သျှမ်းပြည် အောင်ပန်းမြို့နယ်အတွင်းသို့ လားရှိုးမြို့နှင့် ပင်လောင်းမြို့နယ်မှ ရောက်ရှိလာသော ဒေသခံများအတွက် နေရာထိုင်ခင်းအခက်အခဲများကြုံတွေ့နေရကြောင်း သတင်းရရှိသည်။

ဇူလိုင်လ ပထမ ပတ်မှစ၍ အောင်ပန်းမြို့တွင် ထပ်မံရောက်ရှိလာသော လားရှိုးမြို့ နှင့် ပင်လောင်းမြို့နယ်မှ စစ်ဘေးရှောင်များအတွက် ဘုန်းကြီးကျောင်းများနှင့် အခြားနေရာများတွင် နေရာထိုင်ခင်းအခက်အခဲများရှိနေကြောင်း စစ်ဘေးရှောင်ကူညီသူတစ်ဦးက သျှမ်းသံတော်ဆင့်ကို ပြောသည်။

“ထပ်ရောက်လာမယ်ဆိုရင်တော့ လော‌လောဆယ်တော့ နေရာတွေက အခက်အခဲဖြစ်နေတာ ဘုန်းကြီးကျောင်း တွေမှာလည်း ပြည့်နေပြီ။ အခုစာရင်းကောက်ထား တာကတော့ ၁၀၀ ‌ကျော်လောက်ပဲ နေရာရတယ်။အိမ်ငှားနေကြ တာတွေပေါ့။ ရောက်လာ‌တွေတော့ အများကြီးပဲ။ ပြီးခဲ့တဲ့ရက်တွေကလည်း လူဦးရေ ၅၀၀ လောက်လာကြတာ။ ဘုန်ကြီးကျောင်းမှာ ပြည့်နေတော့ လက်မခံလိုက်ရဘူး ”ဟု ၎င်းက ပြောသည်။

ထို့အပြင် အောင်ပန်းမြို့ရှိ လုံးချင်းအိမ်၊ အခန်းနှင့် အငှားဆိုင်ခန်းများလည်း ယခင်ကထပ် ဌားရမ်းခဈေးမြင့် တက်လာသည့်အတွက် စစ်ဘေးရှောင်များအတွက် အခက်တွေ့နေကြောင်း ၎င်းကဆက်ပြောသည်။

“နေရာတွေကလည်း ခက်ခဲတယ်။ အိမ်ခန်းငှားမယ်ဆိုရင်တောင် ဈေးကြီးတွေ ဈေးတင်တာတွေမလုပ်ပါနဲ့ တွေ့နေရတယ်။အိမ်ငှာနေတာကလည်း စစ်ဘေးရှောင်လာကြရတာလေ။ ဈေးကအရမ်းကြီးတော့ တချို့တွေ ကြ‌တော့ တခြားနေရာတွေ ပြန်သွားတာတွေရှိတာပေါ။ပုံမှန်ဈေးတွေထပ်တော့ နည်းနည်းတက်တာပေါ့။ အကုန်လုံး ကတော့အိမ်ကိုပြစ်ပြီးပြေးလာကြတာလေ ခုတော့ လက်ထဲရှိတာလေးနဲ့ပဲနေနေကြရတာပေါ့”ဟု ၎င်းကဆက်ပြောသည်။

လက်ရှိအောင်ပန်းမြို့နယ်တွင် သျှမ်း-ကားယားနယ်စပ်မှလာသော စစ်ဘေးရှောင်များ၊သျှမ်းမြောက် လားရှိုးမြို့နယ်နှင့် ပင်လောင်းမြို့နယ်မှ လာသော စစ်ဘေးရှောင်များရှိပြီး ဘုန်းကြီးကျောင်း၊ဆွေမျိုးအိမ်နှင့် အိမ်ခန်းတွင် ဌားရမ်း၍နေကြကာ စစ်ဘေးရှောင်စုစုပေါင်း လူဦးရေ ၃ ထောင်ဝန်းကျင်ခန့်ရှိနေကြောင်း ၎င်းကဆက်ပြောသည်။

ဇူလိုင်လ ၂ ရက်မှ စတင်ခဲ့သည့် စစ်ကောင်စီတပ်နှင့် ညီနောင်မဟာမိတ်တပ်များ၏ လားရှိုးမြို့ပေါ် တိုက်ပွဲများကြောင့် ထွက်ပြေးနေရသည့် စစ်ဘေးရှောင်များသည် ဘေးလွတ်ကင်းရာ နမ့်လန်၊ တန့်ယန်း၊ မိုင်းရယ်၊ မိုင်းကိုင်၊ မိုင်းရှူး၊ လဲချား၊ ပင်လုံ၊ နမ့်စန်နှင့် တောင်ကြီး၊ အောင်ပန်းစသည့် မြို့များသို့ ရောက်ရှိနေကြပြီး စားနပ်ရိက္ခာ အကူအညီများ လိုအပ်နေကြောင်း စစ်ဘေးရှောင် ကူညီပေးနေသူများက ပြောသည်။