သျှမ်းမြောက်တွင် ကျားဖြန့်တိုက်ဖျက်ရေး ခေါင်းစဉ်ဖြင့် ကိုးကန့်တပ်ဖွဲ့ MNDAA နှင့် တအာင်း (ပလောင်) အမျိုးသားလွတ်မြောက်ရေး တပ်မတော် TNLA တို့က နယ်မြေချဲ့ထွင် တိုက်ခိုက်လာနေသဖြင့် လုံခြုံရေးအတွက် အလေးထား ဆောက်ရွက်နေရသည်ဟု ဗိုလ်ချုပ်ဇော်မင်းထွန်းပြောက ပြောဆိုလိုက်သည်။

ယနေ့ ဇူလိုင် ၁၀ ရက်တွင် စစ်ကောင်စီမီဒီယာမှတစ်ဆင့် စစ်ကောင်စီ၏ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောကြားခဲ့ခြင်းဖြစ်သည်။

“MNDAA အဖွဲ့အနေနဲ့ ချင်းရွှေဟော်ဒေသ တစ်ဝိုက်နဲ့ ကိုးကန့်နယ်မြေကို စတင်တိုက်ခိုက်ခါစက ကျားဖြန့်လို့ခေါ်တဲ့ Online လောင်းကစားမှု၊ လိမ်လည်မှုကို တိုက်ဖျက်ရန်ဆိုတဲ့ ခေါင်းစဉ်နဲ့ စတင်ခဲ့တယ်ဆိုတာ သိရပါတယ်။ လောက်ကိုင် ဒေသအပါအဝင် နယ်စပ်ဒေသတွေမှာဖြစ်ခဲ့တဲ့ ကျားဖြန့်ခေါ် အွန်လိုင်းလိမ်လည်မှုတွေဟာ လောက်ကိုင်မှာဆိုရင် ဟိုတယ်တွေ၊ လျှို့ဝှက်နေရာတွေမှာ ပုန်းလျှိုးကွယ်လျှိုး ဆောင်ရွက်ကြတာဖြစ်လို့ နိုင်ငံတော်အစိုးရအဖွဲ့အနေနဲ့ သိရှိခဲ့ခြင်းမရှိပါဘူး” ဟု ဗိုလ်ချုပ်ဇော်မင်းထွန်းက ပြောသည်။

စစ်ကောင်စီအနေဖြင့် ကျားဖြန့်ကိစ္စကိုသိရှိပြီးနောက် တရုတ်နိုင်ငံနှင့် ပူးပေါင်းဆောင်ရွက်ပြီး နှိမ်နင်းခဲ့ကြောင်း၊ တရုတ်နိုင်ငံသား ၅၁၈၅၁ ဦး၊ ဗီယက်နမ် နိုင်ငံသား ၁၁၄၃ ဦး၊ ထိုင်းနိုင်ငံသား ၆၄၀ အပါအဝင် ၂၁၅၀ ကို သက်ဆိုင်ရာ နိုင်ငံများကို လွှဲပြောင်းပေးနိုင်ခဲ့ကြောင်း ဗိုလ်ချုပ်ဇော်မင်းထွန်းကပြောသည်။

ယင်းနောက် MNDAA သည် ကိုးကန့်နယ်မြေ အထူးဒေသ (၁) ရရှိရေးဆိုပြီး လုပ်ဆောင်လာကြောင်း၊ NUG အဖွဲ့နှင့်တွေ့ပြီး MNDAA ကနယ်မြေကို လိုက်ပြခြင်း၊ ဆွေးနွေးခြင်း လုပ်လာသည့်အပြင် ကိုးကန့်ဒေသနယ်မြေကို ချဲ့ထွင်လာကြောင်း စစ်ကောင်စီကဆိုသည်။

အလားတူ TNLA အဖွဲ့ကလည်း ထိုကဲ့သို့ လုပ်ဆောင်ခဲ့ကြောင်း ပြောသည်။

MNDAA နှင့် TNLA တို့၏ တိုက်ခိုက်မှုအပေါ် မြို့များ၊ အရပ်သားပြည်သူများ ဘေးကင်းလုံခြုံရေးစေရေးအတွက် အထူးအလေးထားပြီး စစ်ကောင်စီအနေဖြင့် ဆောင်ရွက်သွားမည်ဖြစ်ကြောင်း စစ်ကောင်စီက ပြောဆိုထားသည်။