မန္တလေးတိုင်း၊ မတ္တရာမြို့နယ်၊ အင်ကြင်းမြိုင်ရွာ အနီးရှိ စစ်ကောင်စီ၏ အမှတ် (၁၀၁၄) လေကြောင်းရန် ကာကွယ်ရေးတပ် တိုက်ခိုက် သိမ်းပိုက်စဉ်က ရရှိခဲ့သည့် လေယာဉ်ပစ် စက်သေနတ်ကြီးများအား ပြန်လည် အသုံးချရန် လေ့ကျင့်ပြင်ဆင်ပြီး ဖြစ်သည်ဟု MDY PDF က ယနေ့ (ဇူလိုင်လ ၁၁ ရက်) တွင် ထုတ်ပြန်သည်။

MDY PDF ထုတ်ပြန်ထားသည့် မှတ်တမ်း ဓာတ်ပုံများတွင် ခေတ်နောက်ကျနေပြီ ဖြစ်သော်လည်း အသုံးပြု၍ရသည့် ရုရှားထုတ် လေယာဉ်ပစ် စက်သေနတ်များ ဖြစ်သည်ကို တွေ့ရသည်။

ထို့အပြင် နောင်ချိုမြို့နယ် တစ်ခုလုံးကို တော်လှန်ရေးတပ်ဖွဲ့များ အပြည့်အဝ ထိန်းချုပ်နိုင်ခဲ့ပြီးဖြစ်ပြီး စစ်ကောင်စီ လုံးဝကင်းစင်သော မြို့နယ် တစ်ခု ဖြစ်လာခဲ့ပြီဟု ယနေ့ ထုတ်ပြန်သည့် ထုတ်ပြန်ချက်တွင် ဖော်ပြသည်။

နောင်ချိုမြို့နယ်ရှိ ခမရ(၁၁၄) ၊ ခမရ(၁၁၅) နှင့် အမတ (၆၀၆) ဒုံးတပ်စခန်းများမှ အတွဲလိုက်ပစ် ဒုံးလက်နက်များ အပါအဝင် လက်နက်ခဲယမ်း အများအပြား သိမ်းဆည်းရမိခဲ့ပြီး သုံ့ပန်းများ ဖမ်းဆီးရမိခဲ့သည်ဟု MDY PDF ကဆိုသည်။

လေယာဉ်ပစ် လက်နက်များ ရရှိခဲ့သည့် အင်ကြင်းမြိုင် လေကြောင်းရန် ကာကွယ်ရေး တပ်စခန်းကို ပြီးခဲ့သည့် ဇွန်လ ၂၇ ရက်နေ့တွင် သိမ်းပိုက်နိုင်ခဲ့ပြီး လေကြောင်းရန် ကာကွယ်ရေး အတွက် အသုံးပြုသည့် အရေးကြီး စစ်လက်နက် ခဲယမ်းများ ရရှိခဲ့ကြောင်း စစ်ရေးသတင်းရင်းမြစ်က ပြောသည်။

ယင်းတပ်စခန်းတွင် SA- 16 SAM ပခုံးထမ်း လေယာဉ်ပစ် ဒုံးကျည် (ပြည်တွင်းထုတ်) ၄၈ လက်၊ 25mm နှင့် 35 mm Anti Aircraft Cannon (လေယာဉ်ပစ်) ၁၀ လက်နှင့် ကျည် ၅,၀၀၀ ကျော်၊ TWS-312 Smart Com နှင့် 1L-117 ရေဒါ၊ Pechora လက်နက်စနစ် စသည်ဖြင့် ဖွဲ့စည်းပုံ အပြည့်ရှိသည်ဟု စစ်ရေးသတင်းရင်းမြစ်က ပြောဆိုထားသည်။