သျှမ်းပြည် သီပေါမြို့နယ်ရှိ စစ်ဘေးရှောင် ၂ ထောင်ကျော်အတွက် စားနပ်ရိက္ခာ အကူအညီ အရေးပေါ် လိုအပ်နေကြောင်း စုံစမ်းသိရသည်။

ဇွန်လ နောက်ဆုံးပတ်မှ စတင်ပြီး သီပေါမြို့နယ်တွင် စစ်ကောင်စီတပ်နှင့် တအာင်း (ပလောင်)အမျိုးသားလွတ်မြောက်ရေးတပ်မတော် TNLA တို့ ဖြစ်ပွားသည့် တိုက်ပွဲများကြောင့် ထွက်ပြေးတိမ်းရှောင်လာသူ ၂ထောင်ကျော်အတွက် စားနပ်ရိက္ခာ အကူအညီ အရေးပေါ်လိုအပ်နေကြောင်း စစ်ဘေးရှောင် ကူညီပေးနေသူများက ပြောသည်။

“တိုက်ပွဲကြောင့် ထွက်ပြေးလာတဲ့သူတွေ နှစ်ထောင့်ငါးရာလောက်ရှိမယ်။ သူတို့ စားဖို့သောက်ဖို့ မရှိတော့ ဆန်သွားပေးတာ သူတို့တွေ မျက်ရည်ဝဲနေကြတယ်။ စားနပ်ရိက္ခာတွေ အရေးပေါ် လိုတာပေါ့၊ ခုက ဆန်ဆီဆေးဆား ဒီဟာတွေ လိုနေကြတယ်”ဟု သီပေါမြို့နယ်မှ စစ်ဘေး‌ရှောင်ကူညီနေသူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

သီပေါမြို့တွင်းရှိ ဘုန်းကြီးကျောင်းများသို့ ထွက်ပြေးတိမ်းရှောင်လာသူများကိုလည်း စစ်ကောင်စီတပ်မှ နေရပ်ပြန်ရန် တားမြစ်ထားကြောင်း သီပေါစစ်ဘေးရှောင်များထံမှ သိရသည်။

ထို့ပြင် သီပေါမြို့သို့ ရောက်ရှိနိုင်ရန် ပြည်ထောင်စုလမ်းမကြီးပေါ်ရှိ တံတားများ ချိုးဖျက်ခံထားရခြင်းနှင့် မြို့တွင်းဝင်ရောက်နိုင်သည့် လမ်းကြောင်းများကို ပိတ်ထားသည့်အတွက် စားသောက်ကုန်စျေးနှုန်း အဆမတန် မြှင့်တက်မှုရှိကာ စက်သုံးဆီများလည်း ပြတ်လပ်နေခြင်းကြောင့် အခက်အခဲမျိုးစုံ ကြုံတွေ့နေရသည်ဟု ဒေသခံများက ပြောဆိုသည်။

“စစ်ကောင်စီတပ်က အိမ်ကို ပေးမပြန်တာ‌၊ ဆန်တောင်ပြန်ယူမရဘူး။ တစ်ချို့ဆိုရင် စားဖို့သောက်ဖို့တောင် မရှိဘူး။ ကျောင်းမှာကလည်း ချက်ပြုတ်ဖို့ ထင်းတွေကလည်း မရှိဘူး၊ မီးသွေးကလည်း ဈေးကြီးတယ်။ မီးစက်ကျတော့လည်း ရေချိုးဖို့ ရေတင်ဖို့ပဲ အဆင်ပြေတာလေ။ စက်သုံးဆီတွေလည်း ပျက်နေပြီ ဝယ်လို့မရတောဘူး”ဟု သီပေါစစ်ဘေး‌ရှောင်ကူညီသူ ၎င်းအမျိုးသမီးက သျှမ်းသံတော်ဆင့်ကို ဆက်ပြောသည်။

သီပေါမြို့နှင့် အနီးတဝိုက်တွင် စစ်ကောင်စီတပ်နှင့် တအာင်း(ပလောင်) အမျိုးသားလွတ်မြောက်ရေးတပ်မတော် TNLA တို့ တိုက်ပွဲဖြစ်ပွားပြီးနောက် လမ်းများပိတ်ဆို့ကာ ဆန်နှင့် ကုန်ပစ္စည်းဈေးနှုန်းများ အဆမတန် မြှင့်တက်နေကြောင်း သိရသည်။

တစ်ဖက်တွင်လည်း TNLA ၊ ပြည်သူ့ကာကွယ်ရေးတပ် PDF ပူးပေါင်းတပ်ဖွဲ့တို့နှင့် စစ်ကောင်စီတပ်တို့သည် သျှမ်းပြည်မြောက်ပိုင်း လားရှိုး၊ ကျောက်မဲ၊ သီပေါ၊ နောင်ချိုနှင့် မိုးမိတ်၊ မိုးကုတ်မြို့နယ်တို့တွင် တိုက်ပွဲပြင်းထန်နေခြင်းကြောင့် အရပ်သားပြည်သူ ၃ သောင်းကျော် ထွက်ပြေးတိမ်းရှောင်နေရပြီး စားနပ်ရိက္ခာ အကူအညီ အရေးပေါ်လိုအပ်နေကြောင်း စစ်ဘေးရှောင်ကူညီသူများထံမှ သိရသည်။