရန် ကြိုးစားခဲ့သော်လည်း ဖုန်းဆက်ပိတ်ထားသည်။
မိုင်းရယ်မြို့နယ်မှ ပြည်သူလူထုများကို စစ်ဘေးဒဏ်မှ ကာကွယ်ပေးရန် SSPP တပ်ဖွဲ့မှ ဝင်ရောက်နေရာယူခဲ့ခြင်းဖြစ်ကြောင်း SSPP ပြောရေးဆိုခွင့်ရှိသူ ဗိုလ်မှူးကြီး စိုင်းဆုက BBC သတင်းတွင် ဖြေကြားထားသည်။
မိုင်းရယ်မြို့နယ်အတွင်းရှိ စစ်ကောင်စီလက်အောက်ခံ ဝမ်စန့်နှင့် ဟိုယရှိ တပ်စခန်းအသေးများမှာ တပ်ဆုတ်သွားပြီး ကိုးကန့်တပ်ဖွဲ့ MNDAA လည်း နမ့်ထွန်၊ ကွန်ယက်နှင့် ဟိုတိကျေးရွာအနီးတွင် တပ်စွဲထားကြောင်း ဒေသခံများက ပြောသည်။
အလားတူ ဇူလိုင်လ ၁၀ ရက်မှ စတင်ပြီး တန့်ယန်းမြို့နယ်ထဲသို့ ‘ဝ’တပ်ဖွဲ့ UWSA မှ တပ်အင်အား ၂၀၀၀ ကျော်ဖြင့် သံလွင်မြစ်အနောက်ဘက်သို့ ကမ်းကူး၍ အင်အားဖြည့်တင်းလာခဲ့ပြီး အချို့မှာ တိုက်ပွဲပြင်းထန်နေသည့် လားရှိုးမြို့သို့ ဆက်လက်ချီတက်သွားကြောင်း ဒေသခံများထံမှ သိရသည်။
Leave a Comments