သျှမ်းပြည် လားရှိုးမြို့၊ ရပ်ကွက် (၉) တွင် ရှော့တိုက်ဒုံးကျရောက်ပေါက်ကွဲသဖြင့် ကလေးနှင့် အမျိုးသမီး ၃ ဦးသေဆုံးပြီး ၁၀ ဦးထက်မနည်း ထိခိုက်ဒဏ်ရာရရှိခဲ့ကြောင်း စုံစမ်းသိရသည်။
ယနေ့ (ဇူလိုင် ၁၀ )ရက် နံနက် ၆ နာရီကျော်တွင် လားရှိုးမြို့ ရပ်ကွက် (၉)၊ ဘူတာရုံသံလမ်းဘေးသို့ ရှော့တိုက်ဒုံး နှစ်လုံးကျရောက်ပေါက်ကွဲသဖြင့် ကလေး ၁ ဦးနှင့် အမျိုးသမီး ၂ ဦးသေဆုံးပြီး ၁၀ ဦးထက်မနည်း ထိခိုက်ဒဏ်ရာရရှိခဲ့ကြောင်း လားရှိုးမြို့ဒေသခံတစ်ဦးက သျှမ်းသံတော်ဆင့်ကိုပြောသည်။
“ဒီမနက်အစောပိုင်းက ကျတာ။ ၁၁ ယောက်ကျော် ထိတယ်။ ၇ ယောက်လောက်က အခြေအနေဆိုးတယ်။ တချို့အလောင်းတွေလည်း ခါးပြတ်သွားတယ်” ဟု ၎င်းကပြောသည်။
အလားတူ လားရှိုးတက္ကသိုလ်အနီးရှိ ပါရမီလမ်းတွင်လည်း လက်နက်ကြီးကျရောက်ပေါက်ကွဲမှုရှိပြီး ထိခိုက်သေဆုံးမှု အခြေအနေကို မသိရသေးပေ။
လက်ရှိ လားရှိုးမြို့တွင် ဖုန်းလိုင်း၊ အင်တာနက်များ ပြတ်တောက်နေပြီး ဒေသခံများမှ ဆက်သွယ်အကူညီ တောင်းခံရန်အတွက်လည်း ခက်ခဲနေကြောင်း ဆိုသည်။
ပြီးခဲ့သည့် ဇူလိုင် ၃ ရက်တွင်လည်း လားရှိုးမြို့ ရပ်ကွက် ၁ သာယာလမ်းရှိ ပြည်သူနေအိမ်တစ်လုံးသို့ ရှော့တိုက်ဒုံးကျရောက်ပေါက်ကွဲခဲ့ရာ မိသားစုဝင် (၆) ဦးစလုံး ပွဲချင်းပြီး သေဆုံးသွားခဲ့သည်။
သျှမ်းမြောက် တစ်ကျော့ပြန် “၁၀၂၇ စစ်ဆင်ရေး” ဖြစ်ပွားလာချိန်မှစတင်ပြီး လားရှိုးမြို့တွင် ရှော့တိုက်ဒုံးများ၊ လက်နက်ကြီးများကြောင့် ထိခိုက်သေဆုံးသူ ၂၀ ကျော်ရှိပြီဖြစ်ကြောင်း သိရသည်။
Leave a Comments