သျှမ်းပြည် လားရှိုးမြို့ပေါ်တွင် လက်နက်ကြီးများ ကျရောက်ပေါက်ကွဲမှုကြောင့် ပြည်သူ ၄ ဦး ထပ်မံသေဆုံးခဲ့ကြောင်း လားရှိုးမြို့လူမှုကူညီရေးအသင်းထံမှ သိရသည်။
ယမန်နေ့ (ဇူလိုင် ၁၁ ရက်) မနက်ပိုင်းတွင် လားရှိုးမြို့ ရပ်ကွက် (၁)၊ သာသနာ (၂၅၀၀) တောင်အခြေအနီး လက်နက်ကြီးကျရောက်ပေါက်ကွဲသောကြောင့် ဒေသခံ ၁ ဦး သေဆုံးသွားခဲ့ကြောင်း သိရသည်။
အလားတူ ယမန်နေ့ ညပိုင်းတွင် လားရှိုးမြို့ ရပ်ကွက် (၁)၊ နယ်မြေ (၈) တွင် လက်နက်ကြီး ထပ်မံကျရောက် ပေါက်ကွဲသောကြောင့် ဒေသခံ ၁ ဦးသေဆုံးသလို ရပ်ကွက် (၁၀) ရွှေကျောက်ဂူအနီးတွင် လက်နက်ကြီးကျ၍ ဒေသခံ ၂ ဦးသေဆုံးသွားခဲ့ကြောင်း လားရှိုးလူမှုကူညီရေးအသင်းကပြောသည်။
ထိုသေဆုံးသူ အလောင်းများကို လားရှိုးမြို့ လူမှုကူညီရေးအသင်းက သွားရောက်သယ်ဆောင်ခဲ့ပြီး လားရှိုးမြို့ ပြည်သူ့ဆေးရုံးကြီးမှတစ်ဆင့် ရင်ခွဲရုံသို့ပို့ဆောင်ပေးခဲ့ကြောင်း လူမှုကူညီရေးအသင်းက ၎င်းလူမှုကွန်ရက် စာမျက်နှာပေါ်၌ ရေးသားဖော်ပြထားသည်။
စစ်ကောင်စီ၏ အရှေ့မြောက်တိုင်း စစ်ဌာနချုပ် (ရမခ) အခြေစိုက်ရာ လားရှိုးမြို့ကို တအာင်း (ပလောင်) အမျိုးသားလွတ်မြောက်ရေး တပ်မတော် TNLA နှင့် ကိုးကန့်တပ်ဖွဲ့ MNDAA တို့က ဇူလိုင် ၂ ရက်မှစ၍ ထိုးစစ်တိုက်ခိုက်နေခြင်း ဖြစ်သည်။
တိုက်ပွဲအတွင်း နှစ်ဖက်လက်နက်ကိုင် တပ်ဖွဲ့များက လက်နက်ကြီးများ၊ ရှော့တိုက်ဒုံးများဖြင့် အပြန်အလှန် တိုက်ခိုက်သောကြောင့် လူနေအိမ်များနှင့် ရပ်ကွက်ပေါ်သို့ ကျရောက်ပေါက်ကွဲကာ ပြည်သူများ ၃၀ နီးပါးသေဆုံးပြီး ၃၀ ကျော်ထိခိုက်ဒဏ်ရာရှိကြောင်း လူမှုကူညီရေးအသင်းများကပြောသည်။
Leave a Comments