ရှမ်းပြည်မြောက်ပိုင်း၊ နောင်ချိုမြို့ တောင်ဘက်ရှိ စစ်ကောင်စီ (၆၀၆) ဒုံးတပ်ကို ယမန်နေ့ (ဇူလိုင်လ ၉ ရက်) ညသန်းခေါင်တွင် TNLA ပူးပေါင်းတပ်များ တိုက်ခိုက် သိမ်းပိုက်နိုင်ခဲ့ပြီး မြို့ကို အလုံးစုံ သိမ်းပိုက် ထိန်းချုပ်နိုင်ခဲ့ပြီးဟု ခိုင်မာသည့် စစ်ရေးသတင်းရင်းမြစ်က ယနေ့ (ဇူလိုင်လ ၁၀ ရက်) နေ့တွင် အတည်ပြု ပြောသည်။

ပြီးခဲ့သည့် ဇွန်လ ၂၆ ရက်က စတင်ခဲ့သည့် TNLA ပူးပေါင်းတပ်၏ ထိုးစစ် အတွင်း နောင်ချိုမြို့ရှိ စစ်ကောင်စီ ခမရ (၁၁၅) နှင့် (၁၁၄) တပ်ရင်း ၂ ခုကို သိမ်းပိုက်နိုင်ခဲ့ပြီး မြို့ကို ထိန်းချုပ်နိုင်ခဲ့သော်လည်း (၆၀၆) ဒုံးတပ်တွင် စစ်ကောင်စီတပ်က စုပြုံခုခံခဲ့ရာက ယခုကဲ့သို့ သိမ်းပိုက်နိုင်ခဲ့ခြင်း ဖြစ်သည်။

“နှစ်ဖက် အကျအဆုံးရှိပါတယ်။ လက်နက်ချတာလား ဆိုတာနဲ့ ဒုံးတပ်က လက်နက်ခဲယမ်း ရရှိမှုကတော့ သက်ဆိုင်ရာ ပူးပေါင်းတပ်က ထုတ်ပြန်ပါလိမ့်မယ်” ဟု စစ်ရေးသတင်းရင်းမြစ်က ဆိုသည်။

ပြီးခဲ့သည့် ရက်ပိုင်းက နောင်ချို ဒုံးတပ်ရင်း (၆၀၆) တပ်ကို စစ်ကောင်စီတပ် လေကြောင်းဖြင့် အကြိမ်ပေါင်းများစွာ တိုက်ခိုက်ခဲ့ရာ အဆိပ်ငွေ့ဗုံးများပါဝင်ကြောင်း TNLA ၏ ထုတ်ပြန်ချက်များတွင် ဖော်ပြထားသည်။

ယခု သိမ်းပိုက်နိုင်ခဲ့သည့် ဒုံးတပ်သည် နောင်ချိူ- ကျောက်ဂူ- ရပ်စောက် သျှမ်းတောင် သွားလမ်းပေါ်တွင် တည်ရှိပြီး အမှတ် (၉၀၂) အမြောက်တပ်ကွပ်ကဲမှုဌာနချုပ်နှင့် တောင်ခမ်း စစ်ဗျူဟာ လုံခြုံရေးအတွက် အရေးပါသည့် တပ်ဖြစ်သည်။

တောင်ခမ်းရှိ စစ်ကောင်စီတပ်တွင် စစ်လက်နက်သာမက စက်သုံးဆီ ဂါလန်သန်းနှင့်ချီ သိုလှောင်ထားသဖြင့် စစ်ကောင်စီက နောင်ချို ဒုံးတပ် မကျရေး စစ်ကူများ ဖြည့်တင်း၍ လေကြောင်းမှ အကြိမ်များစွာ တိုက်ခိုက် ခုခံခဲ့ခြင်းဖြစ်သည်ဟု စစ်ရေးသတင်းရင်းမြစ်က ရှင်းပြသည်။

နောင်ချို တိုက်ပွဲများ အတွင်း TNLA နှင့်အတူ မန္တလေး PDF၊ ဓနုတပ်မတော် DPLA တို့ ပါဝင် တိုက်ခိုက်နေကြောင်း သိရသည်။